Levitikus 7 - Khoekhoegowab New Translation 2020 (KKG20)

Matare-oas ǁguibadi

1 Matare-oas ǁguibadi ge ǀō-aisase a ǃanu tsî sao ra ǁgaraga ūhâ: 2 Nē ǁguibas ǃaroma ra ǁguibahe ǀgoa-i ge altars di ǀapasǀkhāb ai nî ǃgaoxadomhe, khauǁguibas ǃaroma ra ǃgamhe ǀgoan ra ǃgaoxadomhe ǃkhais tawa, tsîb ge ǁî-i ǀaoba altars di haka ǃnamgu ai nî ǀgapihe. 3 ǀGoa-i di hoaraga kaub ge ǃgaoǁnâhe tsî altars ai nî ǁguibahe: ǂArekaus, ǀhaukaub ǃnāxūna ra ǃgū-aib, 4 ǃnaira tsî ǁîra ai hâ kaub ǀkha tsî ǂoaǂamsa ǃâ-i âis di-i tsîna. 5 Pristeri ge ǁîn hoana altars ai nî ǂhubi, ǂûǁguibas ǃKhūba ra ǁguibahes ase. Nēs ge matare-oas ǁguibasa. 6 Pristersi surib di aorekhoeb hoab ge ǁî-i di ǁgan-e nî ǂû. ǁÎ-i ge kaise i a ǃnâu xui-ao ǃanu ǃkhaib ǃnâ nî ǂûhe.

7 ǁNāpab ge ǀgui ǁgaraba hâ ǁoreǁguibas tsî matare-oas ǁguibas tsîra hoara tawa a sîsenxaba: Pristeri ǂkhîbagusa ra dīb ge ǁgan-e nî hō. 8 Khauǁguibas ǃaroma ra ǁguibahe ǀgoa-i di khōb ge a pristeri hîa ǁguibasa ra dīb di. 9 Mâ ǃhoroǁguiba-i ǁganoms tamas ka io panni tamas ka io ǁganoms di amaiǃoreb ai ra amhe-i hoa-i ge pristeri hîa ǁî-e ǃKhūba ra ǁguibab di. 10 Xawe mâ ǃhoroǁguibas hoas ǀkhera-oli-i ǀkha tamas ka io ǀkhera-oli-i ose hâs ge Aronni ôagu hoagu ǃnâ ǀguitikōse nîra ǀgorahe.

ǀHûhâsib ǂkhîbagus ǁguibadi

11 Sao ragu ge ǁgaragu ǀhûhâsib ǂkhîbagus ǁguibadi ǃKhūb ra ǁguibahedi diga: 12 Khoe-i ga ǀhûhâsib ǂkhîbagus ǁguibasa ganganǁguibas ase Eloba ǁguiba, o-i ge ganganǁguibas ǀkha ǀhao hâse khūkhū-e ūhâ tama ǃgupu pererodi, ǀkhera-oli-i ǀkha habasade nî ǁguiba: ǁAu peren mel-i tsî ǀkhera-oli-i tsîn ǀkha habasan tamas ka io ǀui, ǂhaba pererodi ǀkhera-oli-i ǀkha ǂkhausadi tamas ka io tsamperedi ǀkhera-oli-i ǀkha habasade. 13 ǁÎ-i ge khūkhū-i ǀkha hâ ǃgupu peredi tsîna nî ǀaro. 14 ǁÎ-i ge mâ pereǃnôa-i hoa-e xu ǀgui-e ū tsî ǀō-aisa ǁguibas ase ǃKhūb di ǃgôasib ǃoa nî ǁguiba; pristeri hîa ǁguibaǀgoa-i di ǀaoba ū tsî altars ai ra ǀgapib ge nē pere-e ra ūbasen. 15 ǁGuiba-ao-i ga ǁguiba ǁgan-i ge ǁkhā tsēs ai nî ǂûhe; tsî i ge ǁgan-i xare-e sao ra ǁgoas kōse ǂûǃgauhe tide.

16 Khoe-i ga nū i ge ǁguibas, tamas ka io ǁî-e xu māsenxa ǁguibasa ǀkhī-ū, os ge hoaraga ǁguibasa ǁguibahe ra tsēs ai hapuhe tide, xawe ǃgau ra ǃân ge sao ra tsēs ai a ǂûhe ǁkhā. 17 Xawe ǃnonaǁî tsēs ais tsîna i ga ǃâ-e ǃgau, o-i ge nî ǂhubiǂuihe. 18 Khoe-i ga ǃnonaǁî tsēs ai ra ǃgau ǁguibas ǃân xa ǂû, ob ge Eloba ǁnāti ī ǁguibas tsî ǁguiba-ao-e ūǃoa tide. Nēti ī ǁguibas a ǃanuoǃnâ tsî-i ǁguiba-ao-e ǁkharaba anu hâ xui-ao. 19 ǁGuibas di ǁgan-i ga ǃanuoǃnâ xū-e a tsâǀkhā, o-i ge tā nî ǂûhe, xawe-i ge nî ǂhubiǂuihe.

Khoe-i ga ǃanu, o-i ge ǁnāti ī ǁguibas ǁgan-e a ǂû ǁkhā, 20 xawe i ga ǃanuoǃnâ khoe-e ǁguibas ǁgan-e ǂû, o-i ge ǃaruǀî ǁnāti ī khoe-e Elob ǁaes di ǀgui-i ase ǃgôahe tide. 21 Khoe-i ga ǃanuoǃnâ xū-i, khoe-i tamas ka io ǀgoa-e xu hâ-e tsâǀkhā tsî nē ǁguibas ǁgan-e ǂû, o-i ge ǃaruǀî Elob ǁaes di ǀgui-i ase ǃgôahe tide.

22 ǃKhūb ge Moseba sao ra ǁgaraga 23 Israelǁîn ǃaroma ge mā, în tā goman, gūn tsî pirin di kauba ǂû. 24 ǁŌ hâ ǀgoa-i tamas ka io ǁaixa ǀguru-i xa ra ǃgamhe ǀgoa-i di kaub ge a sîsenūhe ǁkhā, xawe tātsēs tsîna ǂûhe tide. 25 Khoe-i ga ǀaeǁguibas ase ra ǃKhūba ǁguibahe ǀgoa-i di kauba ǂû, o-i ge ǃaruǀî Elob ǁaes di ǀgui-i ase ǃgôahe tide. 26 Mâpa ǀguin ga Israelǁîna ǁan, xawen ge anin tamas ka io goman tamas ka io ǀgoan di ǀaoba ǂû tide. 27 Nē ǁgaraba ga ǃûǂam khoe-i ge ǁkhāti ǃaruǀî Elob ǁaes di ǀgui-i ase ǃgôahe tide.

28 ǃKhūb ge Moseba ge mîmā 29 îb Israelǁîna mîba: Khoe-i ga ǀhûhâsib ǂkhîb ǁguibasa ǁguibao, o-i ge ǁnā ǁguibas di ǃâ-e ǀō-aisa mās ase ǃKhūba 30 ǁî-i ǂû-i di ǃomkha ǀkha ǀaeǁguibas ase nî ǀkhī-ūba. ǁÎ-i ge ǀgoa-i di ǁkhaib tsî ǁkhaikaub tsîn hoana ǀō-aisa mās ase ǃKhūba nî ǀkhī-ūba. 31 Pristeri ge kauba altars ai nî ǂhubi, xaweb ge ǁkhaiba Aronni tsî ǁîb ôagu tsîgu xa nî ūhe. 32 Pristeri, ǀhûhâsib ǂkhîb ǁguibas di ǀgoa-i di ǀaob tsî kauba ra ǁguibab 33 ge amǀkhāb tîs ǀgoa-i disa ǁguibas ase nî māhe. 34 ǃKhūb ǂûb ge ǀgoa-i di ǁkhaib, ǀō-aisa mās ase īb, tsî amǀkhāb tîs, ǀō-aisa ǁguibas ase īs tsîra Israelǁîna xu ū tsî prister Aronni tsî ǁîb ôagu tsîga nî mā. 35 Nēs ge ǃâs ǀaeǁguibas dis ǃKhūb di ǃgôasib ǃoa ra ǁguibahes, Aronni tsî ǁîb ôagu tsîgu ge ǁîgu pristersi ǀnauǂgāhes tsēs ai a māhesa. 36 ǁNā tsēs aib ge ǃKhūba Israelǁîna ge mîmā, în nē ǃâs ǁguibas disa pristerga ǁîgu ǀnauǂgās di tsēsa xu mā. Nēb ge ǁgarab Israelǁîn nî hoaǁae ǁnâuǀnamhâhâba.

37 Nē ǁgarab ge khauǁguibas, ǃhoroǁguibas, ǁoreǁguibas, matare-oas ǁguibas, ǀnauǂgās ǁguibas tsî ǀhûhâsib ǂkhîbagus ǁguibas tsîdi ga hâ ǁaeb hoaba nî ǁnâuǀnamhe. 38 ǃKhūb ge Israelǁînab gere ǁguibaden nî ǁîba ǀkhī-ūbase mîmā tsēs ai, Moseba Sinaiǃhommi ai ǃgaroǃhūb ǃnâ nē mîmāsa ge ǁgui-ai.