Elob, ǀguise hâ Hui-aob ǃoa hâ kares
1 Koa re ǃKhūba!
Koa re ǃKhūba ti ǀomse.
2 Ûi ta hâs kōse ta ge ǃKhūba nî koa;
hâ ta as kōse ta ge Eloba nî koaǁnaeba.
3 Tā gaosan ai ǂgomaiǂnûi, khoen ôab ai,
ǃgâiǃōsi-i xare-i ǁîb tawa a ǀkhaiba.
4 ǀOms âna ǂoa tsîn ge ǃhūb ǃoa ra oa,
ǁnā tsēs ai di ge ǁîn ǀapede ra toa.
5 ǀKhaehe i ge hâ ǁnā khoe-i Jakob Eloba ǁî-i di huise ūhâ-e;
ǃâubasens â-i ǃKhūb, ǁî-i Elob ai hâ-e.
6 ǀHommi tsî ǃhūbaib,
hurib tsî ǁîb ǃnâ hân hoana ge kurub;
ǀamose a ǂgomǂgomsaba.
7 ǁGâiǀāhe hân di ǂhanuba ra sîsenni;
ǃâ hâna ra ǂûmāba.
ǃKhūb ge ǃkhōsana ra ǃnoraǃnora
8 ǃKhūb ge ǂgī hân mûde ra ǁkhowa-am
ǃKhūb ge ǃgamǃgamsana ra ūkhâi;
ǃKhūb ge ǂhanu-ai khoena a ǀnam.
9 ǃKhūb ge ǃhaokhoena ra sâu,
ǃguniǀgôan tsî ǃoataradeb ge ra huikhâi
xaweb ge eloxoresan di daoba ra gama kai.
10 ǃKhūb ge ǀamose nî gaosîsen
Sionse, sa Elob ge ǃhaosa xu ǃhaos kōse nî gaosîsen.
Koa re ǃKhūba!
© Khoekhoegowab Elobmîs © Bible Society in Namibia, 2020.
