ǂÛtama hâs di tsēs
1-2 ǁNā ǁkhâb ǁkhāb di ǀgamdisihakaǀaǁî tsēs ain ge Israelǁîna ǂûtama hâs ǃaroma ge ǀhao, ǁîn di ǁoren xan gere ǃhausen xui-ao. ǁÎn ge ǃhaokhoen hoana xu ge ǀgorasen. Tsîn ge ǃoab sarana ana tsî tsaraba danadi ai ge tsoro, ǃoab di ǁgauǁgaus ase. Tsîn ge mâ tsî ǁîn tsî ǁîn aboxan tsîn di ǁorena ge ǁguiǁnâ. 3 ǃNona irgu kōsen ge ǃKhūb, ǁîn Elob di ǂhanuba ge khomaibahe, tsî sao ra ǃnona irgan ge ǁoren âna ǁguiǁnâ tsî ǃKhūb, ǁîn Eloba ge ǀgoreǀî.
4 Leviǁîgu, Jesuab, Banib, Kadmieli, Sebanjab, Bunib, Serebjab, Banib tsî Kenanib tsîgu ge mâ-aiǂgapab ai mâ tsî ǃKhūb, ǁîn Eloba ǃgarise ge ǂgaiǀî.
5 ǁNās khaoǃgâ gu ge Leviǁîgu, Jesuab, Kadmieli, Banib, Hasabnejab, Serebjab, Hodiab, Sebanjab tsî Petahiab tsîga ge mî:
“Khâi, î du ǃKhūb, sadu Eloba koa;
koa bi re, ǀamosiba xu ǀamosib kōse.
An hoana sa ǂkhaisa ǀonsa koa,
ǁîs, koas hoasa ǃnāǂam hâsa.
6 “Sats ǀguits ge a ǃKhū;
sats ge ǀhommi tsî ǀgamiron tsîna ge kuru.
Sats ge ǃhūbaib tsî hurib tsî ǁîkha ǃnâ hân hoana kuru
tsî ǁîn hoana ûiba ge mā.
ǀHomsi ǂnubis ge satsa ra ǀgoreǀî.
7 Sats ǃKhū Elots ge Abramma ǁhûiǂui
tsî Urs, Babiloniab disa xu ge ǂgaeǂguiǂui;
sats ge ǀons âba Abraham, ti ge ǀkharaǀkhara.
8 ǁÎbats ge ǂgomǂgomsa khoese ge hō,
tsîts ge ǁîb ǀkha ǃgaeǀhao-e ge dī.
Sats ge ǁîba Kanaanǃhūba ge mîmâiba,
tsî ǃhūb Hetǁîn dib tsî Amorǁîn dib,
tsî Perisǁîn dib, Jebusǁîn dib tsî Girgasǁîn diba,
ǁîb di surib ǁnāpa nî ǁanse.
Sats ge mîmâis âtsa ge ǃkhōǀgaipe,
ǂgomǂgomsats a amaga.
9 “Sats ge sida aboxan ge Egipteb ǃnâ tsâ ǀgausa ge mû;
ǁîn ge ǀApahurib tawa huib ǃaroma ǂgai, ots ge ge ǁnâu.
10 Sats ge buruxa dīga gao-aob ǃoagu ge dī,
tsî ǁîb ǂamkhoegu tsî ǁîb khoen ǃoagu,
mâtin ge sa ǁaesa ǁgâiǀā ǃkhaisats ge ǂan i xui-ao.
Sa ǀons ge kaise ge ǂansa, nētsēs kōses īse.
11 Sa ǁaes ǃaromats ge huriba ge ǀgoraǃā
tsî ǁîna ǂnâsa ǃhūb ai ge ǂgaeǂguiǃgâu.
ǁÎn di ǃgôaǃgonaonats ge hurib ǃnâ ge āǁō kai,
ǀui-i khamin ge ǃgam hurib ǃnâ ge ǁnāǁgôa.
12 ǁÎnats ge tsēa ǃâus ǀkha gere ǂgaeǂgui
tsî tsuxuba ǀaes di ǃnâb ǀkha.
13 Sats ge Sinaiǃhommi ai ge ǁgôaxa;
ǁîn ǀkhats ge ǀhomma xu ǃhoa
tsî ǁîna sa ǃgâi ǂhanugu tsî ǂhanu mîmādi tsîna ge mā.
14 ǁÎnats ge sa Sabbattsēsan nî khaisa ge ǁkhāǁkhā;
sa ǃgāb Moseb ǃnâ-uts ge ǁîna sa ǂhanuba ge mā.
15 “ǃÂn ge, ots ge ǁîna ǀhomma xu pere-e ge mā,
tsî ǁgân geo, ǁgam-e ǃgareǀuiba xu.
ǁÎnats ge ge mîba, în ǁnā ǃhūba ūbasen,
ǁînats ge māts nî ti mîmâiba hâ iba.
16 Xawen ge sida aboxana ǀgapiǂâixa tsî ge ǃnâudanaxa,
tsîn ge sa mîmāde ǁnâuǀnam ǂgao tama ge i.
17 ǁÎn ge ǃgâ ǂgao tama ge i;
ǁîn ge sats ge dī buruxa dīga ge ǀuru.
Tsîn ge ǃnâudanaxasib ân ǃnâ ǂgaeǂgui-aoba ge ǁhûi,
îb ǁîna Egipteb di ǃgāsis ǃoa oa-ū.
Xawe sats Elots ge a ǀûbaxa;
sats ge ǀkhomxaǃnâ tsî ǀnammi xa ǀoa hâ,
sats ge ǀkhomxaǂgao tsî ǃnūǃnâxa.
Sats ge ǁîna ǁnāxū tama ge i.
18 ǁÎn ge ǂnâhe hâ īb tsâub diba dībasen
tsî nēb ge Egipteba xu ge ǂgaeǂguiǂui da eloba ti ge mî.
Taotaosa xūnan ge sa ǃoagu dī,
19 xawets ge ǁîna ǃgaroǃhūb ǃnâ ǁnāxū tama ge i,
ǀkhomxaǂgaosib âts a kai xui-ao.
ǃÂus ge tsēa ǁîna xu ge bē tama hâ i,
xawes ge ǁîna daob ai gere ǂgaeǂgui.
ǀAes ge tsuxuba ǁîn di ǃgûdaoba gere ǃnâǃnâ.
20 Sa ǃgâi gagabats ge ǁîna ge mā, ǁînab nî ǁkhāǁkhāse;
ǁînats ge manaba ǂûn nîse ge mā tsî ǁgam-e ān nîse.
21 Hakadisi kurigu ǁaebats ge ǁîna ǃgaroǃhūb ǃnâ
ǂhân gere xūn hoana gere mā;
saran ân ge ge ǀoro tama hâ i
tsî ǂaidi ân ge ge xâi tama hâ i.
22 “Sats ge ǁîna gaosidi tsî ǁaedi tsîna ge mā,
ǃhūgu ǁîn dib ǂnamipe ǁgoega.
ǁÎn ge Hesbons gao-aob Sihonni ǃhūba ge ū,
tsî Basanni gao-aob Ogi dib tsîna.
23 Sats ge ǁîn ôana ǀhommi di ǀgamiron kōse ǂguiǂgui
tsî ǁnā ǃhūb ǃnâ ge sī-ū,
ǁîn aboxanats ge ǁînats nî mā, ti mîba hâ ib ǃnâ.
24 ǁÎn ge Kanaanǃhūba ǁnāǂam tsî ge ū.
Sats ge ǁîna ǁnā ǃhūb di ǁanǂgāsaben ǂama dansa ge mā.
Sa ǁaesats ge ǁîn tsî ǁîn di gao-aogu ǂama ǀgaiba ge mā,
în ǁîn ǀkha ǂgaon ra khami sîsen.
25 Sa ǁaes ge omǂnamisa ǃādi,
ǂûǂûxa ǃhūb, ǃkhūsib xa ǀoa hâ omdi,
ǀnai khaotoasa tsaugu,
draibeǃhanagu, ǀkherahaidi tsî ǂgui ǂûhaidi tsîna ge ū.
ǁÎn ge ǂhâban hâs kōse ǂû tsî ge kau;
ǁîn ge sats ge ǁîna mā ǃgâi xūn ǃnâ gere ǃgâiǃgâisen.
26 “Xawen ge ǁîna khâikhâisen tsî satsa ge mâǃoa;
ǁîn ge sa ǂhanuba ge ǂhara.
Tsîn ge ǁîna gere ǃkhâikhom kēbo-aoga ge ǃgam;
ǁîna ge ǁkhawa sats ǃoa gere oa kaiga.
ǁÎn ge taotaosa xūna sa ǃoagu gere dī,
27 ǁnā-amagats ge ǁîna ǁgâiǀā-aon di ǀgaib ǃnâ ge māǁnâ.
ǂŌǂōsib ǃnân ge sa ǃoa gere huiǂgan,
ots ge ǁîna ǀhomma xu gere ǁnâu-am.
Sa kai ǀkhomxaǂgaosiba xuts ge ǁîna hui-aoga gere sîba,
ǁîna gere khākhoena xu huiǂuiga.
28 Xawe ǂkhîb ga hā, on ge ǁkhawa sa ǃoagu gere ǁore,
tsîts ge satsa ǁîna ǁkhawa khākhoen ǀgaib ǃnâ gere māǁnâ.
Xawe ǃhobasen tsîn ga sats ǃoa huiǂgan,
ots ge ǁîna ǀhomma xu ǁnâu-am tsî ǃnākorobe
sa kai ǀkhomxaǂgaosiba xu gere huiǂui.
29 Sats ge ǁîna a ǃkhâikhom, în sa ǂhanub ǃoa oa,
xawen ge ǃnâudanaxa tsî sa mîmāde ǁnâuǀnam tama ge i.
ǁÎn ge sa ǂhanugu ǃoagu ge ǁore;
sa ǂhanugu, ǁîga ǁnâuǀnamsa xu i khoe-e nî ûiga.
ǁÎn ge ǃnâudanaxa tsî ge ǁnâuǀnamoǃnâ i.
30 ǂGui kurigu ǁaebats ge ǁîn ǀkha ge ǃnūǃnâxa i.
Sa gagab ǀkhats ge sa kēbo-aogu ǃnâ-u ǁîna ǃkhâikhom,
xawen ge ǃgâ ǂgao tama ge i,
ǁnā-amagats ge ǁîna khākhoena ge māǁnâ.
31 Xawets ge sa ǀkhomxaǂgaosib ǃaroma,
ǁîna ǁnāxū tamas ka io hîkākā tama ge i.
Sats ge ǃgâi tsî ǀkhomxaǂgao Elotsa.
32 “Elo, mâtikōsets a kai sida Elotse,
sats ge ǀgaisa tsî ǃaoǃaosa.
Sats ge sa ǃgaeǀhaos di mîmâide ra ǃkhōǀgaipe.
Asiriab gao-aogu xa da ge ǁgâiǀāhe ǁaeba xu
tsî nēsis kōse mâtikōse da ge tsâ.
Sida gao-aogu, ǂgaeǂgui-aogu, pristergu tsî kēbo-aogu,
sida aboxagu tsî sida khoen hoan ge ge tsâ.
ǂÂi re, mâtikōse da ge tsâ ǃkhaisa.
33 ǂHanusets ge sida ge ǁkhara.
Sats ge ǂhanu-aise ge sîsen,
xawe sida ge ge ǁore.
34 Sida aboxagu, gao-aogu, ǂgaeǂgui-aogu tsî pristergu
ge sa ǂhanuba ǃkhōǀgaipe tama ge i.
ǁÎgu ge sa mîmādi tsî ǃkhâikhomde ǃgâ ǂgao tama ge i.
35 Sa ǀkhaeb ǀkha gu ge gao-aoga sa ǁaesa gere ǂgaeǂgui,
sats ge ǁîna mā kai tsî ǂûǂûxa ǃhūb ǃnân ge hâ io,
xawe gu ge ǁorena xu ūdabasen tsî satsa ǃoaba tama ge i.
36 Tsî da ge nēsi sats ge mā da ǃhūb ǃnâ khobose hâ,
nē ǂûǂûxa ǃhūb, ǂûna ra mā dab ǃnâ.
37 ǃHūb di ūǀkhīn ge a gao-aogu di,
gao-aogu ǁore da ge, ots ge sida gaoǂam kaiga.
ǁÎgu ge sida tsî sida ǂgarib ǀkha ǂâi gu ra khami ra sîsen,
tsî da ge sida kai ǂōǂōsib ǃnâ hâ.”
ǁAes ge ǃgaeǀhaosa ra xoaǁgui
38 Sida ǀkha ge ī xūn hoan ǃaroma da ge sida, Israelǁîda ǃgaeǀhaosa go xoaǁgui. Tsî gu ge sida ǂgaeǂgui-aogu, Leviǁîgu tsî pristergu tsîga ǁîsa nî ǂganamǀgaiǀgai.
© Khoekhoegowab Elobmîs © Bible Society in Namibia, 2020.
