ǃHūb di ǃhūǀgoradi
1 ǃKhūb ge Moseba 2 sao ra ǁgui-aide Israelǁîn ǃaroma ge mā: “Kanaanǃhūb, tita ra mā dub ǃnâ du ga ǂgâ, o di ge sadu ǀkharigu ǃhūǀgorade sao ra ǀgaub ai nî hâ: 3 ǃKhawagasǀkhāb di ǃhūǀgoras ge Sinǃgaroǃhūba xu Edoms di ǃhūǀgoras ǀkha ǀguipa nî khoraǂuisen. ǃKhawagas ǀkharib ge ǂŌxahurib di ǀamsa xu aiǂoasǀî nî ī. 4 ǁNāpa xu nî ǃkhawagasǀkhāb ai Akrabims ǁga tsî Sins ǃnâ-u Kades-Barneas ǃnūsib kōse nî aiǃgûse. ǁNās khaoǃgâ ǀapasǀkhāb Hasar-Adars tsî Asmons dis ǁga nî dabasen, 5 tsî ǁnāpa xu ǃgoaǃnāb Egipteb ǃhūǀgoras tawa ǁgoeb ǁga unusen tsî Mediteraneahurib tawa sī nî ǀuni.
6 “Mediteraneahurib ge huriǂoasǀkhāb di ǃhūǀgoras ase nî ī.
7 “ǀApasǀkhāb di ǃhūǀgoras ge Mediteraneahuriba xu Horǃhommi kōse nî hâ 8 tsî ǁnāpa xu Hamats kōse. ǁNās khaoǃgâ Sedads kōse aiǃgû 9 tsî Sifrons ǁga tsî Hasar-Enans tawa sī nî ǀuni.
10 “Aiǂoasǀkhāb ǃhūǀgoras ge Hasar-Enansa xu Sefams kōse nî hâ. 11 ǁNāpa xu ǃkhawagasǀkhāb Riblas dib ǁga, aiǂoasǀkhāb Ains dib ai, tsî ǃaruǀî aiǂoasǀkhāb Galileahurirob di ǃhomgu ǃoa, 12 tsî ǃkhawagasǀkhāb ǁga Jordanǃāb xōǀkhāba-u ǂŌxahurib kōse.
“Nēdi ge haka ǃhūǀgoradi sadu ǃhūb dide.”
13 ǁNā-amagab ge Moseba Israelǁîn ǃoa ge mî: “Nēb ge ǃhūb ǀkhūsa aos ǀkha du nî ǃkhōǃoaba, ǁnā ǃhūb ǃKhūb ge khoese tsî ǃkhare ǃhaode māba. 14 Rubenni, Gadi tsî ǃkhare ǃhaos Manaseb dis tsîdi ge ǁîdi ǃhūb, ǁîdi omaridi ǃoa ge ǀgoraǂgāheba ge ǃkhōǃoa, 15 aiǂoasǀkhāb Jordanǃāb dib, Jerixos ǃoagu ǁgoeba.”
ǃHūba ǀgoraǂgās ǃereamsa ūhâ ǂgaeǂgui-aogu
16 ǃKhūb ge Moseb ǃoa ge mî: 17 “Prister Eleasari tsî Nunni ôab, Josuab hâkha ge ǃhūba khoena nî ǀgoraǂgāba. 18 Mâ ǃhaos hoasa xu ǀgui ǂgaeǂgui-aoba ǀgoraǂgās ǀkhab nî huise ū.” 19-28 Nēgu ge khoegu ǃKhūb ge ǁhûiǂuiga:
ǃHaos ǂGaeǂgui-aobJudab Jefuneb ôab Kaleb;Simeonni Amihudi ôab Selumieli;Benjaminni Kislonni ôab Elidadi;Danni Joglib ôab Bukib;ManasebEfodi ôab Hanieli;Efraimmi Siftanni ôab Kemueli;Sebulonni Parnaki ôab Elisafanni;Isaskari Asanni ôab Paltieli;Aseri Selomib ôab Ahihudi;Naftalib Amihudi ôab Pedaheli.29 Nēgu ge khoegu ǃKhūb ge ǃhūb tsî ǁîb di xūn tsîna gu Israelǁîna Kanaanǃhūb ǃnâ nî ǀgoraǂuibase ǁgui-aiga.
© Khoekhoegowab Elobmîs © Bible Society in Namibia, 2020.
