1 ǀGuri ra ūǂuisen khoe-i ge ǁî-i turab ǀguiba ra sao, ǁî-i ge gā-ai ǀapedi hoade ra mâǃoa.
2 Gâre khoe-i ge xū-e ǁnâuǃā i ǀkha ǁae tama, xawe gā-ai i a ti ǂâi tsî ǂgao-i ran ǀguina ra ǃhoa.
3 Eloxoresasib hâbab ge ǃharaxūb tsîna hâ; ǃgôaoǃnâsib hâbab ge mîǁgaiǁgaigub tsîna hâ.
4 Khoe-i ams di mîdi ge ǃgam ǁgammi khami ī; gā-aisib ǀaus ge dâu ra ǃāb khami ī.
5 ǀHapixa khoe-e ǀkhāǁhûibas ge a tsū, tamas ka io ǀhapio khoe-e ǁî-i ǂhanu-aisiba ǀhanasa.
6 Gâre khoe-i amǁgaukha ge ǂkhababa ra ǃkhāǃnâ, ǁî-i ams ge ǃkhamsa ra ǃaroma.
7 Gâre khoe-i ams ge ǁî-i ǁnāsa ra ǃaroma, ǁî-i amǁgaukha ge ǁî-i ǂû-e ra ǂhao.
8 ǀHoe-ao-i mîdi ge ǁkhoaxa ǂû-i hoaraga soros khoe-i dis ǃnâ ra ǂgâ-i khami a ǁkhoaxa.
9 Sîsenni â-i ǃnâ a ǀopesa khoe-i ge aitsama ra dītoasen.
10 ǃKhūb di ǀons ge ǀgaisa ǂgō-ommi khami ī; ǂhanu-ai khoen ge ǁnāǀî ra ǁhaiǁhâ tsî ra sâuhe.
11 ǃKhūsib ge ǃkhū hâ khoen ǁhaiǁhâǃkhai, ǁîn ge ǀgapi ǂnubiǂgoagu xan ǁkhaubahe hâ ti ra ǂâi.
12 ǁÎǁâsens ge khoe-i ǂû-i di hîkākā, xawe ǃgamǃgamsens ge ǃgôasiba ra aiǃgûba.
13 Khoe-i ga aibe ǃgâ tamase ǃereamsa mā, os ge ǁnāsa ǁî-i gâresib tsî taosib ǀguiba ra ǁgauǂui.
14 Khoesi gagas ge khoe-e ǀaesenni ǃnâ ra taniǃkharu, xawe tari-e ǀaesen hâ gagasa nî ǂgauǂgau?
15 ǁNâuǃāxa khoe-i ge ǂansa hōs ǃaroma ra ǁkhāǁkhāsen, gā-ai khoe-i ge ǂansa ra ôa.
16 Māǂgaoxa khoe-i mādi ge daoba ra ǁkhowa-amba, nēs ǀkha i ge ǁî-e ǀgapi ǃharodi ǃnâ hâ khoena ǀhao-ū ǁkhā.
17 ǂGurose ǁî-i ǁhōba ra aoǁgui khoe-i a ǂhanu khami i ge ra mûsen, ǁî-i di mâǃoa-ao-i hā tsî ǁî-e dîǃnâ tamas kōse.
18 ǀKhūǂnaus ge ǁnâusāgude ǀamǀam tsî ǁkhāsiba ūhâ khoekha ǁaegu hâ ǂkhababa ra ǀgoraǃgâ.
19 Tsûaǂgao kaihe hâ ǀaokhoe-e ǀhao-ūs ge ǀgaisa ǂnubiǂgoagu ǀkha omǂnamisa ǃās ǃnâ ǂgâs xa ǃgom; ǁnâusāgudi ge daoǁkhaegu ǀkha ǃnau-amhe hâ dao-amdi khami ī.
20 Sa ams di mîdi ǂûba xuts ge nî ǁâ; sa amǁgaukha mîdi ǃkhomma xuts ge nî ǃgâiǃgâ.
21 Nams ge ǁōb tsî ûib tsîkha ǂama ǀgaiba ūhâ tsî kaise ra ǃhoa khoe-i ge ǁî-i mîdi ǂûba nî ǂû.
22 Tarasa ra hō aob ge ǃgâi xū-e ra hō tsî ǃKhūb di ǃgâisiba ra ǃkhōǃoa.
23 ǀGâsa khoe-i ge ǃgamǃgamsens ǀkha ra ǀkhomma, xawe ǃkhū hâ khoe-i ge ǀkhoase ra ǃeream.
24 ǀNî ǀhōsa-i ge ǀhōsa-i khami ǀgui ra dīsen, xawe i ge ǀhōsa-e hâ sa ǃgâsa-i xa ǃnāsase sats tawa a ǀgū-e.
© Khoekhoegowab Elobmîs © Bible Society in Namibia, 2020.
