Elob di ǀnammi
Davidi ǁnaetsanas
1 ǃKhūba koa re ti ǀomse
an ti ǃnâ hân hoana kare,
ǁîb ǃanu ǀonsa.
2 ǃKhūba koa re ti ǀomse,
î ǃgâidīgu âb xawega tā ǀuru re.
3 Sa dīsān hoana ra ǀûba tsib,
sa ǀaesengu hoaga ra ǂuruǂuruba.
4 Sa ûiba āba xu ra ǃnoraǃnorab,
hâhâ ra ǀnammi tsî tsâbaǁhaoxasib ǀkha ra ǀgapa tsiba;
5 ǃgâin ǀkha ra ǁâǁâ tsib,
sa ǂkhamsisa ǃariǃkhās dis khami ra ǀasaǀasaba.
6 ǃKhūb ge ǂhanub tsî ǂhanu-aisiba ra dība,
ǁnān ǁgâiǀāhe ran hoana.
7 Daogu âbab ge Moseba ge ǂanǂan,
Israeli khoena, dīgu âba.
8 ǀKhomxaǂgao tsî ǀkhomxab ge ǃKhūba,
ǃnūǃnâxa tsî hâhâ ra ǀnammi xa ǀoa hâba.
9 ǁÎb ge ǀamose ǃgabe tide,
tsî ǁaixahâhâ tide.
10 Sida ǁoren ǃoa tamas ge sida ǀkhab ge dīsa,
tsî ǃûǂamdi ǃoa tamas ge mādawa-am dab gesa.
11 ǀHommi ǃhūbaiba xu a ǀgapis ǁkhās khami
ǁnātikōseb ge hâhâ ra ǀnammi âba ǁîba ra ǃaoǃgân ǃoagu a ǀgaisa.
12 Aiǂoas huriǂoasa xu ǃnūs ǁkhās khamib
ge ǁîba ǁoren âda sada xu ǃnūse ra ūbē.
13 ǁGûb ra ôasana ǀkhoms ǁkhās khamib
ge ǃKhūba ǁnān ǁîba ra ǃaoǃgâna ra ǀkhomxa.
14 ǁÎb ge mâ kuruǃnôada asa a ǂan,
tsaras ǀguisa da ī ǃkhaisab ge ǂâis ǃnâ ūhâ.
15 Khoe-i ûib ge ǀgâb khami ī;
ǃgarob di ǃkhā-i khami.
16 ǂOab ga ǁî-i ai ǃgom, o ǃaruǀî hâ tama-e
tsîb ǃkhaib â-e ǁî-e mûǂan tama hâ.
17 Xawe hâhâ ra ǀnammi ǃKhūb dib ge ǀamosiba xu ǀamosib kōse
ǁnān ǁîba ra ǃaoǃgân ǂama ra hâ,
tsî ǂhanu-aisib âba ǀgôan ôan kōse.
18 ǁNān ǁîb ǃgaeǀhaosa ǃkhōǀgaipe
tsî ǁîb ǁguiǂamde ra dīǀoaǀoan ǂama.
19 ǃKhūb ge trons âba ǀhommi ǃnâ ge ǂnubi
tsîb ge gaosib âba hoa xūn ǂamai ra gaosîsen.
20 ǃKhūba koa re ǁîb ǀhomǃgādu hoado;
sa ǀgaisa du, ǁîb ǂâisa ra dī,
tsî mîmādi âba ǁnâuǀnamdo.
21 ǃKhūba koa re ǁîb di ǂnubiso hoaso;
ǁîb ǃgādu, sîsenni âba ra dīdo.
22 ǃKhūba koa re ǁîb di sîsendu hoado
ǁîb gao hâ ǃkhaidi hoadi ǃnâ.
ǃKhūba koa re ti ǀomse.
© Khoekhoegowab Elobmîs © Bible Society in Namibia, 2020.
