1 ǀHaoǀhaosen re Jerusalemse, khākhoen ǂnubis xas xāǂgāhes hâ xuige. ǁÎn ge Israels ǂgaeǂgui-aoba haib ǀkha xōb ai nî ǂnau.
ǀAsa ǂgaeǂgui-aob ge Betlehemsa xu nî hā
2 Sas, Betlehems Efratase, ǂkharis ge a sasa Judab ǃhaoǃnādi ǃnâ, xawe sasa xub ge tita nî ǀkhība ǁnāb, Israela nî ǂgaeǂguiba. ǁÎb di tsoatsoadi ge ǀnai, ǀoro ǁaeba xu hâ.
3 ǁNā-amagab ge ǃKhūba ǁîna nî ǁnāxūǃgâ ǁnās ǁora nîse is nî ǁora ǁaeb kōse. On ge ǃgau hâ ǃgâsana Israelǁîna ǃoa nî oahā. 4 ǁÎb ge hā tsî ǁîb ǁaesa ǃKhūb di ǀgaib ǀkha nî ǃûi, ǂkhaisib di ǀons ǃKhūb ǁîb Elob dis ǃnâ. On ge ǁîna sâsase nî ûi, ǁîb di kaisib hoaraga ǃhūbaib ǃnâ nî ǂansa xui-ao, 5 tsîb ge ǁîba ǂkhîba nî hā-ū.
Ores tsî ǁkharab
Asiriaǁîn ga sida ǃhūba ǁnāǂam tsî sida ǁkhui-omgu ǃnâ ǂgâ ǂgao, o da ge ǂgui ǂgaeǂgui-aogu tsî ǂamkhoegu tsîna ǁîn ǃoagu nî ǃkhamse nî sî. 6 ǁÎgu ge Asiriab, Nimrodi ǃhūba gôagu ǀkha nî dan. ǁÎb ge Asiriab di ǀgaiba xu nî ore da, Asiriab ga sida ǃhūba ǁnāǂamo.
7 On ge ûiǃgau hân Jakob dina ǂgui ǁaedi ǁaegu nî hâ. ǁÎn ge ǀaub ǃKhūba xu ra hāb khami ǁîdi ǃnâ nî ī, ǀnanus, ǀgân ai ra ǀapis khami, khoe-e ǃâu tama tsî khoesiba ǃâumâ tamasa. 8 Ûiǃgau hân Jakob din ge ǂgui ǁaedi ǁaegu nî hâ, kaise ǂgui khoen ǁaegu. ǁÎn ge xam-i khami nî ī xamanin ǁaegu, tsî ǂkham xammi khami gūn ǁaegu, garub a khami ǁnāǂam tsî ra ǀkhauǃāba, tsî i ge hui nî khoe-i xare-e a ǀkhai. 9 Sats ge sa mâǃoasabena nî ǀgaidā tsîn ge sa khākhoen hoana nî hîkākāhe.
10 Nētib ge ǃKhūba ra mî: “ǁNā tsēs ai ta ge sadu hāna nî hîkākā tsî sadu torokunide nî khôaǂkhū. 11 Tita ge sadu ǃhūb di ǃāde nî hîkākā tsî sadu ǀgaisa hâǃkhaidi di ǂnubiǂgoaga nî khôaǁnâ. 12 Tita ge sadu di ǃgaidī-ūxuna nî hîkākā, tsî du ge aimûǀgaru-ao-i xare-e ǃaruǀî ūhâ tide. 13 Tita ge sadu di ǁgôa-elo īgu tsî sadu di ǀuiǂkhâǃnâgu tsîna nî hîkākā, tsî du ge ǃaruǀî sadu ǃomgu sîsenna ǀgoreǀî tide. 14 ǁKhāti ta ge sadu di Asera īga nî ǃhomǂui tsî sadu ǃāde nî hîkākā. 15 Tsî ta ge ti ǁaib ǃnâ ǁnā ǃhaodi tita ge ǁnâuǀnam tama hâ ide nî ǀkhao.”
© Khoekhoegowab Elobmîs © Bible Society in Namibia, 2020.
