ǂHanuoǃnâ mûǂamaob
1 Jesub ge ǁkhākhāsabegu âb ǃoa ge mî: “ǃKhū hâ khoeb ge mûǂamaoba ge ūhâ i. Tsîb ge mûǂamaoba ǁîb tawa mari-eb ra ǁgauoǃnâse hîǀhuru ti ge ǃnuriǃgâhe. 2 Ob ge ǁîba ǂgai tsî ge mî: ‘Tare-e ta sats xa ra ǁnâu? Sa sîsenni di ǀoasa ǃnuriba mā te, sats ǃaruǀî ti mûǂamao ǁoa xuige.’ 3 Mûǂamaob ge ǁîb ǃnâ ge ǂâi: ‘Tare-e ta nēsi nî dī; ti ǀhonkhoeb kom mûǂamaosisa xu ra ǃhae teo. ǃGom sîsen-e ta ge dī ǁoa tsî ǀkhopesa ta ge ra tao. 4 Nēsi ta ge ǂan tare-e ta nî dīsa, mûǂamaosis di sîsenna xu ta ga ūǁnâheo, în khoena omdi ân ǃnâ ǁkhoreǁhare te ǁkhā.’ 5 Ob ge ǀhonkhoeb âb di surude-aona ǀguiǀguibese ǂgaiǂgā tsî ǂguroba ge dî: ‘Mâtikōsets ti ǀhonkhoeba surude hâ?’ 6 ‘ǀGuikaidisi xapadi ǀkhera-oli-i’ tib ge ge ǃeream. Ob ge ǁîb ǃoa ge mî: ‘Sa surudeǂkhanisa ū, îts ǂnû tsî ǃhaese korodisi ti xoa.’ 7 Tsîb ge ǁnās khaoǃgâ nauba ge dî: ‘Mâtikōsets surude hâ?’ Ob ge ge ǃeream: ‘Kaidisi ǁhōdi ǃhoro-i.’ Ob ge ǁîb ǃoa ge mî: ‘Sa surudeǂkhanisa ū, îts ǁkhaisadisi ti xoa.’ 8 Gā-aiseb ge sîsen xui-aob ge ǀhonkhoeba nē ǀhôagao mûǂamaoba ge koa. Nē ǁaeǃgâs khoen ge ǃnāsase gā-aise ra sîsenūgu, ǃnâb ǃnâ hâ khoen ǃgâ-ai.”
9 Tsîb ge Jesuba ǃaruǀî ge mî: “Mîba du ta ra, ǃhūbaib di ǀhôagao ǃkhūsib ǀkha khoexakhoena dībasen, î du nē ǃkhūsib ga toao, ǀamo ǁanǃkhaidi ǃnâ ǁkhoreǁharehe. 10 ǂKhariron ǃnâ a ǂgomǂgomsa-i hoa-i ge ǁkhāti kai xūn tsîn ǃnâ a ǂgomǂgomsa; tsî ǂkhariron ǃnâ a ǀhôagao-i ge kain tsîn ǃnâ a ǀhôagao. 11 ǂHanuoǃnâ ǃkhūsib tsîn ǃnâ du ga ǂgomǂgomsa tama io, mâti du ama ǃkhūsib ǀkha nî ǂgomǃgâhe? 12 Tsî ǀnî khoeb di xū-i ǀkhats ga ǂgomǂgomsa tama io, tari-e satsa xū-e nî mā, sa kai-i nîsets nî ūhâse?
13 “ǃGā-i xare-i ge ǀgam ǀhonkhoekha ǁkhā ǁaeb ai a ǃoaba ǁoa. ǀGuiba ǁkhan tsî-i ge nauba nî ǀnam tsî ǀguib ai ǂgāmâisen tsî nauba nî ǃharaxū. Elob tsî ǃkhūsib tsîkhats ge ǀgui ǁaeb ai a ǃoaba ǁoa.”
ǀNî mîxūn Jesub din
(Mateub 11:12-13Mateub 5:31-32Markub 10:11-12)14 Farisegu* ge nēn hoana gu ge ǁnâu, o Jesuba ǃhō tsî ge âiǂui, ǁîgu ge mari-e ǀnam i amaga. 15 Ob ge ǁîgu ǃoa ge mî: “Sago ge khoen mûǁae ǂhanu-ai kaisens ǀkha ra tanisen, xawe Elob ge sago ǂgaoga a ǂan. Khoe-i xa ǀgapise ra ǃgôahe-i ge Elob mûǁae a ui-uisa.
16 “Johaneb ǁĀǁnâ-aob ge aoǁnâtsoatsoa ǁaeb kōse i ge Moseb ǂhanub* tsî kēbo-aogu di ǁkhāǁkhādi ǀguide ge hâ i; ǁnāpa xus ge ǃGâiǂhôas Elob Gaosib disa ra aoǁnâhe tsî-i ge mâ-i hoa-e ra ǁgū ǁîb ǃnâ ǂgâsa. 17 Xawe ǀhommi tsî ǃhūbaib tsîkha ǃgû-īs ge a supu, ǀgui xoamûros ǂhanub dis nî kās xa.
18 “Mâ khoeb, ǁîb tarasa xu ǀgora tsî ga ǀnîs ǀkha ǃgameb hoab ge ra ǃgamekhôa; tsî ǃgameba âsa ǀgora hâ tarasa ga ǃgame aob hoab ge ra ǃgamekhôa.
ǃKhū hâ khoeb tsî Lasarub
19 “ǃKhū hâ khoeb ge ge hâ i, kaise ǀgapiǀgau tsî ǂhoaǀapa sarana gere ana tsî ge tsēkorobe kai ǃgâiaǂgaob tsî îsasib ǃnâ ûi hâ iba. 20 ǁNāpab ge ǁkhāti Lasarub ti ǀon hâ ǀgâsa khoeb, ǀhapiǀgui ge iba ge hâ i. ǁÎb ge ǃkhū hâ khoeb di dao-ams tawa ǁgoe tsî gere ǁkhore, 21 ǃkhū hâ khoeb di tāba xu ra ǁnān xab ga auhe ǃkhaisa. Tsîn ge arin tsîna hā tsî ǀhapin âba gere tsā-ai.
22 “ǀGâsa khoeb ge ǁō tsî ǀhomǃgāgu xa Abrahammi ǃoa ge tanihe, ǁîb amǀkhāb tawa nî sī ǂnûse. ǃKhū hâ khoeb tsîn ge ǁō tsî ge ǁkhōhe. 23 Tsî ǁŌhân Hâǃkhaib ǃnâb, kai tsûba ra tsâ hîab ge kōkhâi, ob ge Abrahamma ǃnūseba xu ge mû tsî Lasaruba ǁîb xōǀkhā. 24 Ob ge ge ǂgai: ‘Ti Î Abrahamtse, ǀkhomxa te re î Lasaruba sî re, îb ǀkhunuǂaoba ǁgam-i ǃnâ ǀâǀâ tsî ti namma karakara, kaise ta nē ǀaeb ǃnâ ra tsâ xuige.’
25 “Xaweb ge Abrahamma ge mî: ‘ǂÂis ǃnâ ūhâ re ti ôatse, sa ûiǁaeb ǃnâts hoaǁae ǃgâina gere hōsa tsî Lasaruba hoa tsūna. Tsî nēsisab ge ǁîba ǃgâib ǃnâ hâ tsîts ge satsa nēsi ra tsâ. 26 ǁKhātib ge kai ǁhoaba sada ǁaegu hâ, în nēpa xu ǁnāǀî ra ǃgâu ǂgaona tā ǃgâu tsî ǁnāpa hâna sida ǁga tā ǃgâuxa.’ 27 Ob ge ǃkhū hâ khoeba ge mî: ‘ǀKhoma tsi ta ge ra ti Î Abrahamtse, Lasaruba ti îb di oms ǁga ǁnâi sî re, 28 koro ǃgâsaga ta ǁōǃgau hâ xuige. Ab ǁîga sī ǃkhâikhom, î gu ǁîgu tsîna tā nē tsûb di ǃkhais ǃoa nî hāse ī.’
29 “Ob ge Abrahamma ge mî: ‘Sa ǃgâsagu kom Moseb tsî kēbo-aogu tsîgu di ǃkhâikhomde ūhâo, a gu ǁîgu ǃkhâikhomde ǃgâ.’ 30 Ob ge ǃkhū hâ khoeba ge ǃeream: ‘ǂÂu tama ti Î Abrahamtse! Xawe khoe-i ga ǁō hâna xu ǁîgu ǃoa a sīo, o gu ge nî ǃhobasen.’ 31 Ob ge Abrahamma ǁîb ǃoa ge mî: ‘Moseb tsî kēbo-aogu tsîga gu ga ǃgâ tama io, o gu ge tātsēs tsîna gowadan kaisen tide, khoe-i ga ǁō hâna xu khâi xawes tsîna.’ ”
© Khoekhoegowab Elobmîs © Bible Society in Namibia, 2020.
