Khākhoen ge ǂnubisîsenna noxopa ra mâǃoa
1 Sanbalati ge Jodeǁîda ǂnubiǂgoaba ra ǂnubikhâi ǃkhaisab ge ǁnâu, o kaise ǁaixa tsî sida ge ǃhōtsoatsoa. 2 ǁÎb di sîsenǁare-aogu tsî Samariab toroǂnubis tsîn mâ ra ǁnâuseb ge ge mî: “Tare-en nē ǀkhomǀkhomsa Jodeǁîna ra dī? ǂNubiǂgoaban kha ǁkhawa ra ǂnubikhâi ǂgao? ǁGuibade dīs ǀkhan ǁîba ǀgui tsēs ǃnâ nî ǂnubitoa tin ra ǂâi? ǂNubi-ū ǀuide nē khauǃkhūhe hâ ǂgoaǁkhoposa xu ǂnubi ǁkhān nî?”
3 Tobiab ge ǁnāpa ǁîb xōǀkhā mâ tsî ge mî: “Mâ ǂnubiǂgoa ǃnôa-en kha ǁîna nî ǂnubimâi ǁkhā? Nē ǂnubiǂgoab ge ǀgirib ga ǁîb ai uri, o nî ǁnā.”
4 O ta ge ge ǀgore: “Sida Elotse ǁnâu re, mâti da ra ǃhōhesa. Ab nē ǃharaxūba ǁîn ǂûn di danadi ai ǁgôaxa re. An ǃkhōsabese ǃhao ǃhū-e ǃoa ǃgû-ūhe re. 5 Tā ǁîn di ǂkhabadība ǀûba ni, î ǁîn di ǁoreba tā ǀuru, ǁîn ge sida, ǂnubi rada go ǃhasara.”
6 ǁNāti da ge ǂnubiǂgoaba ǂnubis ǀkha aiǃgû tsî ǁîba ǃkhareǀgapib kōse ǂnubikhâise, khoen ge kaise sîsenturaxa i xui-ao.
7 Sanbalati tsî Tobiab tsî Arabiab, Amonni tsî Asdods di khoen tsîn ge Jerusalems ǂnubiǂgoab ǁkhawa ra ǂnubikhâihe tsîdi khôa hâ ǃkhaide ra omǂganhe ǃkhaisan ge ǁnâu, o kaise ge ǁaixa. 8 Tsîn ge ǁîn hoana ge ǀapeǀhao, în Jerusalemsa hā ǁnāǂam tsî ǀgaruǀgarusiba hā-ū, 9 xawe da ge sida, sida Elob ǃoa ǀgore tsî tsēs tsî tsuxuba ǃûi-aoga ǁîn ǃoagu ge mâi.
10 Judab khoen ge ǁnaetsana-e gere ǁnae:
“ǃGom xūna tanis xa da ge ra ǂkhabu;
Ūkhâi da nîse i ǁkhopos ge kaise a kai.
ǂNubiǂgoaba da ge a ǂnubitoa ǁoa.”
11 Sida khākhoen ge ǁîna da mû tide tamas ka io tare-i ra īsa ǂan tide, sida hāǂam tsî ǃgam tsîn sîsenna nî ǀam kais kōse, ti ge ǂâi hâ i. 12 Xawen ge sida khākhoen ǁaegu ǁan hâ Jodeǁîna, sida khākhoen sida ǃoagu ra dī ǀapede ǃnākorobe hā gere mîba da. 13 ǁNā-amaga ta ge gôagu, ǁhâigôagu tsî khādi ǀkha ǁâtanisen hâ khoena, ǁîn ǃhaoǃnāde ǃoa ǀgoraǂgā tsî ǂnubiǂgoab noxopa dītoahe tama ǃkhaidi tawa ǃgâbǀkhāb ai ge mâ kai.
14 ǁAes gere ǂâiǂhansen ǃkhaisa ta ge mû, xui-ao ta ge ǁîn tsî ǁîn ǂgaeǂgui-aogu tsî ǂamkhoegu tsîna ǃoa ge mî: “Tā sada khākhoen xa ǃao. ǂÂi re mâtikōseb ǃKhūba kai tsî ǃaoǃaosa ǃkhaisa, î sadu ǃhūǁîn, sadu ôan, sadu taradi tsî sadu omdi tsîna ǃkhamba.” 15 Sida khākhoen ge ǁîn ǀapede da ge ǂanǃnâ ǃkhaisa ge ǁnâu, tsî Elob ge ǁîn di ǀapeǀhaosa ǁauǁau ǃkhaisa ge hōǃâ. Tsî da ge sida hoada ǁkhawa ǂnubiǂgoab ǁga, sida sîsenna ǃoa ge oa.
16 ǁNā ǁaeba xub ge ǀgui ǃkhare ǃâb, ti aogu diba sîsen tsî nau ǃkhareǃâba ǁkhaubasen saragu, ǁhâigôagu, ǁkhaukhōdi tsî khādi tsîn ǀkha gere ǃûimâ. Tsî sida ǂgaeǂgui-aogu ge sida khoen, 17 ǂnubiǂgoaba gere ǂnubina ǀoasa ǂkhâǃnâsa gere mā. ǂNubi-ū xūna gere tani khoegu tsîn ge ǀgui ǃommi ǀkha sîsen tsî naub ǀkha ǁâtani-e gere tani. 18 ǂNubi ra aogu ge mâb hoaba, gôaba ǁîb gamanab ai ge ǃgae hâ i. Xâiǁnâsa nî xâi khoeb ge tita ǀkha ge hâ i. 19 Tita ge ǁaes tsî ǁîn ǂamkhoegu tsî ǂgaeǂgui-aogu tsîna ge mîba: “Sîsenni ra dīhe ǃkhaib ge kaise a kai tsî da ge ǂnubiǂgoab ai kaise ǀgorasase hâ. 20 Xâiǁnâs ǀōba du ga ǁnâu, o sikhom tawa ǀhao. Sada Elob ge nî ǃkhamba da.” 21 ǁNāti ge ge ǃkhare ǃâb âge mâ tsēs hoasa, ǁgoaǃaromasa xu ǀgamirodi nî ǁhais kōse sîsenni ǀkha gere aiǃgû, nau ǃkhare ǃâb ǁhâigôagu ǀkha ǃûimâ hîa.
22 ǁNā ǁaeb ǃnâ ta ge sîsenaogu tsî ǁîgu di hui-aogu tsîga ge mîba tsuxuba Jerusalems ǃnâ hâsa, î gu tsuxuba ǃāsa ǃûi tsî tsēa sîsenna dī. 23 Tita kas, ti sîsenǁare-aogu kas, ti ǃgāgu kas, ǃûi-aogu kas hoas ge tsuxubas tsîna ge ǁhûsen tama hâ i. Sige hoage ge ǁâtanin âge ǃomǁae gere ūhâ.
© Khoekhoegowab Elobmîs © Bible Society in Namibia, 2020.
