Nehemiab ge ǀgâsana ra hui
1 ǁAe-i khaoǃgân ge ǂgui aogu tsî taradi tsîna ǁîn di ǃgâsa Jodeǁîn ǃoagu ge ǂkhîoǃnâ. 2 ǀNîn ge “Sida omaris ge ǂgui khoena ūhâ, tsî da ge ǃhoro-e ǂhâba hâ, î da ûitsamase hâ ǁkhā” ti gere mî.
3 Naun ge “Sida ge sida ǃhanagu, sida draibeǃhanagu tsî sida omdi tsîna ǃâtsūǀkhāb ǃnâ da ǁō tidega surudeb ai ge māxū” ti gere mî.
4 ǀNîn ge ge mî: “Sida ge sida ǃhanagu tsî draibeǃhanagu ǂama da gao-aob di ǁgui-aimarisa nî matare ǁkhāse, mari-e ge ǀkhupi. 5 Sida tsîn ge nau Jodeǁîn ǁkhān di ǁaes di. Sida ôana ǁîn din khami i taman hâ? Xawe da ge sida ôana ra khobodī. ǀNai di ge ǀnî ǀgôadi sida dide khobose ge ǁamaxūhe. Sida ge xū-i xare-e a dī ǁoa, sida ǃhanagu tsî draibeǃhanagu tsîga da ge ūxūhe xui-ao.”
6 ǁÎn di ǃgaesensa ta ge ǁnâu, o ta ge kaise ge ǁaixa. 7 Nē ǃkhaisa ta ge ǂâiǃgâs khaoǃgâ ta ge ǁaes di ǂgaeǂgui-aogu tsî ǂamkhoegu tsîga ǂgaihā tsî ǁîgu ǃoa ge mî: “Sago ge sago di ǃgâsa Jodeǁîna ra ǁgâiǀā.”
Tsî ta ge horaga ǀhûhâsiba, nē ǃgomsib nî ǃhoaǂamhega ǂnûsa ǃoa ǂgaiǀhao 8 tsî ge mî: “ǁKhā da as kōse da ge sada Jodeǁî khoen, ǃhaokhoen ai ge ǁamaxūhe hâ ina ge ǁama-oa. Tsî du ge nēsi sadu, ǁîn di ǂhunuma khoedo, ǁîna sadu ain nî ǁamaxūsens ǃoa ra ǁgari.” O gu ge ǂgaeǂgui-aoga ge ǃnō tsî tare-e gu nî mî ǃkhaisa ge ǀū i.
9 O ta ge ge mî: “ǃGâi tama ǃkhais ge nē go ra dīsa. Sada Eloba ǃaoǃgâ, î go ǂhanuse sîsen, o go ge ǀūben, sada khākhoena sadan nî ǃgôaǁnâba ǃaroma-e mā tide. 10 Tita, ti sîsenǁare-aogu tsî ti ǃgāgu tsîge tsîn ge khoena mari-i tsî ǃhoro-i tsîna ra ǀkhupi. A ge nēsi matare-oan nîsa ǁîna ǂgaoǀkhāǀû. 11 ǁÎn di surudeb hoaragaba, mari-i dib kas, ǃhoro-i dib kas, ǂauxûi-i dib kas, ǀkhera-oli-i dib kas hoasa ǀariǂui; î ǁîna ǁîn di ǃhanagu, draibeǃhanagu, ǀkherahaiǃhanagu tsî omdi tsîna nēsi mā-oa.”
12 O gu ge ǂgaeǂgui-aoga ge ǃeream: “Sats go mî khami ge nî dī. Xūna ge ge nî mā-oa tsî ge ge khoena xū-e ǂgaoǀkhā tide.”
O ta ge pristerga ǂgaiǀhao tsî ǂgaeǂgui-aoga mîmâi gu go khami gu nî dīsa ǁîgu aiǃâ ge nū kai. 13 ǁNās khaoǃgâ ta ge ti gamanab ai ta ge ǃgae hâ i ǁgarusa ūǁnâ tsî ǃgubuǂuiǃnâ tsî ge mî: “Nētib ge Eloba, mîmâib go khami ga dī tama i khoeb hoab ǀkha nî dī. ǁÎb ge sago omdi tsî sago xūn hoana nî ūxū go tsî ǀgui xū-i tsîna ǁnāxūba go tide.”
On ge ǁnāpa ge hâ i khoen hoana “Amen” ti mî tsî ǃKhūba ge koa. Tsî ǂgaeǂgui-aogu ge mîmâi gu ge khami ge dī.
Nehemiab ge nau khoen xa ra ǂâiǂhansen
14 ǀGamdisiǁî kurib Artaxerxesi ǂgaeǂguis diba xu ǃnonadisiǀgamǀaǁî kurib kōse ta ge disiǀgamǀa kuriga Judab gowoniase hâ i, o da ge tita kas, ti ǀaokhoen kas hoasa, gowoniase ta a mā-amsa ǂû-i xare-e ge ǂû tama hâ i. 15 Ti aiǃâ ge hâ i gowoniagu hoagu ge ǁaesa ǃgomsib ase ge iba i tsî ǁîna ǂûn tsî ǂauxûi-i tsîn xōǀkhā hakadisi ǀhaiǀuri maride tsēkorobe gere ǂgaoǀkhā. ǁÎgu di ǃgāgu tsîn ge khoena gere ǁgâiǀā, xawe tita ge ǁnāti ge dī tama hâ i, eloǃaoǃgâxa ta a xui-ao. 16 Nē ǂnubiǂgoaba ǂnubikhâis ǃnâ ta ge ǀoasase ge ǁguiǂgāsen tsî ǃhū-i xare-e tise ūbasen tama ge i. Ti ǃgāgu hoagu ge nē ǂnubikhâis ǃnâ tita ǀkha gere sîsenǀhao. 17 ǀGuikaidisi tsî korodisi Jodeǁîn tsî ǁîn ǂgaeǂgui-aogu, tsî ǁkhāti ǃhao ǁaede xu gere oahā khoen tsîn hoan ge ti tāb tawa gere ǂû. 18 Mâ tsēs hoasa ta ge ǀgui gomab, ǃnani ôaǂuisa gūn tsî anin tsîna gere aiǂhomi tsî mâ disiǁî tsēs hoasa ǂauxûi-e ǃnāǂamsase. Xawe ta ge mâtikō ǃgommas ǁaesa tani hâ ǃkhaisa ta a ǂan xui-ao, gowoniab nî hōse i ǂûna māhesa ge ǂgaoǀkhā tama hâ i. 19 Ti Elotse ǂgan ta ge ra, nē ǁaesa ta ge dīban hoan ǃaroma dīdawa-am te re.
© Khoekhoegowab Elobmîs © Bible Society in Namibia, 2020.
