1 Soreb ǃnâs tsamarosa hâ ǁoas tamas ka iob ǀnanuba ǃgaoǁaeb ai hā ǁoas,
ǁkhās khami-i ge gâre khoe-e ǃgôasiba anu tama hâ.
2 ǃAroma-e ūhâ tama ǀâxareb ge hâǃkhai-e ūhâ tama ǀui-aniro-i
tamas ka io swabel-i hîa hâǃkhaiose ǁkhanamas ǀguisa ra hî-î khami ī.
3 ǃNabab ge hāb ǃaroma hâ, toms ge dâukib ǃaroma hâ
tsî ǂnau-ū haiba gâre khoe-i ǁâb ǃaroma.
4 Tā gâre khoe-e gârese ǃeream,
tamas ka iots ge sats tsîna nî gâre.
5 Gâre khoe-e ǁî-i gâresib ǃoa ǃeream,
ǁnā tamas ka io i ge ǁî-e gā-ai i a ti nî ǂâi.
6 Gâre khoe-e ǂhôa-e sī māǁnâ kais ge aitsama ǂais ǃnâ ǂnoasens,
tamas ka io aitsama ǂkhôasens khami ī.
7 ǃHom khoe-i di ǀnūkha ra ǀharas ǁkhās khamis
ge gâre khoe-i amsa xu ra ǂoaxa ǂkhoamîsa ī.
8 Gâre khoe-e koas ge
slengers ǃnâ ǀuisa ǂgās khami ī.
9 Gâre khoe-i amsa xu ra ǂoaxa ǂkhoamîs,
ge ǀhoro hâ khoe-e ǁî-i ǃoms ǃnâ mâ ǁkhūba ūǂuis khami ī.
10 Gâre khoe-i tamas ka io ǃkharugaru khoe-e sîsen kais,
ge khāǁkhâu-ao-i ǁae tamase mâ khoe-i hoa-e ra ǁkhâu-i khami ī.
11 Ari-i ǁî-i ǀkhûiba ǁkhawa sī ra hapu-i khami,
i ge gâre khoe-e ǁî-i ǂû-i di gâresiba ra ǁgaeǃgâ.
12 Aitsama gā-aise ra ǃgôasen khoe-e mûts ge?
Gâre khoe-i ge ǃnāsa ǃâubasensa ǁî-i ǃgâ-ai ūhâ.
13 ǀOpesa khoe-i ge ra mî: “Xammi ge ǁnāpa daob ǃnâ hâ!
Xammi ge ǁnāpa ǃganni ǃnâ hâ!”
14 ǀOpesa khoe-i ge ǁî-i kharob ǃnâ ǁgoe ra dabasen,
daos ra ǁîs di skarnirdi ai ǁkhowa-am ka ǂganamsen khami.
15 ǀOpesa khoe-i ge ǃomma ǃores ǃnâ ra ǂgā;
xawe ǁîba ams â-i tawa hā-ūsa ǀopesaba.
16 ǀOpesa khoe-i ge ǁî-i ǂû-i mûǂgās ǃoa a gā-ai,
hû khoen ǂuru ǁnâuǃāb ǀkha ra ǃereamn xa.
17 ǁÎ-i di tama go hâ i ǂkhabab ǃnâ ra ǂgobesen khoe-i,
ge ǁaixa ari-e ǂgaera ai ra ǃkhō khoe-i khami ī.
18 ǃKhau hâ khoe-i ǁae tamase ǃapus tamas ka io ǁōǁōsa ǂāga ra ǂnoa-i,
19 khami i ge ǁî-i ǀgūkhoe-e ǀhôagaoǃnâ tsî:
“Gās ǀguisa ta goro hî,” ti ra mî khoe-e ī.
20 ǀAen ga toa, os ge ǀaesa ǃaruǀî khau ǁoa,
tsî ǀhoe-ao-i ga ǀkhai, ob ge ǂkhabab tsîna ra toa.
21 ǂNomdi ra ǀgam tsî ǁhabuba ǃaroma tsî ǀaena ǀaesa khau kai,
khami i ge ǂkhabaxa khoe-e ǂkhababa ra ǃaroma.
22 ǀHoe-ao-i mîdi ge ǁkhoaxa ǂû-i hoaraga soros
khoe-i dis ǃnâ ra ǂgâ-i khami a ǁkhoaxa.
23 ǂKhanu namsa ūhâ ǂkhaba ǂgao khoe-i,
ge ǂnū sūs xlaǂganaisa ūhâs khami ī.
24 ǁKhanao-i ge ǀgamnamxase ra ǃhoa,
ǁî-i ǂgaob ǀhôagaosib xa ǀoa hâ hîa;
25 ǀkhomxase i ga ǃhoa, xawe ǁî-e tā ǂgom;
ǁî-i ǃnân hû ui-uisa xūna hâ xui-ao.
26 ǁÎ-i di ǁkhanni ga ǂhumib ǀkha ǃgūǃgâhe,
xawe ǁî-i ǂkhabasib ge ǀhûhâsib ǃnâ nî ǂhaiǂhaihe.
27 Nau khoe-ets ga āba khaoba, ots ge ǁkhā āb ǃnâ nî ǁnāǂgâ;
ǃgupu ǀuisa ga gari khoe-i ǃoas ge ǁkhā ǀuisa nî ǃkhoe-oa.
28 ǂHumixa nams ge ǂkhôas ra khoe-e ǃhuisa
tsî ǂkhanu namsa ūhâ khoe-i ge ǂkhôaba ra dī.
© Khoekhoegowab Elobmîs © Bible Society in Namibia, 2020.
