ǃGametaradi ǀumis
1 Omaridi danagu Makiri ôab Gileadi ǃhaoǃnās digu, tsî ǁnuriǀgôab Josefi ôab Manaseb hâgu ge Moseb tsî nau ǂgaeǂgui-aogu tawa ge sī. 2 ǁÎgu ge ge mî: “ǃKhūb ge sago ge mîmā, î go ǀkhūsa aos ǀkha ǃhūba Israelǁîn ǃnâ ǀgoraǂgā. ǁKhātib ge ǁîba sige ǀaokhoeb Selofehadi di ūhâxūna ǁîb di ôade mā ti ge mîmā go. 3 Xawe diga ǁîde ǀkhara ǃhaos khoega ǃgame, on ge ǁîdi ūhâxūna ra ǁnā ǃhaos di kai, tsîb ge sada di ūhâxūn di ǃgôaba nî ǀoroǀorohe. 4 Mā-oahes Kurib, ǁamaxūhe ge xūn hoan ǁîn di ǂhunuma ǀhonkhoena nî mā-oaǃnâheb ga hā, on ge Selofehadi ôadi ūhâxūna hoaragase ǃgameǃnâ di ge ǃhaos ai nî ǁkhaeǁnâhe, tsî sada ǃhaos di ǂoaǃnâs ase nî ī.”
5 ǁNā-amagab ge Moseba sao ra mîmās ǃKhūba xu hâsa Israelǁîna ge mā: “Manaseb ǃhaos ra mî xūn ge a ǂhanu, 6 ǁnā-amagab ge ǃKhūba ra mî, Selofehadi ôadi a ǃnorasasa, ǂgao di ra khoeb hoab ǀkha ǃgamesa, xawe di ge ǁîdi ǃhaos ǃnâ ǀgui nî ǃgame. 7 Mâ Israelǁî-i ūhâxūn hoan ge ǁî-i ǃhaos ǃnâ ǀgui nî hâ. 8 Mâ taras hoas hîa Israelǁî ǃhaos ǃnâ ūhâxūna ra ǀumis ge ǁnā ǃhaos di khoeb ǀguiba nî ǃgame. Nē ǀgaub ai ǀguin ge Israelǁîna ǁîn aboxagu di ūhâxūna a ǀumi ǁkhā, 9 tsî ǁnā ǀgaub ǀkhan ge ūhâxūna nē ǃhaosa xu nau ǃhaos ǃoa ǃkharu tide. Mâ ǃhaos Israelǁîn dis hoas ge ǁîs di ǃhūǃâsa nî ǃkhōǀgara.”
10-11 ǁNā-amaga di ge Selofehadi ôadi Maxlas, Tirsas, Hoglas, Milkas tsî Noas tsîde ǃKhūb ge Moseba mîmā khami dī tsî ǁîdi ǁnurisaga ge ǃgame. 12 ǁÎdi ge Josefi ôab Manaseb di ǃhaos ǃnâ ge ǃgame, tsîn ge ǁîdi ūhâxūna ǁîdi îb ǃhaos tawa ge hâǃari. 13 Nēn ge ǁgaragu tsî mîmādi ǃKhūb ge Moseb ǃnâ-u Israelǁîna Moabǂgāgu, Jordanǃāb ǃoagu Jerixos ǀkhāba xu ǁgoegu ǃnâ māna.
© Khoekhoegowab Elobmîs © Bible Society in Namibia, 2020.
