Davidi Psalms
1 Tā ǂkhabadī-aon ǂama ǂâiǂhansen
tā tsūdī-aon ǃoagu surixa.
2 ǃHaesen ǀgân khami ǂnâ;
tsî ǀgâb di ǃammi khami nî kā xuige.
3 ǃKhūb ai ǂgomaiǂnûi î ǃgâise dī re;
ǃhūb ǃnâ ǁan î ǃgâise ûi re.
4 ǃKhūb ǃnâ ǃgâiaǂgao re
ob ge ǁîba sa ǂgaob di turaga nî mā tsi.
5 Sa daoba ǃKhūb ai ǂgomaiǂnûi
ǁîba ǂgomǃgâ, dība tsib nî xuige.
6 ǁÎb ge sa ǂhanu-aisiba ǃnâb khami nî ǀkhī kai
tsî ǂhanub âtsa tsēǃgâǁaeb khami.
7 ǃKhūba ǃnōba î, ǁîba ǃâu re
Tā ǁnān hîa ûib ân ǃnâ ra aiǃgûn ǃoagu ǁaixa;
ǁnān hîa tsū ǀapede ra dīn ǃoagu.
8 ǁAiba xu ūdabasen î ǁaixasiba ǁnāxū.
Tā ǂâiǂhansen, ǂkhôab ǀguibas ǁnāsa ra hā-ū xuige.
9 Tsūdī-aon ge nî hîkākāhe;
xawe ǁnān ǃKhūb ǃnâ ǃâubasensa ūhân ge ǃhūba nî ǀumi.
10 ǂKhari ǁaerob khaoǃgân ge ǂkhabana ǃaruǀî hâ tide.
Tsîts ge ǂōrisase ǁîn hâǃkhais tawa nî kō, xawen ge nî ǀkhai.
11 Xawe ǃgamǃgamsensan ge ǃhūba nî ǀumi,
tsîn ge ǂkhîb di ǃnāǂamsasib ǃnâ nî ǃgâiaǂgao.
12 ǂKhabab ge ǂhanu-aib ǃoagu ǀapeǀhao
tsî ǁîb ǂama ra ǁaninǁgû.
13 ǃKhūb ge ǂkhababa ra âiǂui
ǁîb tsēs ra hā ǃkhaisab ra mû xui-ao.
14 ǂKhaba khoen ge ǁîn gôaga ra ǂgaeǂui tsî khādi âna ra ǂgaeǃnâ,
ǀgâsan tsî ǂhâb ǃnâ hâna nî ǁkhâuse,
ǁnān ǂhanu-aina nî ǃgamse.
15 ǁÎn di gôab ge ǂgaob ân ǃnâ nî ǂgâ;
tsî khādi ân ge nî khôahe.
16 ǂKhari-i, ǂhanu-ai khoe-i ūhâ-i ge a ǃgâi,
ǃnāǂamsasib ǃnân ǂkhaba khoena ūhâ-i ǃgâ-ai.
17 ǂKhaba khoen di ǁôagu nî khôahe
xaweb ǃKhūba ǂhanu-aina nî ǂkhâǃnâ xui-ao.
18 ǃKhūb ge ǀhapio khoen di tsēde a ǂan
tsîs ge ǀumis âna ǀamose nî hâ.
19 ǁÎn ge tsūǃōb ǁaeb ǃnâ taotaohe tide
tsîn ge ǃâtsūǀkhāb tsēdi ai nî ǁâǁâhe.
20 ǂKhaba khoen ge nî kāǁō
tsîn ge ǃKhūb khākhoena ǃû-aidi di ǂkhaisib khami ī, ǁîn ge ra kā,
ǀanni khamin ge nî kā.
21 ǂKhaba khoen ge ra ǀkhupi, xawe matare-oa ǁoa;
xawe ǂhanu-ai khoen ge ǀkhomxaǃnâ tsî a māǂgaoxa.
22 ǁNān ǃKhūb xa ǀkhaehe hân ge ǃhūba nî ǀumi;
tsî ǁnān ǁîb xa ǀâxarehe hânab ge nî hîkākā.
23 Khoe-i di dāǃharodi ge ǃKhūb xa ǃgaoǃgaohe hâ,
ǁîb daob ǃnâb ga ǃgâiǃgâibasensa ūhâo.
24 ǁNāti ī khoe-i ge ǁgoeǃari tama hâ, ǁnā-i kao;
ǃKhūb ǁî-e ra ǂkhâǃnâ amaga.
25 ǂKham ta ge ge i, tsî ta ge nēsi kaira hâ
xawe ta ge ǂhanu-ain ge ǁnāǃgâhe hâ i tsē-i,
tamas ka io ǁîn ôan ge pere-e ǂgan hâ i tsē-e a ǀū.
26 Hoaǁaeb ge ǁîba māǂgaoxase ra ǀkhupi;
tsîb ge ǁîb suriba ǀkhaeb ase ra ī.
27 Dawasen ǂkhababa xu, î ǃgâiba dī
î ǀamose ûi ǁkhā re.
28 ǃKhūb ge ǂhanu-aisiba a ǀnam tsî ǁîb di ǂgomǂgomsa khoena ǁnāǃgâ tide.
ǀAmosen ge ǁîna a sâusa, xawe ǂkhaba khoen di surib ge nî hîkākāhe.
29 ǂHanu-ai khoen ge ǃhūba ǀumi
tsî ǀamose ǁîb ǃnâ nî ǁan.
30 ǂHanu-ai khoe-i ams ge gā-aisiba ra gowa
tsî nammi â-i ge ǂhanu-aisiba ra ǃhoa.
31 ǁÎ-i Elob di ǂhanub ge ǂgaob â-i ai hâ
tsî i ge ǁnobe tama hâ.
32 ǂKhaba khoe-i ge ǂhanu-ai-e ra ǃkhē
ǁî-e nî ǃgamse.
33 ǃKhūb ge ǁî-e ǂkhabadī-ao-i ǃomǁae māǁnâ tide,
tsî ǁî-e ǁnâuǃgâhe-i kao, ǀgoraǃgâ tide.
34 ǃKhūba ǂgomaiǂnûi î, ǁîb daogu ai ǃgû
îb ǁîba ǃhūba du nî ǀumise ūkhâi du,
o du ge eloxoresan di hîkākāhesa nî mû.
35 Tita ge ǃnâudanaxa, ǂkhaba khoeb
ǃam hais, ǁîs di ǂhunuma ǃhūb ǃnâ ǂgāhes hâs khami ra ǀomkhâiba ge mû.
36 Tsî ǁkhawa ta ge ǁnāpa ǃkharu, o ta ge ǀkhaib a ǃkhaisa ge mû;
ôa bi ta ge xaweb ge ge hōsa tama i.
37 ǂNao-o khoeba sao re, î ǂhanu-aiba ǃgaoǃgâ
Khoeb ǂkhîb dib ǃnâb ǃgoaxaǁaeba hâ xuige.
38 ǃÛǂamaon ge hoatsama nî hîkākāhe
ǂkhaba khoen di ǃgoaxaǁaeb ge nî ǃgaoǁnâhe.
39 Tsîs ge ores ǂhanu-ai khoeb disa ǃKhūba xu hâ
ǁîb ge a ǁîn di ǁhaiǁhâǃkhai, ǃgommi di ǁaeb ǃnâ.
40 ǃKhūb ge ǁîna hui tsî ra ore;
ǁînab ge ǂkhaba khoena xu ore
tsî ǁîbǀîn ga ǁhaiǁhâ o ra sâu.
© Khoekhoegowab Elobmîs © Bible Society in Namibia, 2020.
