Nūdi xa hâ ǁgaragu
1 Moseb ge sao ra ǁguiǂamde Israelǁîn ǃhaodi ǂgaeǂgui-aoga ge mā: 2 Khoeb ga ǃKhūbab nî xū-e māse nū tamas ka io xū-eb ǁkhawa dī tidese nū, ob ge ǁîba ǁîb mîmâisa khôa tide, tsî mîmâib ge xūn hoana nî dī.
3 ǁÎs îb di oms ǃnâs hâ hîas ga ǂkham khoesa ǃKhūbas nî xū-e māse nū, tamas ka io xū-es ǁkhawa dī tidese mîmâi, 4 os ge ǁîsa nū tsîs ge mîmâi xūn hoana nî dī; ǁîs îb ga ǁnās xa ǁnâu tsî ǁnāsa mâǃoa tama io. 5 Xaweb ga ǁîs îba ǁnâu tsî ǁîs nî nūsa dīǀoaǀoa ǃkhaisa mâǃoa, os ge ǁîsa dīs ge nūsa xu a ǃnorasa. ǃKhūb ge ǁîsa nî ǀûba, ǁîs îb ge ǁîs di nūsas nî dīǀoaǀoa ǃkhaisa mâǃoa xui-ao.
6 ǃGame tama khoes ga ǂans ǃnâ tamas ka io ǁae tamase nū, tamas ka io xū-es dī tidese mîmâi, xawes ga ǁîsa ǃgame, 7 os ge ǁîsa nū tsîs ge mîmâi xūn hoana nî dī, hanab ga ǁîs di aoba ǁnāsa ǁnâu tsî mâǃoa tama io. 8 Xaweb ga ǁîs aoba ǁnâu tsî ǁîs nî nūsa dīǀoaǀoa ǃkhaisa mâǃoa, os ge ǁîsa dīs ge nūsa xu a ǃnorasa. ǃKhūb ge ǁîsa nî ǀûba.
9 ǃOataras tamas ka io aob xa ǀgoraxūhe hâ taras ge dīs ge nūs tamas ka io mîmâis, xū-es ǁkhawa dī tides disa nî dīǀoaǀoa.
10 ǃGametaras ga nū tamas ka io ǁkhawas xū-e dī tide ti a mîmâi, 11 os ge ǁîsa nū tsîs ge mîmâi xūn hoana nî dīǀoaǀoa, hanab ga ǁîs di aoba ǁnâu tsî mâǃoa tama io. 12 Xaweb ga ǁîs di aoba ǁnâu tsî ǁîs nî nūsa dīǀoaǀoa ǃkhaisa mâǃoa, os ge ǁîsa dīs ge nūsa xu a ǃnorasa. ǃKhūb ge ǁîsa nî ǀûba, ǁîs aob ge ǁîs di nūsas nî dīǀoaǀoa ǃkhaisa mâǃoa xui-ao. 13 ǁÎs aob ge ǁîs ge dī nūs tamas ka io mîmâisa ǃkhōǃgâs tamas ka io mâǃoas di ǂhanuba ūhâ. 14 Xaweb ga ǁîs aoba ǁîs di nūsab ge ǁnâus khaoǃgâ sao ra tsēdi ǃnâ ǁnāsa mâǃoa tama i, os ge ǁîsa nū tsîs ge mîmâi xūn hoana nî dīǀoaǀoa, ǁîs aob ge ǁîs nūsab ge ǁnâu tsēs ai ǁnāsa mâǃoa tama i xui-ao. 15 Xaweb ga ǁîba ega ǁnā nūsa khôasa dītsâ, ob ge ǁîba ǁîb taras ga nūs ǃaroma tani hâ ǁkharaba nî tani.
16 Nēgu ge ǁgaragu nūs tamas ka io mîmâis ǃgame tama khoes hîa ǁîs îb di ommi ǃnâ hâs tamas ka io ǃgametaras hâra ra dīgu, ǃKhūb ge Moseba māga.
© Khoekhoegowab Elobmîs © Bible Society in Namibia, 2020.
