Jesub di khâis
(Mateub 28:1-8Lukab 24:1-12Johaneb 20:1-10)1 Tsî nautsēkamǁgoaga, Sabbattsēs* di ǀams ai di ge Maria Magdalenas, Marias Jakobub îs tsî Salomes tsîde Jesub sorosa di nî ǂkhau-ū ǃgâihamoli-e ge ǁamaǃgû. 2 Sâtsēkam ǃnauǁgoaga sores ǁhaib ǀkha di ge ǀhobas tawa ge sī. 3 ǁÎdi ge garu di a daob ǃnâ tari-i nî ǀuisa ǀhoba-amsa xu garibēba di ǃkhaisa gere dîgu. 4 Tsî ǀhobas tawa sī tsî di ge a kōkhâi, o di ge amase ge kaise kai i ǀuis, ǀgui ǀkhāb ǁga garibēsa ǃkhaisa ge mû. 5 ǀHobas ǃnâ di ge ǂgâ, o di ge amǀkhāb ai ǂkham khoeb, ǃuri saraba ana hâba ge mûǂnôa. O di ge kaise ge ǃhuri, 6 ob ge ǀhomǃgāba ǁîdi ǃoa ge mî: “Tarexa so ǁnātikōse ra buru? Saso kom Jesub Nasaretǁîb, ǃgâuhe geba ra ôao? ǁÎb ge ǃaruǀî nēpa a ǀkhai! Elob ge ǁîba ǁōba xu go ūkhâi! Kō re, ǁîb go ǁgoe i ǃkhaisa. Elob ge ǁîba ǁōba xu go ūkhâi! 7 ǃGû re, î ǁîb di ǁkhāǁkhāsabega* sī mîba, ǁkhāti Petrub tsîna mîba re, Jesub sadu aiǃâ Galileab ǁga nî ǃgû tsî du ǁîb di ǁōb aiǃâ du ge mîbahe khami ǁîba ǁnāpa sī nî mû ǃkhaisa!” 8 O di ge nē tarade kaise ǃhuri tsî ǀkhū rase ǀhobasa xu ge ǃkhoe-oa. ǁÎdi ge ǁnātikōse ǃaob ǃnâ hâ tsî khoe-i xare-e xū-e mîba tama ge i.
ǀORO ǀAMǀAMS ǃGÂIǂHÔAS MARKUB DIS
Jesub ge Maria Magdalenasa ra ǂhai
(Mateub 28:9-10Johaneb 20:11-18)[9 Tsî Sâtsēkam ǃnauǁgoagab ge Jesuba ǁōba xu khâi, ob ge Maria Magdalenas, ǁîsa xub ge hû ǁgâuaga* ǃhaeǂui hâ is xa ǂguro ge mûhe. 10 Os ge ǃgû tsî kaise noxopa Jesub di ǁōb xa gere ǃhoa tsî ā ǁkhāǁkhāsabega sī ge mîba. 11 Xawe gu ge ǁîga ǁîs ge hā-ū ǂhôas, Jesubas go ûib hâse mûsa ǂgom tama ge i.
Jesub ge ǀgam ǁkhāǁkhāsabekha ra ǂhai
(Lukab 24:13-35)12 Ob ge ega ǁkhāti ǀgamkha hîa Jerusalemsa xu gere ǃgûǂoa kha ǀkhara īsib ǃnâ ge ǂhai. 13 ǁÎkha ge oa tsî nauna sī ge ǁgamba, xawen ge ǁîkha tsîna ǂgom tama ge i.
Jesub ge disiǀguiǀaga ra ǂhai
(Mateub 28:16-20Lukab 24:36-49Johaneb 20:19-23ǃNaeǃkhaidi 1:6-8)14 ǁNās khaoǃgâb ge Jesuba tāb tawa gu ǂûǂnû hâ hîa disiǀguiǀaga ge ǂhai. Tsîb ge ǁîga ǁîgu di ǂgomoǃnâsib tsî ǃgariǂgaoxasib, ǁîb di khâis khaoǃgâ ge ǁîba mû khoena gu ge ǂgom tama i ǃkhais dis ǃaroma ge ǃgabe.
15 Tsîb ge ǁîga ge mîba: “ǃGûǂoa hoaraga ǃhūbaib ǃnâ, î ǃGâiǂhôasa hoaraga khoen ǃhūbaib ai hâna aoǁnâba. 16 Mâ-i hoa-i ǂgom tsî ga ǁāǁnâhe-i ge nî ǃgâiǃō, xawe ǂgom tama ga in ge nî ǀgoraǃgâhe. 17 Sao ra saodi ge ǁnān ǂgom rana nî hâǀkhā: ǁÎn ge ti ǀons ǃnâ ǁgâuaga nî ǃhaeǂui tsîn ge ǀasa gowaga nî ǃhoa. 18 ǁÎn ge ǀaonan ga ūkhâi tsî ǃgāxa ǁōǁōsa xū-e ā, xawe tātsē ǂkhôadīhe tide. ǁKhātin ge ǀaesen hâna ǃomga nî ǁgui-ai, on ge nî ǂgau.”
Jesub di ǀhomǃapas
(Lukab 24:50-53ǃNaeǃkhaidi 1:9-11)19 Tsî ǁîgu ǀkhab ge a ǃhoatoas khaoǃgâb ge ǃKhūb Jesuba ǀhommi ǃnâ ge ūǂgāhe tsîb ge ǃgôasib di ǃkhais ai, Elob di amǀkhāb ai sī ge ǂnû. Jesub di ǀhomǃapas 20 Tsî gu ge ǁkhāǁkhāsabega hoa ǃkhain ai ǃgûǂoa tsî gere aoǁnâ, tsîb ge ǃKhūba ǁîgu ǀkha sîsen tsî buruxa dīn hîa gere dīhen a ama ǃkhaisa gere ǃkhō-am.]
ǀNÎ ǀORO ǀAMǀAMS
[9 Taradi ge Petrub tsî ǁîb di ǀhōsagu ǃoa ǃgû tsî mîbahe di ge xūn hoan xa ǃnuriba ge mā. 10 Nēs khaoǃgâb ge Jesuba aitsama ǁîb di ǁkhāǁkhāsabegu ǃnâ-u, aiǂoasa xu huriǂoas kōse ǃanu tsî ûihâhâ ra ǂhôas, ǀamo ores disa ge sîǂui.]
© Khoekhoegowab Elobmîs © Bible Society in Namibia, 2020.
