Markub 12 - Khoekhoegowab New Translation 2020 (KKG20)

Draibeǃhanab di ǁamaǀkhupi-aogu xa hâ ǂkhōs*

1 Ob ge Jesuba ǂkhōdi ǃnâ-u ǁîn ǀkha ge ǃhoatsoatsoa: “Khoeb ge draibeǃhanaba ǂgā tsî ǂnubiǂgoab ǀkha ge omǂnami. ǁÎb ge draibeǀāǃnâ-āsa khao tsî ǃkhēǂgō-omma ge om. ǁNās khaoǃgâb ge ǁamaǀkhupi-aogu ai nē ǃhanaba ǀkhupiǂui tsî ǃnū ǃhūb ǁga ge ǃgû. 2 ǃGaos di ǁaeb ge ǀoa ob ge ǀhonkhoeba ǃgāgu âb di ǀguiba ge sî, îb ǁîb di ǃâs, draibeǃhanab ǂûn disa ǀhaoǀhaobahe. 3 O gu ge nē ǁamaǀkhupi-aoga nē ǃgāb hîa ge sîheba ǃkhō, ǂnau tsî ǀkhaiǃomse ge sîǁaru.

4 “ǁKhawab ge ǀhonkhoeba ǀnîba ge sî, o gu ge ǁîb tsîna danas ai ǂnau tsî taotaosase ge sîsenū. 5 Tsî ǁkhawab ge sî ǃgāba gu ge ge ǃgam. Tsî gu ge egab ge sîgu tsîna ǁkhā ǀgaus ai ǂnauhe tamas ka io ge ǃgamhe. 6 Xaweb ge ǀguiba ge ǃgau hâ i, ǁîb di ǀnamǀnamsa ǀgôab, ǁîb ǀguibab ge ūhâ iba. Ob ge ǁîb ǃnâ ge ǂâi ǁîb ôaba gu nî ǃaoǃgâsa tsîb ge ǁîba ge sî.

7 “O gu ge nē ǁamaǀkhupi-aoga nē ǀgôaba gu ge mûǃgoaxao ǁîǃnābe ge mîǀîgu: ‘ǁNā ǃgoaxab kom nē draibeǃhanab di ǂhunuma ǀumi-aoba. A ge ǁîba ǃgam, î ge sage nē ǃhanaba ūbasen!’ 8 Tsî gu ge ǁîb tsîna ǃkhō tsî ǃgam bi tsî soros âba draibeǃhanaba xu ge aoǂui.

9 “O tare-eb nē draibeǃhanab di ǀhonkhoeba ǁnâi nî dī, ti du ra ǂâi? Amase ta ra mîba du ǃkhais ge ǁîb oahā tsî hoaga ǃgam tsî ǁnā ǃhanaba ǀnîgu ai nî ǀkhupiǂuisa. 10 O du kha nē Xoasa khomai tama hâ?

“ ‘ǀUis, ǂnubi-aogu xa ge ǂharahes

ge ge danaǁhôaǀui kai.

11 ǃKhūb ge nēsa ge dī,

tsîs ge ǁîsa sada mûǁae a buruburuxa!’ ”

12 Jesub ge ǁîgu ǃoagu nē ǂkhōsa ǁgam ǃkhaisa gu ge mûǂan, o gu ge Jodeǁîǂgaeǂgui-aoga ǁîba ǃkhōsa gere dītsâ. Xawe gu ge ǂnubis di khoena gere sauaǃnâ tsî gu ge ǁîba ǁnāxū tsî ge ǃgûbē.

ǁGui-aimarina* matares xa hâ dîs

(Mateub 22:15-22Lukab 20:20-26)

13 O gu ge ǂgaeǂgui-aoga ǀnî Farisegu* tsî Herodeb di saoǃgonaoga ge sî, Jesuba gu nî dîǃnâ tsî ǁîba ǁîb di ǃereamǀgaub ǃnâ-u ǃnuise, ǃkhō bi gu nîga. 14 O gu ge “Sige ge ǂan mâtikōsets ǂhauǃnâ ǃkhaisa. Hoaraga khoenats ǀguitikōse ra mâi tsîts ǀkhā-e ǁhûi tamasa, xawets ge amab ǃnâ Elob di daoba ra ǁkhāǁkhā. O mîba ge re, ǂhanu-i a Kaesara ǁgui-aimarina* mataresa? 15 Matare ge nî, tamas ka io ǂhâbasa tama-i hâ?”

Ob ge Jesuba ǁîgu di ǀgamaixasiba mû tsî ǁîgu ǃoa ge mî: “Tari-e go kha sago di ǀhôagao dîrodi ǀkha ra ǃkhō ǂgao? Denarsa* ǁnâi ǁgau te re, î ta mîba go.” 16 Tsî māheb ge ob ge ǁîga ge dî: “Tari-i di ai-īsib tsî ǂgaiǂamǀons tsîra ǁîs ai ǁgâiǂuisa?”

O gu ge “Kaesari” ti ge ǃeream bi.

17 Ob ge Jesuba ǁîga ge mîba: “O ǁnâi Kaesara ǁîb di-e mā re tsî Elob di-e Eloba mā re.” Nē ǃereamǀgaub ge kaise ǁîga ge burugâ kai.

ǁŌba xu khâis xa hâ dîs

(Mateub 22:23-33Lukab 20:27-38)

18 O gu ge ǀnî Sadusegu* hîa ǁōb khaoǃgâ i khâi-e ǀkhai ti ra ǁkhāǁkhāga Jesub ǃoa hā tsî ge dî: 19 “ǁKhāǁkhā-aotse, Moseb ge ge xoaba da ‘ǀGôao aob ga ǁō, ob ge ǁîb di ǃgâsaba ǃoataras hîa go ǁōǃgauhesa ǃgame, ǀgôana hō tsî ǁîna ǃgâsaba nî kaikaiba, ǁîb di ǀumi-aon ase.’ 20 O gu ge hû khoeǃgâguga ge hâ i. Tsî hoagu xa kaib ge ǃgame tsî ǀgôaose ge ǁō. 21 Tsîb ge ǀgamǁî kaiba nē ǃoatarasa ge ǃgame tsîb ge ǁîb tsîna ge ǁō tsî ǀgôa-e ǃgoro tama ge i. ǃNonaǁîb ǀkhas ge ǃgame, ob ge ǁnāb tsîna ǀgôa-e ǁnākhao tamase ge ǁō. 22 Tsî gu ge hoa hûga ǁkhā ǀgaub ai ǀgôaose ge ǁō. ǀAms ais ge nē ǃoataras tsîna ge ǁō. 23 O mîba ge re, ǁō hân di khâitsēs ais kha ǁîsa tarib di taras ase nî khâi? Hoa hû ǃgâsagu ge ǃgame si hâ i xui-ao.” 24 Ob ge Jesuba ge ǃeream gu: “Sago di ǃgomsib ge, Xoasa go ge a ǀū tsî go ge ǁkhāti Elob di ǀgaib tsîna ǂan tama hâ. 25 Tsî ǁō hân di khâis ǃnân ge ǃgame tide, xawen ge ǀhommi ǃnâ hâ ǀhomǃgān khami nî ī. 26 O xawe ǁō hân di khâis xa go kha ǁnâi khomai tama hâ Moseb di ǂkhanis ǃnâ, ǁnā xoaǃâs hîa khau ra ǁkhūhais ǂama ra ǃgûsa, mâtib Eloba ǁîba ge mîbasa? ‘Tita ge Abrahammi, Isaki tsî Jakob di Elota.’ 27 ǁNā-amagab ge ǁîba ûitsaman di Elo tsî ǁō hân di tama. Kaise go ge ǂâisā hâ.”

ǁÎs a kai mîmās

(Mateub 22:34-40Lukab 10:25-28)

28 Ob ge Moseb ǂhanub* di ǁkhāǁkhā-aogu ǀguiba hā tsî ǁîgu ra ǂgaenamǃgâgu ǃkhaisa ge ǁnâu. Jesub ge ǂguro dîsa ǂhanuse ǃeream ǃkhaisab ge mû, ob ge sao ra dîsa ge dî bi: “Mâsa kha ǁnâi hoadi xa kai tsî ǂhâǂhâsa mîmāsa?”

29 Ob ge Jesuba ge ǃeream: “Nēs ge ǁîs kai tsî ǂhâǂhâsa mîmāsa. ‘ǁNâu, Israeltse! ǃKhūb sa Elob ge a ǀgui ǃKhū. 30 Ots ge ǃKhūb, sa Eloba nî ǀnam sa ǂgaob hoab ǀkha, sa ǀoms hoas ǀkha, sa ǂâis hoas ǀkha tsî sa ǁkhāsib hoab ǀkha.’ 31 Tsî ǁîs ǀkha ǀguitikōse ǂhâǂhâsas ge: ‘Sa ǀgūkhoe-ets ge sats ǁkhāts khami nî ǀnam.’ Nē mîmāra xa i ge ǀnî-i hîa ǁîra xa kai-e a ǀkhai.”

32 Ob ge Moseb ǂhanub di ǁkhāǁkhā-aoba* Jesub ǁga ge mî: “ǁKhāǁkhā-aotse, amasets ge ǂhanuse go mî, ǀgui Elob ǀguib hâ tsî i ǀnî-e ǁîb ǃgâ-ai hâ tama tits go ǃeream ǃkhaisa. 33 Tsîts ge Eloba nî ǀnam, sa ǂgaob, ǂâis tsî ǁkhāsib hoab ǀkha tsî ǁkhāti sa ǀgūkhoe-e sats a ǀnamsens ǁkhās khami. Tsîs kom nēsa ǃnāsase ǂhâǂhâsao, khauǁguibadi tsî mādi ǂhanub xa ra ǁgui-aihedi ose.”

34 Tsî ǁîb ge ǂhanuse ǃeream ǃkhaisab ge mû ob ge Jesuba nēti ge mîǀî bi: “Sats ge Elob Gaosiba xu ǃnū tama hâ.” ǁNās khaoǃgâ i ge ǀgui khoe-i tsîna ǁîba xū-e dîsa dītsâ tama ge i.

Xristub* xa hâ dîs

(Mateub 22:41-46Lukab 20:41-44)

35 Tsî ǁnātib khoena Tempeli ǃnâ ra ǁkhāǁkhā hîab ge Jesuba ǁîna ge dî: “Mâti gu Moseb ǂhanub di ǁkhāǁkhā-aoga Xristub a Davidi ôa ti ra mî? 36 Davidi kom ǃAnu Gagab xa ǂgaeǂguihe hâse nēti ra mîo:

“ ‘ǃKhūb ge ti ǃKhūb ǃoa ge mî:

ǂNû ti amǀkhāb ai

tita nî sa khākhoena sa ǂaira ǃnaka dīs kōse.’

37 Davidi tsîn ge ǁîba ‘ǃKhūb’ ti ra ǂgai; mâtib kha ǁnâi ǁîb di ôa ǁkhā?”

Tsîn ge ǁîb gere ǁkhāǁkhā khoena ǃaruǀîǀgui ǁîba ǃgâs di turaba ge hō.

Jesub ge Moseb ǂhanub di ǁkhāǁkhā-aogu* ǃoagu ra ǃkhâikhom

(Mateub 23:1-36Lukab 20:45-47)

38 Tsîb ge ǃaruǀî ǁîna nēti ǁîb di ǁkhāǁkhādi ǃnâ ge ǃkhâikhom: “Moseb ǂhanub di ǁkhāǁkhā-aoga ǂanbasen re! ǁÎgu hîa gaxu saraga ǂgaeǂgā hâse ra ǃgûmaga tsî ǁamaǂharuguǃkhaigu tawa khoen xa tawedehes ǀguisa ra ǂgaoga. 39 Sinagogegu* ǃnâ aisǀkhāb ai ǀgui ra ǂnû ǂgaoga tsî ǁâudīgu tawa ǂoaǂamsa ǂnûǃkhaide ǂhâba hâga. 40 Tao tamase ǃoatarade omde ǀhana tsî mûhe gu nîga gaxu ǀgorede ra ǀgorega, ǁîgu kom kai ǀgoraǃgâsa anu hâo.”

ǃOataras di ǁguibas

(Lukab 21:1-4)

41 Tsî ǁînab ge ǁkhāǁkhātoas khaoǃgâb ge Jesuba Tempeli ǃnâ ǁguibaǂgaes ǃoagu sī ǂnû tsî mâtin ǁîna ra ǁguiba ǃkhaisa gere kō. ǂGui khoen hîa kaise ǃkhū hân ge kai ǁguibade gere mā. 42 Os ge ǀgâsa ǃoatarasa hā tsî ǀgam ǁau marirora ge ǁguiba. 43 Nēsab ge mû ob ge Jesuba ǁkhāǁkhāsabega* ǂgaiǀgū tsî ǁîgu ǃoa ge mî: “Amase ta ra mîba go, nē ǃoataras ge hoaraga khoen xa ǃnāsase go ǁguiba. 44 ǁÎn go ūn hâ ǂguina xu ǃâro-e ǁguiba xui-ao, xawes ge ǁîsa ǁîs di ǀgâsasib ǃnâ hoaraga-i ǁîs go ūhâ i-e go ǁguiba.”