ǀHapio khoe-i di ǀgores
Davidi ǀgores
1 ǁNâu te re ǃKhūtse
ǂhanu-aisib ǃgaes di ās dis ai ǃgaoǃgâ re,
î ǁnâu re ti ǂhauǃnâ ǀgoresa.
2 Ti ǃgâib ǃoats ge satsa nî ǀgoraǃgâ
tare-i a ǂhanu ǃkhaisats a ǂan amaga.
3 Ti ǂgaobats ge ge ǃâitsâ.
Tsuxub ǃnâts ge tita ge sari
tsîts ge ǃâitsâ te
tsî tsū tura-i xare-e tita tawa hō tama hâ.
4 Nau khoen di dīxūn ai ta xū-e mî tama
xawe ta ge sa sats ge mîmāna nî dīse
nē ǂkhaba khoen di daob ai ǃgûsa xu ge ū-oasen.
5 Mâ dāǃharos tis hoas ge sats ge ǁgau daob ai ge hâ i
tsî ta ge ǁnāpa xū ǁgôa tama ge i.
6 Elotse sa ǃoa ta ge ra ǀgore
ǁnâu-am tets ra amaga.
Sa ǂgaesa tiǀî ǂō,
î ti mîde ǁnâu re.
7 Sa hâhâ ra ǀnamma ǁgau, î sâu te re,
sa ǀgūse hâs ǃnâ ta khākhoena xu a ǃnorasa xuige.
8 Sa ǂhunuma mûrats ga ǃûi hâs ǁkhās khami ǃûi te re;
î sa ǁgabogu di sommi ǃnâ gaugau te
9 ǂkhaba khoen di ǁnāǂamde xu.
10 ǁÎn ge ǀkhomxaǃnâsi-e ūhâ tama hâ
tsî ǀgapiǂâixase ra ǃhoa.
11 ǁÎn ge nēsi tita dabasen ta ka ǀkhāb hoab ai xāǂgā hâ
tsî titan nî ǂgaeǁnâ ǃkhais di ǃēs ǀguisa ǃâu hâ.
12 ǁÎn ge xamn, titan nî ǀkhauǃā
ǃkhaisa ǂgao hân khami ī.
13 Khâi re ǃKhūtse! Ti khākhoena mâǃoa î ǁîna ǂnauǁgui re.
ǂKhabadī-aona xu gôab âts ǀkha ore te re.
14 ǃKhūtse sa ǃommi ǀkha ǁnān, nē ûib ǃnâ ǂhâban hâ xūn hoana ūhâna xu ore te re.
ǁÎn di ǃnāba ǂkhabasib ǀkha ǁâǁâ, ǁnās a ǁîn di harebe nē ǃhūbaib ai xuige;
tsîn ge ǁîna ôasan âna ǃnāǂamsasib ǃnâ nî ǁnāxūba,
tsîn ge ǁnurisan tsîna nēsa nî ǀama.
15 Xawe ta ge tita ǂhanu-aisib ǃnâ satsa nî mû
tsî ta ge ǂkhai ta kao sa ǀgūhâsib ǃnâ nî ǃgâiaǂgao.
© Khoekhoegowab Elobmîs © Bible Society in Namibia, 2020.
