Elob ge hoa xūna ǂan
ǁNaeǃnans ǂgaeǂgui-aob ǃoa
Davidi Psalms
1 ǃKhūtse sats ge ge ôaǃnâǃganu te tsî a ǂan te.
2 Sats ge ti ǂnûs tsî khâisa a ǂan;
ti ǂâidets ge ǃnūseba xu ra ǁnâuǃā.
3 Ti ǃgûs tsî ti ǁgoesats ge satsa ra ôaǃnâ
tsîts ge ti daogu hoaga ǃgâise a ǂan.
4 Mî-i ganupe ti nams ai ǀkhai
hîats ge satsa ǀnai a ǂan ǃKhūtse.
5 Sats ge ǃgâbǀkhāba xu tsî aisǀkhāba xu ra ǃnamiǂgā te
tsîts ge sa ǃomma tita ai ra ǁgui.
6 Nē ǂans ge kaise buruxaba te
ǀgapiba te a tsî ta sīǃnâ ǁoa.
7 Mâǀî ta kha sa gagaba xu nî ǃgû?
Mâǀî ta kha nî ǁhâ, sa aisa xu?
8 ǀHommi ǃoa ta ga ǃapa, ots ǁnāpa hâ
ǁŌhân Hâǃkhaibǀî ta ga ǁgôa, ots ǁnāpas tsîna hâ!
9 ǁGoaǂnobos di ǁgabokha ta ga ū
tsî huribǀams ai sī ǁan;
10 ob sa ǃomma ǁnāpas tsîna nî ǂgaeǂgui te;
sa amǀkhāb ǃomma nî ǃkhōǀgara te.
11 Tsî ta ga tita mî:
ǃKhaenab ga ǃgū-ai te
tsîb ga ǃnâba ti ǂnamipe tsuxu kai
12 xaweb ge ǃkhaenab tsîna satsa kaise ǃkhaeba tama hâ
tsîb ga tsuxuba tsēab khami ǃnâ
xaweb ge ǃkhaenaba ǃnâb khami ra ī.
13 Sats ge ti ǃnaira ge kurutsa;
sats ge ti îs di ǁhās ǃnâ tita ge ǂnubi.
14 Koa tsî ta ge ra,
ama buruxase ta kuruhe hâ amaga.
Buruxa gu ge a sa sîsenga;
ǁî ǃkhaisa ta ge ǃgâise a ǂan.
15 Ti ǂkhōn ge satsa ge ǂganǃgâsaba tama hâ i
ǂganǃgâsib ǃnâ ta ge kuruheo;
ǃhūbaib di ǃgamsib ǃnâ ta ge ǂnubiheo.
16 Ganupe ta kuruhe tama hîa ra ge sa mûra ge mû te,
tsîn ge hoana sa ǂkhanis ǃnâ a xoamâisa;
tsēdi hîa nî hāde, ǀguis xawes âdi a ǀkhai hîa.
17 Tsî tita ǃaromasa mâtikōse di a ǃgom sa ǂâide ti Elotse
Mâtikōseb a kai ǁîdi ǃgôaba!
18 ǃGôatsâ ta ka, xawe di ge ǁîde ǃhūb ǃgâ-ai nî ǃnāsa.
ǂKhai ta ka, o ta ge noxopa sats ǀkha hâ.
19 Sats ga eloxoresana ǃgamo, Elotse
sago ǀaob digo, ǂgōxū te re
20 ǁÎn ge gāxaǃnâ xūna sats xa ra ǃhoana
sa khākhoen, sa ǀonsa ǁause ra sîsenūna.
21 O ta kha ǁkhān tide ǃKhūtse, ǁnān satsa ra ǁkhanna?
ǁNān sa ǃoagu ra khâimâna ta kha mâǃoa tide?
22 Tita ge ǁîna ǀoasa ǁkhanni ǀkha ra ǁkhan,
khākhoen ase ta ge ǁîn xa ībahe.
23 Ôaǃnâǃganu te re ǃKhūtse, î ti ǂgaoba ǂan re!
ǃÂitsâ te re î ti sâoǃnâ ǂâide ǂan re,
24 î mû re ise i tsū dao-e tita tawa hâsa,
î ǀamo daob ai ǂgaeǂgui te re.
© Khoekhoegowab Elobmîs © Bible Society in Namibia, 2020.
