Numeri 19 - Khoekhoegowab New Translation 2020 (KKG20)

ǀApa gomas tsaob

1 ǃKhūb ge Moseb tsî Aron hâkha ge mîmā, 2 î kha Israelǁîna sao ra ǁgaraga mā: Moseb tsî Aron hâkha ūo ǀapa gomas, tātsēs tsîna ge sîsenūhe tama hâ isa ǀkhī-ūba, 3 î kha ǁîsa prister Eleasara mā. ǁÎs ge hâǃkhaiba xu ūǂuihe tsî ǁîb ra mûse nî ǃgamhe. 4 ǁNās khaoǃgâb ge Eleasara ǀnî ǀaob ǁîs diba ǀkhunub ai ū tsî hû ǃnāde ǃKhūb di Tentommi mâ ǀkhāb ǁga nî ǀgapi. 5 Hoaraga gomas, ǁîs di khōb, ǁgan-i, ǀaob tsî ǃnāxūn hoan ǀkha hâs ge pristeri ra mûse nî ǂhubiǂuihe. 6 ǁNās khaoǃgâb ge sederhai-i, hisopǁnâu-i tsî ǀapa tsurib tsîna ū tsî ǀaes ǃnâ nî aoǂgā. 7 ǁNāpa xub ge ǁîb sarana ǁā, ǁgam-i ǀkha ǁhōǀkhāsen tsî ǁnās khaoǃgâ hâǃkhaib tawa nî ǂgâ ǁkhā; xaweb ge ǃoes kōse a ǃanuoǃnâ. 8 Gomasa ga ǂhubiǂui khoeb tsîn ge ǁîb sarana ǁā tsî ǁgam-i ǀkha nî ǁāsen; xaweb ge ǁîb tsîna ǃoes kōse a ǃanuoǃnâ. 9 Khoeb hîa a ǃanub ge gomas di tsao-e ūkhâi tsî ǃanu ǃkhai-i, hâǃkhaib ǃauga hâ-i tawa sī nî tsoroǂnûi; ǁî-i ge Israelǁîn xa ǃanuǃanu-ūs di ǁgam-e aiǂhomis ǃaroma nî sîsenūhe. Nēs ge ǁorena ǁāǁnâs ǃaroma gere sîsenūhe. 10 Tsao-e ga ūkhâi khoeb tsîn ge ǁîb sarana nî ǁā, xawe ǃoes kōse a ǃanuoǃnâ. Nē ǁgarab ge Israelǁîn tsî ǃhaokhoen ǁîn ǁaegu ǁan hân tsîn hoan xa hoaǁae nî ǁnâuǀnamhe.

ǁŌ hâ soro-e tsâǀkhās

11 ǁŌ hâ soro-e ga tsâǀkhā khoe-i hoa-i ge hû tsēde a ǃanuoǃnâ. 12 ǁNāti ī khoe-i ge ǃnonaǁî tsî hûǁî tsēs tsîra ai ǃanuǃanu-ūs ǁgam-i ǀkha ǁāsen, tsî ǀgui a ǃanu. Xawe i ga ǁî-e nē tsēra ai ǁāsen tama i, o i ge ǁî-e ǃanu tama hâ. 13 ǁŌ hâ soro-e ga tsâǀkhā tsî ǁāsen tama i khoe-i hoa-i ge a ǃanuoǃnâ, ǁî-i ai i ǃanuǃanu-ūs ǁgam-e ǁhōhe tama xui-ao. ǁÎ-i ge ǃKhūb Tentomma ǃanuoǃnâ kai, xui-ao i ge ǁî-e Elob ǁaes di ǀgui-i ase ǃaruǀî ǃgôahe tide.

14 Khoe-i ga Tentommi ǃnâ ǁō, on ge ǁnā ǁaeb ai ga ǁnāpa ǂgana hâ i khoen tsî khoe-i hîa ǁnā ǁaeb ai Tentommi ǃnâ ra ǂgâ-i tsîn hoana hû tsēdi ǁaeba nî ǃanuoǃnâ. 15 Mâ xapa-i tamas ka io sū-i hîa Tentommi ǃnâ ǂganai-i ose hâ-i hoa-i ge nî ǃanuoǃnâ. 16 Khoe-i ga ǃgarob ǃnâ ǃgamhe hâ tamas ka io ǁnaetisase ge ǁō khoe-e tsâǀkhā, tamas ka io i ga khoe-e ǁō hâ khoe-i di ǂkhō-i tamas ka io ǀhobasa a tsâǀkhā, o i ge ǁî-e hû tsēdi ǁaeba nî ǃanuoǃnâ.

17 Nē ǃanuoǃnâsiba ǃanuǃanus ǃaroma i ge ǀapa gomas, ǁorena ūbēs ǃaroma ǂhubihe hâs di tsao-e ūhe, sūs ǃnâ tsorohe tsî ǁî-i tawa ǃanu ǁgam-e nî ǁhōhe. 18 ǂGurosa i ge ǃanu khoe-e hisopǁnâu-e ū, ǃanuǃanu-ūs ǁgam-i ǃnâ ǀhari tsî Tentommi, ǁîb ǃnâ hâ xūn hoan tsî ǁnāpa ge hâ i khoen hoan ai nî ǀgapi. ǀGamǁîse i ge ǃanu khoe-e, ǁnā khoe-i hîa ge ǁō hâ khoe-i di ǂkhōb tamas ka io soros tamas ka io ǀhobasa tsâǀkhā-i ai nî ǀgapi. 19 ǃAnu khoe-i ge ǃnonaǁî tsî hûǁî tsēs tsîra ai ǃanuoǃnâ khoe-i ai ǁgam-e nî ǀgapi. ǁÎ-i ge ǁnā khoe-i hîa saran â-e ǁā tsî ge ǃanuǃanu-ūs ǁgam-i ǀkha a ǁāsen-e hûǁî tsēs ai nî ǃanuǃanu, tsî i ge ǁî-e soresǂgâb ai nî ǃanu.

20 Khoe-i hîa ga ǃanuoǃnâ tsî ǃanuǃanusen tama i-i, ge ǃanuoǃnâse nî hâǀgara, ǃanuǃanu-ūs ǁgam-i ge ǁî-i ai ǁhōhe tama hâ i xui-ao. ǁÎ-i ge ǃKhūb Tentomma i ge ǃanuoǃnâ kai xui-ao ǁîb ǁaes di ǀgui-i ase ǃgôahe tide. 21 Nē ǁgarab ge hoaǁae nî ǁnâuǀnamhe. ǁNā khoe-i hîa ǃanuǃanu-ūs ǁgam-e ga ǀgapi-i tsîn ge ǁî-i sarana nî ǁā; tsî khoe-i hîa ga ǁnā ǁgam-e tsâǀkhā-i ge ǃoes kōse nî ǃanuoǃnâ. 22 ǃAnuoǃnâ khoe-i ra tsâǀkhā xū-i hoa-i ge nî ǃanuoǃnâ, tsî ǁnāti ī xū-e ga tsâǀkhā khoe-i hoa-i ge ǃoes kōse ǃanuoǃnâse nî hâǀgara.