1 ǃGâi ǀonsa hōbasens ge kai ǃkhūsib xa a ǃgâi tsî ganganxasib ge ǀhaiǀurib tsî ǃhuniǀurib tsîkha xa a ǃgâi.
2 ǃKhū hân tsî ǀgâsan ge a ǀgui; ǃKhūb ge ǁîn hoana ge kuru.
3 ǁNâuǃāxa khoe-i ge ǂōǂōsiba mû tsî ǁnāpa xu ra ūbēsen; xawe ǁnâuǃāoǃnâ khoe-i ge ǂōǂōsib ǃnâ ǃgûǂgâ tsî ra tsūǃgâ.
4 ǃGamǃgamsens tsî ǃKhūba ǃaoǃgâs tsîra di mādawa-ams ge ǃkhūsib, ǃgôasib tsî ûib tsîga.
5 ǂKhabadī-ao-i daob ain ge ǁkhūn tsî ǃnuidi tsîna hâ; xawe aitsama ra ǃûisen khoe-i ge ǁîna xu ǃnūse ra hâ.
6 ǀGôana ǁîn ǂkhamsisa xu ǂhanu daob ai ǁkhāǁkhā o i ge kaira i ka, xawe ǁîba xu ǁnāǁgôa tide.
7 ǃKhū hâ khoen ge ǀgâsa khoena ra gaoǂam, tsî ǀkhupi-ao-i ge ǀkhupiǂui-ao-i di khobo.
8 ǂHanuoǃnâsiba ga tsoro khoe-i ge ǂōǂōsiba nî ǃgaobasen tsî ǁî-i ra ǂnau-ū haib ge ǁî-i di ǁnāsa nî ǃaroma.
9 Māǂgaoxa khoe-i ge ra ǀkhaehe, ǁî-i pereba i ǀgâsa khoen ǀkha ra ǀgoragu xui-ao.
10 ǃHō-ao-ets ga saurubē, ob ge ǂkhababa ra toa, tsîkha ge ǂkhabab tsî mîǁgaiǁgaigus tsîkha ra ǀam.
11 ǃAnu ǂgaoba ūhâ tsî ǀkhomxaǂgaose ra ǃhoa khoe-i ge gao-aoba ǀhōsase nî ūhâ.
12 ǃKhūb ge amaba ra ǃkhōǀgaipe, xaweb ge ǂhumiǃnâ khoe-i mîde ra dabaǃkhuni.
13 ǀOpesa khoe-i ge: “Xammi ge ǃauga hâ, tsî ta ge ǃgangu ǃnâ nî ǃgamhe” ti ra mî.
14 ǀAi-aos di nammi ge ǃgam āb khami ī; ǃKhūb xa ǁaixaǂamhe hâ khoe-i ge ǁîb ǃnâ nî ǁnāǂgâ.
15 ǀGôa-i ge ǁnaetisase gâre xūna ra dī, xawe ǃnabas ǀguis ge ǁî-e ǁnāpa xu nî ūǂui.
16 ǀGâsa khoena ra ǁgâiǀā khoe-i, ǀguri-i nî ǃkhūse tsî ǃkhū hâ khoen ǀguina xūna ra mā khoe-i, hoa ǀgam khoen ge ǀgâsib ǀkha ǀgui ra ǀamǂoa.
ǃNonadisi gā-ai mîǀgaugu
17 Sa ǂgaesa ǂgō, î gā-ain di mîde ǃgâise ǃgâ tsî sa ǂâisa ti ǁkhāǁkhās ai ǃammâi. 18 ǁÎde sa ǂgaob ǃnâ ǃkhōǀgaipes ge a ǃgâi, ots ge ǁîde hoaǁae sa amǁgaukha ai nî ūhâ. 19 Sa ǂgomǃgâbats ǃKhūb ǃnâ nî ūhâga ta ge ǁîde satsa nētsē go ǂanǂan. 20 ǃNonadisi mîǀgauga ta ge satsa ge xoaba; ǃgâi ǀapemādi tsî ǂans tsîn xa ǀoa hâga. 21 ǁÎgu ge tare-i a ama tsî ǂhauǃnâsa nî ǁgau tsi, îts satsa ra sî khoe-e ǂhanu ǃereamde mā ǁkhā.
ǂGuro mîǀgaub
22 Tā ǀgâsa khoe-e ǀgâsa-i a ǃkhais ǃaroma ǁgūǀhana tsî tā ǂkhabusa khoe-e ǀgoraǃgâǃkhaib tawa ǁgâiǀā. 23 ǃKhūb ge ǁî-e nî ǂnoaba tsî ǁî-e ra ǁgūǀhana khoena nî ǁgūǀhana.
ǀGamǁî mîǀgaub
24 Tā ǁaixasib ǀhonkhoeb ǀkha ǁaeǁaesen, î tā kaise kai ǁaixasiba ūhâ-i ǀkha ǃgûǀhao, 25 ǁî-i daoga ǁkhāǁkhāsen tsîts ǃnuis ǃnâ ǂgāsen tidese.
ǃNonaǁî mîǀgaub
26 Tā ǃhaese xū-e māsa mîmâi tamas ka io ǃhaese ǀnî khoe-i surudeb ǃaroma mâiǁkhae marisa mîmâi. 27 Matare-ūts nî xū-ets ga ūhâ tama i, ob ge ǁgoe-aits hâ kharob tsîna nî ūhe.
Hakaǁî mîǀgaub
28 Tā ǃhūǀgoras di saos sadu aboxagu ge mâisa ūbē.
Koroǁî mîǀgaub
29 ǁÎn di sîsengu ǃnâ ǂansa ūhâ khoena mûts ra? ǁÎn ge gao-aoga nî ǃoaba; ǁîn ge ǁau khoena sîsenba tide.
© Khoekhoegowab Elobmîs © Bible Society in Namibia, 2020.
