Numeri 20 - Khoekhoegowab New Translation 2020 (KKG20)

Kades tawa ge hâ i ǁaxasigu

1 ǂGuro ǁkhâb aib ge Israelǁîn di ǀhûhâsib hoaba Sinǃgaroǃhūb tawa sī tsî ǁnāpa Kades tawa sī hâǃkhaiba ge ǂnaumâi. Miriams ge ǁnāpa ǁō tsî ge ǁkhōhe.

2 ǂNaumâin ge ǃkhaib ai i ge ǁgam-e ǀkhai i xui-aon ge khoena Moseb tsî Aron hâkha ǂnamipe ǀhao, 3 tsî ǁîn di ǂkhîoǃnâsiba ge gowaǂui: “ǃGâi ga hâ ǃkhais ge sida horesa Israelǁîn ǀkha da ga ǀguipa ǃKhūb Tentommi aiǃâ ǁō hâsa. 4 Tare-i ǃaromats sida nē ǃgaroǃhūb ǁga ge ǂgaeǂguiǂui? Sida tsî sida ǀgoan tsî goman tsîn hoan ǀkha da nēpa nî ǁōgats ǁnāsa ge dī? 5 Tare-i ǃaromats ge sida Egipteba xu nēti ī ǃū-aisa ǃgaroǃhūb, xū-i tsîn ǁhao-ai tideb ǃoa hā-ū? ǃHoro-i, ǀnoma-i, draibe-i tamas ka io xranat-i tsîn ge a ǀkhai. Āhe nî ǁgam-i xare-i tsîn ge a ǀkhai!” 6 Moseb tsî Aron hâkha ge khoena xu ǃgû tsî ǃKhūb di Tentommi ǂgâ-ams tawa sī ge mâ. ǁÎkha ge aidi âkha ǀkha ǃhūb kōse ge ǃhon, tsîb ge ǂkhaisib ǃKhūb diba ǁîkha ge ǂhai.

7 Tsîb ge ǃKhūba Moseb ǃoa ge mî: 8 “ǃGaeǀhaos ǂGaes ais ai ǁgoe ǀkharuba ū, î kho sats tsî Aron hâkho hoaraga ǀhûhâsiba ǀhaoǀhao. ǁÎn hoan ra mûse ǁîn aiǃâ mâ ǃgareǀuib ǀkha ǃhoa, ob ge ǀuiba ǁgam-e nî ǂoaxa kai; tsî kho ge sakho ǁîn tsî ǁîn di ǀgoana ǀuiba xu ǁgam-e nî ǂoaxa kaiba.” 9 Moseb ge ǃKhūb ge mîmā khami ǀkharuba sī ge ū.

10 Moseb tsî Aronni tsîkha ge hoaraga ǀhûhâsiba ǀuib aiǃâ ge ǀhaoǀhao tsîb ge Moseba ǁîn ǃoa ge mî: “Sa khâikhâisenxa khoedo ǃgâ re! Nē ǀuiba xu khom ge sado ǁgam-e nî ǂoaxa kaiba.” 11 Ob ge Moseba ǀkharuba ūkhâi tsî ǀuiba ǀgam ǃnāra ǁîb ǀkha ge ǂnau, tsî i ge kai ǁgam-e ǀuiba xu ge dâuǂoaxa. Hoaraga khoen tsî ǀgoan tsîn ge ǁî-i xa ge ā.

12 Xaweb ge ǃKhūba Moseb tsî Aron hâkha ǀkha ǂkhîoǃnâ tsî ge mî: “Tita kho ǂgomǃgâ tsî ti ǃanusiba Israelǁîn aiǃâ ǁgauǂui ǂgao tama xui-ao kho ge ǁîna tita ge ǁîna mîmâiba ǃhūb ǃnâ ǂgaeǂguiǂgā tide.”

13 Nēs ge Meribas , khoen ge ǃKhūb ǃoagu ǂkhîoǃnâ tsîb ge ǁîna ǁîb di ǃanusiba ǁgau ǃkhais tawa ge ī.

Edommi gao-aob ge Israelǁîna ǃkharusa ra ǂkhā

14 Moseb ge sîsabega Kadesa xu Edommi di gao-aob ǁga ge sî tsî gu ge ǁîga ge mî: “Nē ǂhôas ge sa ǃgâsa ǁaes Israelǁîn disa xu ra hā. Sats kom sida ge ǃkharuǃnâ karosasiba a ǂano, 15 mâti gu ge sida aboxaga Egipteb hîa da ge gaxu kuriga sī ǁanǃnâb ǁga ǃgûsa. Egipteǁîn ge ǁîgu tsî sida hoada tsîna kaise ǁgaisise ge ûi-ū, 16 tsî da ge sida ǃKhūb ǃoa huib ǃaroma ge ǂgai. ǁÎb ge sida ǂgaidomma ǁnâu tsî ǀhomǃgāb hîa ge Egipteba xu a ǂgaeǂguiǂui daba ge sî. Xawe nēsi da ge ǃās, Kades sa ǀkharib di ǃhūǀgoras tawa ǁgoes tawa hâ. 17 ǁNā-amaga toxopa sa ǃhūb ǃnâ-u da nî ǃkharusa mā-am da re. Sida ǀgoan tsî goman ǀkha da ge kai daoba xu ǁgôa tamase tsî ǃhanagu tamas ka io draibena tsâǀkhā tamase nî ǃkharu, tsî ǁkhāti sa tsaugu ǁgam-i tsîna ā tide.”

18 Xawen ge Edomǁîna ge ǃeream: “Sida ge sida ǃhūba-u ǃkharusa mā-am du tide! ǀGaib ǃnâ du ga dītsâ, o da ge ǃgûǂoa tsî nî ǁnāǂam du.”

19 On ge Israelǁîna ge mî: “Kai daob ai ǀgui da ge nî hâ, xawe i ga sida tamas ka io sida ǀgoa-i tamas ka io goma-e sa ǁgam-e xu ā, o da ge ǁnās ǃaroma nî matare; sida ge ǃkharu ǂgaos ǀguisa ra hî.”

20 Xawen ge Edomǁîna ǁkhawa ge mî: “Mā-am du da tide!” Tsîn ge ǁîna ǀgaisase ǁâtanisen hâse, Israelǁînan sī nî ǁnāǂamse ge ǃgûǂoa. 21 Edomǁîn xan ǃkharusa mā-amhe tama, amagan ge ǁîna dabasen tsî ǀnî ǀkhāb ǁga ge ī.

Aronni ǁōb

22 Hoaraga ǀhûhâsib Israelǁîn dib ge Kadesa xu ǃgû tsî Horǃhommi tawa ge sī, 23 Edommi ǀkhab ra ǃhûǁaesenpa. ǁNāpab ge ǃKhūba Moseb tsî Aron hâkha ǃoa ge mî: 24 “Aronni ge tita ge Israelǁîna mîmâiba ǃhūb ǃnâ ǂgâ tide; ǁîb ge nî ǁō, sakho ge Meribas di ǁgams tawa ti mîmās ǃoagu khâikhâisen xui-ao. 25 Aronni tsî ǁîb ôab Eleasari tsîkha Horǃhommi ai ǂoa-ū, 26 î ǁnāpa Aronna ǁîb pristersi saraga ǂgaeǂuiǀkhā tsî ǁîga Eleasara ǂgaeǂgā. Aronni ge ǁnāpa nî ǁō.” 27 Moseb ge ǃKhūb ge mîmā bi khami ge dī. Hoaraga ǀhûhâsib di mûǁae gu ge Horǃhommi ai ge ǂoa. 28 Moseb ge Aronna pristersi saraga ǂgaeǂuiǀkhā tsî ǁîga Eleasara ge ǂgaeǂgā. ǃHommi aib ge Aronna ge ǁō, tsî Moseb tsî Eleasar hâkha ge ǃhomma xu ge ǁgôaxa. 29 Hoaraga ǀhûhâsib Israelǁîn dib ge Aronni ge ǁō ǃkhaisan ge ǁnâu, o ǃnonadisi tsēde Aronni ǃaroma ge ǃoa.