ǀHôagao ǃkhē-aogu
(Deuteronomium 1:19-33)1 ǃKhūb ge Moseba ge mîmā: 2 “Disiǀgamǀa ǃhaodi Israeli dide xu ǀgui ǂgaeǂgui-aoba mâ ǃhaos hoasa xu ǁhûi, î ǁîga ǀhôagao ǃkhē-aogu ase Kanaanǃhūb, Israelǁîna ta nî māba gu sī nî ôaǃnâse sî.” 3-15 Moseb ge nēsa ǁnâuǀnam tsî Paranǃgaroǃhūba xu sao ra ǂgaeǂgui-aoga ge sî:
ǃHaos ǂGaeǂgui-aobRubenni Sakuri ôab Samuab;Simeonni Hori ôab Safati;Judab Jefuneb ôab Kaleb;Isaskari Josefi ôab Igali;Efraimmi Nunni ôab Hoseab;Benjaminni Rafub ôab Paltib;Sebulonni Sodib ôab Gadieli;Manaseb Susib ôab Gadi;Danni Gemalib ôab Amieli;Aseri Mixaeli ôab Seturi;Naftalib Vofsib ôab Nabib;Gadi Maki ôab Geueli.16 Nēdi ge Moseb ge ǃhūba gu sī nî ôaǃnâse sî aogu di ǀonde. (Moseb ge Nunni ôab Hoseaba Josua ti ge ǀonǂgai.) 17 Moseb ge ǁîgab gere sîǂui, o ge mî: “Nēpa xu Negeb ǃnâ-u ǃkharu, î ǃhomxa ǀkharib Kanaanǃhūb dib ai sī ǂoa. 18 Mâtib ǃhūba īs, mâtikō khoenab ūhâs tsî mâtikōsen a ǁkhā ǃkhaisa sī ôaǃnâ. 19 ǃHūb a ǃgâis tamas ka io ǁgais tsî khoen omǂnamisa tamas ka io omǂnamisa tama ǃādi ǃnâ ǁan hâsa sī ôaǃnâ. 20 ǃHūb a ǂûtanixa tsî haixa ǃkhais tsîna sī kō. Dītsâ î ǁnāpa ra ǁhai hain ǀnîn di haiǂûn tsîna hā-ūsao.” (Draibeǂûn gere ǁan ǁae ge ib ge.)
21 ǁNāti gu ge khoega ǃgû tsî ǃhūba Sinǃgaroǃhūba xu Rehobs, Hamats di ǂgâ-ams tawa ǁgoes kōse ge ôaǃnâ. 22 ǂGuro gu ge ǃhūb di ǃkhawagasǀkhāb ǃnâ, Hebrons tawa ge sī. ǁNāpan ge Ahimanni, Sesaib tsî Talmaib hâgu, Anaki surib, kaikara khoen di ǃhaosa xu hâ ti ge ǂansa ib di suriba ge ǁan hâ i. (Hebrons ge hû kurigu ǃkharu hâse, Soans Egipteb ǃnâ ǁgoes aiǃâ ge ǂnubihe.) 23 Eskolǃgoaǃnāb tawa gu ge sī, o gu ge draibeǁnâub, ǂgui draibeǂûde ūhâba ge ǁaraǁnâ tsîb ge kaiseb ge ǃgom i xui-ao ǀgam khoekha xa haib ai ge tanihe. ǁÎgu ge ǁkhāti xranatdi tsî ǀnomaǂûn tsîna ge hā-ūsao. 24 (ǁNā ǃkhais ge Eskolǃgoaǃnāb ti ge ǀonǂgaihe, Israelǁaes ge ǂgui draibeǂûde ūhâ ǁnâuba ǁnāpa sī ǁaraǁnâ xui-ao.)
25 Hakadisi tsēdi ǃhūba ôaǃnâs didi ge toas, khaoǃgâ gu ge ǁîga ge ǁaru, 26 Moseb, Aronni tsî hoaraga ǀhûhâsib Israelǁîn dib, Kades Paranǃgaroǃhūb ǃnâ ǁgoes tawa hân ǁga. 27 ǁÎgu ge Moseba ge mîba: “Sigets ge sî khami ge ge ǃhūba sī ôaǃnâ tsî ge mû amaseb ǃkhū hâ tsî ǂûtanixa ǃkhaisa; nēn ge ǁîb di ǂûna. 28 Xawe ǁîb di ǁanǂgāsaben ge a ǀgaisa tsî ǁîn di ǃādi ge kai tsî ǁaposase a omǂnamisa. ǃAruǀî nēs xōǀkhā kai ǃgomsib ase īb ge, Anaki surib kaikara khoen di ǃhaos surib hîa ge ge mûba. 29 Amalekǁîn ge ǃhūb di ǃkhawagasǀkhāb ai ǁan hâ; Hetǁîn, Jebusǁîn tsî Amorǁîn tsîn ge ǃhomxa ǀkharib ǃnâ ǁan hâ; tsî Kanaanǁîn ge Mediteraneahurib tsî Jordanǃāb xōǀkhā ǁan hâ.”
30 Ob ge Kaleba Moseb ǃoagu ǁîn ǂkhîoǃnâsiba gere gowaǂui khoena ǃnō kai tsî ge mî: “A da nēsi ǃgûǃapa tsî ǃhūba ūbasen, ǁîba da danbasen ǁkhā xuige.”
31 Xawe gu ge Kaleb ǀkha ge ǃgû hâ i khoega ge mî: “ǁNā khoen ǃoagu da ge sada ǁkhāsi-e ūhâ tama, ǁîn sada xa a ǀgaisa xui-ao.” 32 ǁNā-amaga gu ge ǂhumi ǃnuriba Israelǁîn ǁaegu, ǃhūb hîa gu ge ôaǃnâǃgûb ǂama mā tsî ge mî: “ǁNā ǃhūb ge ǁîb di ǁanǂgāsaben tsîna a ǂûmā ǁoa. ǁNāpa ge ge mû khoen hoan ge kaimâ hâ. 33 ǁKhāti ge ge Anaki surib kaikara khoen di ǃhaos surib tsîna ǁnāpa ge mû. ǂHomn khami ǂkharirose ge ge ǁîn ǃoagu gere mûsen, tsî ge ge sige ona ǁîn mûǁae ǁnāti ge ī i.”
© Khoekhoegowab Elobmîs © Bible Society in Namibia, 2020.
