Markub 3 - Khoekhoegowab New Translation 2020 (KKG20)

ǃHom hâ ǃomma ge ūhâ i khoeb

1 ǁKhawab ge Jesuba sinagogeb* ǃnâ ǂgâ, ob ge ǃhom hâ ǃomma ūhâ khoeba ge hâ i. 2 O gu ge Farisega Jesuba xū-e tsūse dī hâb ase ǀhapimā ǂgao tsî ǂōrisase gere kō, Jesub nē khoeba Sabbattsēs* ai nî ǂuruǂuru ǃkhaisa. 3 Ob ge Jesuba ǃhom hâ ǃomma ūhâ khoeba ge mîba: “Nēpa ǀkhī re.” 4 Tsîb ge ǁîna ge dî: “ǂHanu i a, Sabbattsēs ai da ǃgâi sîsenga nî dīsa tamas ka io tsū sîsenga da nî dī? Khoe-i di ûiba da nî sâu tamas ka io da kha nî hîkākā?”

Xawe i ge ǀgui-i tsîna xū-e ǃhoa tama ge i. 5 Ob ge Jesuba khoena ǁaixasib ǀkha ge kō, xaweb ge ǁkhāti ǁîn di ǃgariǂgaoxasib xa kaise ge ǃoa. Tsîb ge khoeb ǃoa ge mî: “Sa ǃomma ǀhōǂui re.” ǁÎb ge ǃommi âba ge ǀhōǂui tsîb ge ǃhom ge hâ i ǃomma ǁkhawa ge ǂuru. 6 O gu ge Farisega sinagogeba xu ge ǂoa. Tsî ǁnātimîsi gu ge Jesuba ǃgams ǃaroma ǀapena Herodeb di saoǃgonaogu ǀkha ge dītsoatsoa.

Kai ǂnubis ge Jesub ǃoa ra hā

7 Ob ge Jesuba ǁîb di ǁkhāǁkhāsabega* huri-ammi ǁga ge ǂgaeǂguiǁgôa. Tsîn ge kai ǂnubis di khoena Galileab, Judeab 8 tsî Jerusalemsa xu ge sao bi. Khoen ge Idumeaba xu tsî ǀkhara ǃkhain Jordanǃāb di aiǂoas ǃnâ ǁgoena xu ge ǀkhī. ǁÎn ge ǁkhāti Tirus tsî Sidons di ǂnamipe hâ ǃāde xu ge ǀkhī. Nē ǂnubis hoaragas ge Jesub ra dī xūnan ge ǁnâu, o ge sī. 9 ǁNātikōse ī tsîb ge ǁkhāǁkhāsabegu âba ge mîba, î gu ǂgauro-e ǂhomi, îb tā nē ǂnubis xa ǀāhe. 10 Jesub ge ǂgui khoena ǂuruǂurutoas khaoǃgân ge ǀaesen hâna gere ǀkhoma, ǁîba tsâǀkhāsa. 11 Tsî ǂkhaba gagan ge Jesuban gere mûo, ǃhūb ai ǁnāǁgoe tsî “Sats ge Elob di Ôatsa!” ti gere ǂgaiǂui.

12 Ob ge Jesuba ǂkhaba gagade ǁîb a tari ǃkhaisa ǃhoasa ge ǃkhâikhom.

Jesub ge disiǀgamǀa apostelga ra ǁhûiǂui

(Mateub 10:1-4Lukab 6:12-16)

13 Ob ge Jesuba ǃhommi ai ǃapa tsî ǀnî ǁkhāǁkhāsabegu âba ge ǁkhau, o gu ge ge sī. 14 Tsîb ge disiǀgamǀagu, apostelgu* tib ge ǂgaiga ge ǁhûiǂui, ǁîb ǀkha gu nî hâse. ǁKhātib ge ǁîba ǁîga ge sîǂui, aoǁnâ 15 tsî gu nî ǁgâuaga* ǃhaeǂuis di ǁkhāsiba ūhâse.

16 ǁÎgu ge: Simonni Petrub tib ge ǀonǂgaib, 17 Jakobub tsî Johaneb tsîkha, Sebedeub ôakha, Boanerxekha tib ge ǀonǂgaikha, nēs ge “ǃGurub di ôakha” ti ra ǂâibasen. 18 Andreab, Filipub, Bartolomeub, Mateub, Tomab, Alfeub ôab Jakobub tsî Tadeub, Simonni, Māsenxa ǀGuib tis tsîna ge ǂansa ib, 19 tsî Judab Iskariotǁîb, Jesuba ge ǀapexūb tsîga.

Jesub tsî Beelsebuli

(Mateub 12:22-32Lukab 11:14-23Lukab 12:10)

20 Ob ge Jesuba oms ǁga ge oa, tsîs ge ǁkhawa kai ǃgôab di ǂnubisa oms tawa ge sī, ǂnûsoa-i tsîn ge ǃaruǀî ǀkhai is kōse. 21 Tsî Jesub di ǀaokhoen ge tarenab ra dī ǃkhaisa ǁnâu, on ge ǁîba nî ǃkhōǃnomǃnomse ge sī, ǃkhaub ra tin ge ǂâi xui-ao.

22 O gu ge Moseb ǂhanub* di ǁkhāǁkhā-aoga Jerusalemsa xu ǀkhī tsî ge mî: “Nē khoeb ge Beelsebuli,* ǁgâuagu di danaǂgaeǂgui-aob ǀgaib ǃnaka hâ! ǁNātikōse ī tsîb ge Beelsebuli di huib ǀkha ǁgâuaga ra ǃhaeǂui.”

23 Jesub ge khoena ǁîb ǂnamipe ǀhaoǀhao tsî ǁîna ǂkhōdi* ǃnâ-u ǃhoa-ū tsî ge mî: “Mâtib kha Satanna* Satanna nî ǁgariǂui? 24 ǁÎǃnābe ra ǃkham gaosib ge gaxuse hâhâ tide. 25 Tsî oms hîa a ǀgorasas tsîn ge nî ǀgaru. 26 Tsîb ga Satanna ǁîb ǂûb ǃoagu ǃkham, os ge ǁnāsa ǁîb di ǀamsa nî ǂâibasen.

27 “Mâti i khoe-e ǀgaisa khoeb di oms ǃnâ khôaǂgâ tsî ǁîb di xūna nî ǃnari, aibe i ga nē ǀgaisa khoeba ǃgaeǂnûi tama io? ǁNās khaoǃgâ ǀgui i kom ǁîb oms ǃnâ khôaǂgâ tsî a ǃnari ǁkhāo.

28 “Amase ta ge ra mîba du, hoa ǁorena du ge nî ǀûbahe, ǁoren tsî ǃkhāǃkhās, mâs ǀguis ga ǃkhāǃkhā xawe. 29 Xawe ǃAnu Gagaba du ga ǃkhāǃkhā, o du ge tātsē ǀûbahe tide tsîb ge nē ǁoreba ǀamose sadu ǃoagu nî ǃgôa.”

30 Khoen gere ǁîb ǂkhaba gaga-e ūhâ ti mî, xui-aob ge Jesuba nēsa ge mî.

Jesub di îs tsî ǁîb ǃgâsagu

(Mateub 12:46-50Lukab 8:19-21)

31 On ge Jesub îs tsî ǃgâsagu tsîna ge ǀkhī. ǁÎn ge ǃauga mâ tsî khoe-e ǁîb ǁga ge haisi, îb ǂoaxa. 32 Os ge Jesub di ǂnamipe ge ǂnôa i ǁaesa ge mîba bi: “Sa îs, sa ǃgâsagu tsî ǃgâsadi tsîn ge ǃauga hâ tsî ra ǀhao-ū tsi ǂgao.”

33 Ob ge Jesuba ge dî: “Tarisa kha ti î tsî tariga ti ǃgâsa?” 34 ǁNās khaoǃgâb ge ǁîb ǂnamipe ge ǂnôa i khoena kō tsî ge mî: “Nēn ge ti î tsî a ti ǃgâsa. 35 Mâ-i hoa-i hîa Eloba ra ǁnâuǀnam-i ge a ti aore tsî tare ǃgâsa, tsî a ti î.”