Jesub ge ǃhom hâ khoeba ra ǂuruǂuru
(Mateub 9:1-8Lukab 5:17-26)1 Jesub ge Kapernaums ǁga ge oa tsî ǀnî khami kō tsēdi khaoǃgân ge khoena ǁîb oms tawa hâ ǃkhaisa ge ǁnâu. 2 On ge ǂguin âna oms tawa ge sī, oms ge ǀoaǃnā tsî i ge dao-ams tsîn tawa soa-e ǀkhais kōse.
Jesub aoǁnâs ǀkha ǀhabe 3 hîa gu ge haka khoega ǃhom hâ khoeba, tani hâse ǁîb ǃoa ge hā-ū. 4 ǂNubis khoen ǃaroma gu ge ǁîba Jesub tawa ge sī-ū ǁoa i. O gu ge Jesub ge mâ i ǃkhais ai, oms ǂamǃnâba ǁkhowabē tsî ǁnā ās hîa gu ge kurus ǃnâ-u khoeb ge ǁgoe-ai i kharoba ge ǁgôa kai.
5 Jesub ge ǁîgu ǂgomsab ge mû, o ǃhom hâ khoeb ǃoa ge mî: “ǀGôatse, sa ǁorenats ge go ǀûbahe.”
6 Tsî ǀnî Moseb ǂhanub* di ǁkhāǁkhā-aogu ge ǁnāpa ǂnû tsî ǁîgu ǂgaogu ǃnâ nē xūn xa gere ǂâiǂâisen, 7 “Tare-i ǃaromab nē khoeba ǁnāti ra ǃhoa? ǁÎb ge Eloba ra ǃkhāǃkhā. Elob ǀguib ge ǁorena ǀûba ǁkhā.”
8 ǁNātimîsib ge Jesuba ǁîb di gagas ǃnâ tare-e gu ra ǁîǃnābe ǃhoa ǃkhaisa ge ǂan. Ob ge ǁîgu ǃoa ge mî: “Tare-i ǃaroma go nēti ī xūna sago ǂgaogu ǃnâ ra ǂâi? 9 Mâsa kha supu, nē ǃhom hâ khoeb ǃoa ‘Sa ǁorenats ge go ǀûbahe’ ti mîs tsî ‘Khâimâ, sa kharoba ūkhâi îts ǃgû’ ti mîs tsîra xa? 10 Xawe du ge Khoen Ôab ǁorena ǀûbas di ǁkhāsiba ǃhūbaib ai ūhâ ǃkhaisa nî ǂan.” Ob ge Jesuba ǃhom hâ khoeb ǃoa ge mî, 11 “Khâimâ, kharob âtsa ūkhâi îts oms ǁga oa!”
12 Ob ge khâimâ tsî ǁnātimîsi kharob âba ūkhâi tsî hoa khoen ra kō bise ge ǃgûǂoa. Hoaraga khoen ge burugâ tsî Eloba koa tsî ge mî: “Nēsa da ge sida noxopa mû tama ge hâ i!”
Jesub ge Leviba ra ǂgai
(Mateub 9:9-13Lukab 5:27-32)13 ǁKhawab ge Jesuba Galileahurirob di huri-ammi ǁga ge ǃgû. ǂGui ǃgôab di khoen ge ǁîb ǂnamipe ge ǀhao tsîb ge ǁîna gere ǁkhāǁkhā. 14 Tsî ǃkharub garu hîab ge Levib, Alfeub ôaba ǁgui-aimariǃkhōǃoaberos ǃnâ mûǂnôa tsî ǁîb ǃoa ge mî: “Tita sao re!” Ob ge khâimâ tsî Jesuba ge sao.
15 Tsî ganupeb Jesuba tāb tawa Levib di oms ǃnâ ǁîb di ǁkhā ǁkhāǁkhāsabegu* ǀkha ra ǂû hîan ge ǂgui ǁgui-aimariǃkhōǃoa-aon tsî ǁore-aon tsîna hā tsî ǁîgu ǀkha tāb tawa ge ǁhao. ǂGui khoen ǁnāti īn Jesuba ge sao hâ i ǂnubis ǃnâ ge hâ i xui-ao.
16 ǀNî Farisegu* Moseb ǂhanub di ǁkhāǁkhā-aogu* digu ge Jesub tsî ǁîb di ǁkhāǁkhāsabegu* ra ǁgui-aimariǃkhōǃoa-aon tsî ǁore-aon tsîn ǀkha ǂûǀhao ǃkhaisa mû, o ǁîb di ǁkhāǁkhāsabega ge dî: “ǁÎba kha mariǃkhōǃoa-aon tsî ǁore-aon tsîn ǀkha ra ǂûǀhao?”
17 Tsî nēsab ge ǁnâu, ob ge Jesuba ǁîga ge ǃeream: “ǂUru khoen ge ǀaedī-ao-e ǂhâba tama hâ, xawe ǀaesen hân ge ǂhâba bi hâ. ǂHanu-aina nî ǂgaise tama, xawe ǁore-aona nî ǂgaise ta ge ge hā.”
ǂÛtama* hâs xa hâ dîs
(Mateub 9:14-17Lukab 5:33-39)18 Johaneb ǁĀǁnâ-aob di ǁkhāǁkhāsabegu tsî Farisegu tsîn ge ǂûtama gere hâ. On ge ǀnî khoena Jesuba ge dî: “Tare-i ǃaroma gu Johaneb ǁĀǁnâ-aob di ǁkhāǁkhāsabegu tsî Farisegu tsîga ǂûtama ra hâ, xawe gu sa ǁkhāǁkhāsabega nēsa dī tama hâ?”
19 Ob ge Jesuba ge ǃeream: “O du kha ǁkhausaben ǃgameǁâus tawa ǂûtama nî hâ ti ra ǂâi, ǃgame-aob ganupe ǁîn ǀkha hâ hîa? 20 Xawe ǁaeb ge nî hā ǃgame-aob ǁîna xu nî ūbēheba, on ge ǂûtama nî hâ.
21 “Khoe-i xare-i kom ǀasa ǃnaba-e ǀoro sara-i ai ǂomǂnûi tamao. ǀAsa ǃnabas ge ǁnāsa ǀgonsen tsî kai āsa nî doa. 22 ǁKhāti i kom khoe-e ǀasa ǂauxûi-e ǀoro ǃgapagu ǃnâ ǁai tamao. ǂAuxûi-i ge ǀoro ǃgapaga nî ǂari kai. Tsî i ge ǁnā ǂauxûi-e ǂoaǃnâs ase nî ī, tsî gu ge khōga nî ǁgai. ǀAsa ǂauxûi-i ge ǀasa ǃgapagu ǃnâ nî ǁaihe.”
Sabbattsēs* xa hâ dîs
(Mateub 12:1-8Lukab 6:1-5)23 Sabbattsēs aib ge Jesuba ǃhoroǃhanagu ǃnâ ge ǃgûǃkharu. ǁÎb di ǁkhāǁkhāsabegu ge ǁîb ǀkha gu garuse ǃhorodanade ge ǂgaeǁnâ. 24 O gu ge Farisega Jesuba ge dî: “Tare-i ǃaroma gu sa ǁkhāǁkhāsabega ǂHanub xa Sabbattsēs ai dīsa mā-amhe tama ǃkhaisa ra dī? ǁÎgu ge ǁnāsa dī ǁoa!”
25 Ob ge Jesuba ge ǃeream: “Sago kha ǁnâu tama hâ Davidi ge tare-e dīsa, ǁîb tsî ǁîb horesagu tsîgu ge ǃâ ǃnubai? 26 Abiatari, ǀgapipristeri* di ǁaeb ǃnâ ge is ge, Davidi ge Elob di ommi ǃnâ ǂgâ tsî ǁguibaperegu, pristergu ǀguigu ge ǂûsa mā-amsa iga ǂûsa. ǁÎb ge ǁkhāti ǁîb di saoǃgonaon tsîna ge mā.”
27 Tsîb ge Jesuba nēti ge ǀamǀam: “Khoen ge Sabbattsēs di ǃgâib ǃaroma ǂnubihe tama hâ. Sabbattsēs ge khoen di ǃgâib ǃaroma ge ǂnûiǂgāhe. 28 ǁNā-amagab ge Khoen Ôaba Sabbattsēs on di ǃKhū.”
© Khoekhoegowab Elobmîs © Bible Society in Namibia, 2020.
