ǃKhūb di ǃgâisib ǁaes âb ǃoa
1 Haleluja!
Koa re ǃKhūba ǁîb di ǃgâisib ǃaroma
ǁÎb di hâhâ ra ǀnammi ge ǀamose hâ.
2 Tari-e kha ǀgaisa dīgu ǃKhūb diga a mîǂui ǁkhā,
tsî ǁîb koasa a ǂanǂan ǁkhā?
3 ǀKhaehen ge hâ ǁnān ǂhanuba ra ǁnâuǀnamna
ǁnān hoaǁae ǂhanu-aisiba ra dīna.
4 ǂÂi re tita xa ǃKhūtse, sa ǁaesats ga ǀkhomxa ǁaeb ai
sa ǃgâiǃōsib ǀkha sari te re.
5 Î ta sa ǁhûiǂuisaben ǀkha,
ǃgâi xūn ǁînats ūba hân ǃnâ ǁhao
sa ǁaes di ǃgâiaǂgaob ǃnâ ǃâ
tsî ta ǁîn ǀkha sa ǀumisa nî koasense.
6 Sida aboxan ǀkha da ge ǀguipa ge ǁore,
sida ge ǂkhabase ge dī.
7 Sida aboxan ge Egipteb ǃnâ
ǂâisa sa ǀgaisa sîsengu ai ge ǂnûi tama hâ i.
Tsîn ge sa hâhâ ra ǀnamma ǂâihō tama i
tsî hurib tawa, ǂĀxahurib tawa ge khâikhâisen.
8 Xaweb ge ǁîna ǀons âb di ǃgôasib ǃaroma ge sâu;
ǁîb ǁkhāsibab nî ǂan kaise.
9 ǂĀxahuribab ge ǀau ob ge ge ǂnâ;
ǁîb ge ǁîna ǃgaroǃhūb ǃnâs khami, ǁgamgu ǁaegu ge ǃgû kai.
10 ǁÎb ge ǁîna khākhoen di ǃomma xu ore
tsî mâǃoasaben ân di ǃomma xu ge ǃnoraǃnora.
11 ǁGammi ge ǁîn mâǃoasabena ge ǃgū-ai,
tsî-i ge ǀgui-i ân tsîna ûiǂoa tama ge i.
12 On ge mîmâidi âba ǂgom
tsî ǁîba ge koaǁnaeba.
13 Xawen ge ǃhaese ǁîb dīga ǀuru
tsî ores di ǀapes ǁîb disa ǃâu tama ge i.
14 ǁÎn turagu xan ge ǃgaroǃhūb ǃnâ gaoǂamhe
tsî Eloba ǃgaroǃhūb ǃnâ gere ǁgoaǂui.
15 ǁÎb ge ǁîna ǂgann ge xūna ge mā,
xaweb ge ǁîn ǃnâ ǂhīǁōba ge sîǂgā.
16 Moseb ǃoagun ge surib ǀkha ge khâi
tsî Aronni, ǃKhūb xa ge khaihe hâ ib ǃoagu.
17 ǃHūb ge ǁkhowa-amsen tsî Datanna ge haraǂgā,
Abirammi ǀkha hâgu ǂamab ge ge ǂganamsen.
18 ǁÎgu ǁaegus ge ǀaesa ge khau
ǀaeǁhabugu ge eloxoresa khoena ge khauǃkhū.
19 Horeb tawan ge ǁîna tsâuba ge kuru,
ǁîn ge ǁgôa-elob aiǃâ ǀgoreǀî nîse ge ǃhon.
20 ǁÎn ge ǁîb ǂKhaisiba ge ǃkhōǃkhuni
gomab, ǀgâna ra ǃûb di īb ǀkha.
21 ǁÎn ge Elob ǁîna ge ǃnora kaiba ge ǀuru,
ǁnāb hîa kai xūna Egipteb ǃnâ ge dība.
22 Buruxa xūna Xammi di ǃhūb ǃnâ ge dīb
ǃaoǃaosa sîsenga, ǂĀxahurib tawa.
23 ǁÎb ǃnâb ge ǁîna hîkākāsa gere ǂâi
Moseb, ǁîb di ǁhûiǂuisabeb ga ǁîna ǃhoaba tama i,
tsî ǁnāti ǁîb di hîkākā ra ǁaixasiba ǂkhā bi tama i hâo.
24 ǁÎn ge ǃgomǀgausa ǃhūba ge ǂhara
tsîn ge mîs âba ǂgom tama ge i.
25 ǁÎn tentomdi ǃnân ge gere ǁaixa,
tsîn ge ǃKhūb domma ǁnâuǀnam tama ge i.
26 ǁÎb ge ǃommi âba ǁîn ǃoagu ge ūkhâi
ǁînab ǃgaroǃhūb ǃnâ nî ǂnauǁguise;
27 ǁîn di suriba ǁaedi ǃnâ ǂnauǁgui
tsîb ǁîna ǃhūgu ǃnâ nî ǀgaruǀgaruse.
28 ǁÎn ge ǁkhāti Baal-Peori ǀkha ge ǃgaeǁaresen
tsî ǁō hân ra ǁguibahena gere ǂû.
29 ǁÎn tanisens ǀkhan ge ǁîba gere ǁgoaǂui
tsîs ge tsûtsû-aisa ǁîn ai ge hāǂam.
30 Pinehab ge ǁaegumâ-aose ge khâi
tsîs ge tsûtsû-aisa ge ǁkhaehe.
31 Nēs ge ǁîba ǂhanu-ai dīǃkhais ase ge ǃgôabahe
ǃhaosa xu ǃhaos kōse, ǀamose.
32 Meribas ǁgamgu tawan ge ǁîba ge ǁaiǁai
tsî i ge ǁîn xa ǃaromahe hâse ǃgâi tamase Moseb ǀkha ge hā.
33 ǁÎn ge Elob Gagab ǃoagu khâi
on ge tsū mîna Moseb amǁgaukha ai ge hā.
34 ǁÎn ge Elob ge ǁîna ǁgau ǁaede
ǁîb ge mîmā khami sauruǂui tama ge i.
35 ǁÎn ge ǃhaodi ǀkha habagu
tsî ǁîn ǁnaetiga ge ǁkhāǁkhāsen.
36 ǁÎn ge ǁîn di ǁgôa-eloga gere ǃoaba
tsîs ge ǁnāsa ǁîna ge ǁnoa kaiba.
37 ǁÎn di ǀgôagu tsî ǀgôadi
tsînan ge ǁgâuaga ge ǁguiba.
38 Tsîn ge ǁnā ǀgaus ai ǀhapio ǀaoba ge ǂnâxū,
ǁîn ǀgôagu tsî ǀgôadi di ǀaob,
Kanaanni di ǁgôa-elogan ge ǁguibaba.
Tsîb ge ǃhūba ǀaoǀhapis xa ge ǀuriǀurihe.
39 ǁÎn ge ǁnā ǁnaetigu xa ge ǃanuoǃnâ,
dīgu ân ǀkhan ge ge ǃgamekhôa.
40 ǃKhūb di ǁaib ge ǁaes âb ǃoagu ge ǂhubi;
ǀumis âba ǃharaxū
41 tsîb ge ǁîna ǁaedi ǃomǁae ge māǁnâ;
khākhoen âna ǁîn ǂama gaosîsen
42 tsîn mâǃoasaben âna ǁîna gere ǁgâiǀāse;
ǁîn aiǃân nî ǃhonse.
43 ǂGui ǃnādeb ge ǃKhūba ǁîna ge huiǂui
xawen ge ǂans ǃnâ mâǃoaxa
tsî ǃûǂams ân ǃnâ ge tsō.
44 Xaweb ge ǁîn ǂhâsiba ge mû,
ǁîn ǃgaesab ge ǁnâuo.
45 ǁÎn ǃaromab ge ǃgaeǀhaos âb xa ge ǂâi
tsîb ge ǁîna ge ǀkhom, ǁîb di ǃnāǂamsa hâhâ ra ǀnamma xu.
46 ǁÎb ge ǁnān hîa ǁîna ǃkhōsis ǃnâ ge ūn
xan nî ǀkhomhese ge dī.
47 Ore da re ǃKhūtse, sida Elotse
î ǁaede xu ǀhaoǀhao da re.
Sa ǃanu ǀonsa da nî koa
tsî satsa koas xa ǃgâiaǂgaose.
48 ǃKhūb Israeli Elob diba
ab koahe re ǀamosiba xu ǀamosib kōse.
Hoaraga ǁaesa as mî re:
“Amen! Koa re ǃKhūba!”
© Khoekhoegowab Elobmîs © Bible Society in Namibia, 2020.
