Mixab ge Israeli ǂgaeǂgui-aoga ra ǂgōǀau
1 Tsî ta ge ge mî: ǃGâ re, sago Jakob di danago, ǂgaeǂgui-aogo Israeli digo. Sago kha ǂhanu-aisiba nî ǂanse i tama hâ? 2 Xawe go ge ǃgâiba ǁkhān tsî ǂkhababa a ǀnam. Ti khoena go ge khōba ǀkhauǁnâǀkhā tsî ǂkhōn âna xu ǁgan-e ra ǂgaeǁnâ. 3 Sago ge ti khoena ra hapu; khōb âna ǀkhauǁnâ tsî go ge ǂkhōn âna ra khôaǂkhū, ǁîna go ge sūs ǃnâ nî ǂgāhe ǁgan-i khami ra ǁhāǃā. 4 O gu ge ǁîga ǃKhūb ǃoa nî ǂgai, xaweb ge ǁîba ǁîga ǁnâu-am tide. Tsîb ge ais âba ǁîga xu nî gaugau, ǁîgu di ǂkhabadīb ǃaroma.
5 Nētib ge ǃKhūba ǁnā kēbo-aogu ti ǁaesa ra ǂgaeǂhapugu ǁga ra mî, ǁnāgu ǂûxū-e gu ra ǃkhōǃoas kōse ǂkhîba ra ǂgaiǂui, xawe ǁîga ǂûmā taman ǃoagu toroba ra aiǂhomiga. 6 ǁNā-amagab ge tsuxuba nî hāǂam go, ai-i xare-i ge hâ tide, ǃkhaenab ǀguib, kēbosi-i ose. Nē kēbo-aogu sores ge nî ǂgâ tsîs ge tsēsa ǁîga nî ǃkhaeba. 7 Mû-aogu ge nî taotaohe tsî aimûǀgaru-aogu ge taosib ǃnâ nî mâ. ǁÎgu hoagu ge taob xa amdi âga nî ǃkhō, ǃeream-i xare-i Eloba xu hā tide xui-ao.
8 Xawe tita ge ǃKhūb Gagab di ǀgaib xa ǀoa hâ, tsî ǂhanub tsî ǁkhoaǂgaosib xa, Jakoba ta ǃûǂams âba nî ǂanǂanse tsî Israela ǁoreb âba. 9 Nēsa ǃgâ re, sago Jakob di danago, sa ǂgaeǂgui-aogo Israeli digo, ǂhanu-aisiba ǁkhan hâ tsî ǂhanu xūn hoana ra dabaǃkhunigo. 10 Sago ge Sionsa ǀaob ǀkha ra ǂnubi, tsî Jerusalemsa ǂhanuoǃnâsib ǀkha. 11 ǁÎs di ǂgaeǂgui-aogu ge ǁamaǃkhunis ama ǀgoraǃgâs âga ra dī. ǁÎs di pristergu ge ǃkhōǃoamaris ai ra ǁkhāǁkhā. ǁÎs di kēbo-aogu ge matarehes ǃaroma ra kēbo. Xawe gu ge ǃKhūb ǁîgu ǀkha hâ ti koasen tsî ra mî: “ǃKhūb sige ǀkha hâ tsî ge ǂōǂōsi-i xare-i xa hāǂamhe tide.” 12 ǁNā-amaga sago ǃaromas ge Sionsa ǃhana-i khami nî ǃhūǃgaohe; Jerusalems ge nî ǀuiǁkhobo kaihe tsî Tempelǃhommi ge haixa ǃkhaise nî ī.
© Khoekhoegowab Elobmîs © Bible Society in Namibia, 2020.
