Tsâtsâ, î mû ǃKhūb a ǃgâi ǃkhaisa
Abimelexi aiǃâb ge ǃkhau hâse tanisen îb ǃhaebēhega tsîb ge ǃgûbē tsēs ai.
Davidi Psalms
1 Mâ ǁaeb hoab ai ta ge ǃKhūba nî kare;
hugaǀguis ge ǁîb koasa ti amǃnâ nî hâ.
2 ǃKhūb ǃnâ ta ge nî koasen
an ǁnān ǃgamǃgamsen hâna ǁnâu tsî ǃgâiaǂgao re.
3 Tita ǀkha ǃKhūba kaikai re
a da ǀhû hâse ǁîba ǀgapiǀgapi.
4 ǃKhūba ta ge ge ôa tsîb ge ǁîba ge ǃeream te;
tsîb ge hoaraga ǃaob tiba xu ge ore te.
5 ǁÎb ra kō khoen ge ra ǀkhâu-aihe
tsî di ge aidi âna tātsē tao tama hâ.
6 Nē ǀkhomǀkhomsab ge ǂgai, tsîb ge ǃKhūba ǁnâu-am bi;
tsî ǁîba hoa ǃgomsina xu ge ǃnoraǃnora.
7 ǃKhūb di ǀhomǃgāb ge ǁnān ǁîba ra ǃaoǃgâna hâǂnami;
tsî ǁîna ra ore.
8 Tsâtsâ î mû ǃKhūb a ǃgâi ǃkhaisa!
ǀKhaeheb ge hâ ǁnā khoeb ǁîb ai ra ǂgomaiǂnûiba.
9 ǃKhūba ǃao re, sadu ǃanudo!
ǁNān ǁîba ra ǃaoǃgân ǃnubusi-i xare-e ūhâ tama xui-ao.
10 ǂKham xamn ge ǂhâba tsî raǃâ;
xawe ǁnān ǃKhūba ra ôan ge xū-i xare-e ǂhaba tide.
11 Hā re ǀgôado, tita ǃgâ re;
tita ge ǃKhūba di ǃaosa nî ǁkhāǁkhā.
12 Tari-e hâ ûiba ra tura-i;
ǃgâi tsēde ra mûǃnâ ǂgao-e? -
13 Sa amsa ǂkhababa xu ū-oa
tsî sa amǁgaukha ǂhumiba gowasa xu.
14 ǂKhababa xu bē, î ǃgâise dī;
ǂkhîba ôa, î ǁîba sauruǃgon.
15 ǃKhūb di mûra ge ǂhanu-ai khoen ai hâ;
Tsî ǂgaera âba ǁîn di ǃgaes ǃoa.
16 ǃKhūb di ais ge ǂkhabadī-aon ǃoagu hâ
ǁîn xa ǃhūbaib ai hâ ǂâiǂâisensab nî ǀariǂuise.
17 ǂHanu-ain ga ǃgae ob ge ǃKhūba ra ǁnâu
tsî ǁîna ǂhansendi âna xu ra ǃnoraǃnora.
18 ǃKhūb ge ǁnān ǂgaogu ân khôaǂkhūsan ǀgūse hâ;
tsîb ge gagadi ân ǂkhū hâna ra ore.
19 ǂHanu-ai khoen di tsûgu ge a ǂgui
xaweb ge ǃKhūba ǁîna hoana xu ra ǃnoraǃnora;
20 ǁîn di hoaraga ǂkhōnab ge ǃKhūba ra sâu
tsî i ge ǀgui-i xare-e khôa tama hâ.
21 ǂKhabab ge eloxoresa-e nî ǃgam;
tsî ǁnān hîa ǂhanu-ai-e ǁkhan hân ge nî ǁkharahe.
22 ǃKhūb ge ǁîb ǃgān di ûiga ra ore;
tsîn ge ǁîb ǃoa ra ǁhaiǁhâna ǀgoraǃgâhe tide.
© Khoekhoegowab Elobmîs © Bible Society in Namibia, 2020.
