Levitikus 27 - Khoekhoegowab New Translation 2020 (KKG20)

ǃKhūba māde mās ǂhanugu

1 ǃKhūb ge Moseba 2 sao ra ǁgaraga Israelǁîn ǃaroma ge mā: Khoe-i ga ǀō-aisa nūs di dīǀoaǀoas ase ǃKhūba a māǁnāhe, o-i ge ǁnāti ī khoe-e sao ra maride matarehes ǀkha a ǃnoraǃnorahe ǁkhā, 3-7 ǂanǃgâsa mā-amsa ǁgarab ǃnaka:

ǁKhara aorekhoeb, ǀgamdisisa xu ǃnanidisi kurigu kōse hâb: Korodisi ǀhaiǀuride

ǁkhara tarekhoes: ǃNonadisi ǀhaiǀuride

ǂkham aorekhoeb, korosa xu ǀgamdisi kurin kōse hâb: ǀGamdisi ǀhaiǀuride

ǂkham tarekhoes: Disi ǀhaiǀuride

ǀgôarob, koro kurin ǃnaka hâb: Koro ǀhaiǀuride

ǀgôaros: ǃNona ǀhaiǀuride

aorekhoeb ǃnanidisi kurigu xa a kaib: Disikoroǀa ǀhaiǀuride

tarekhoes ǃnanidisi kurigu xa a kais: Disi ǀhaiǀuride

8 Nūsa ge dī khoen di ǀgui-i ga ǀgâsa tsî mîǁguisa marisa matare ǁoa, o-i ge nēti ī khoe-e pristeri ǃoa nî hā-ūhe tsîb ge pristera ǁnā khoe-i nî matare ǁkhāse marisa nî ǀoroǀoro.

9 Nūs ga ǃKhūb di ǃgôasib ǃaroma a anuse nî ǁguibahe ǀgoa-i xa a ǃgû, o-i ge mâ mā-i ǃKhūb di ǃgôasib ǃaroma ra ǁguibahe-i hoa-e a ǃnâu. 10 Nūsa ra dī khoe-i ge ǁguibahe ra ǀgoa-e ǀnî ǀgoa-i ǀkha a ǃkhōǃkhuni ǁoa. 11 Xawes ga nūsa ǃanuoǃnâ ǀgoa-i ǃKhūb di ǃgôasib ǃaroma a ǁguibahe ǁoa-e ǃkhōǂgā, ob ge khoeba ǁî-e pristeri tawa nî sī-ū. 12 Pristeri ge ǀgoa-i di sorosi mâsiba xu ǁkhāsib ǁnā ǀgoa-i diba nî mîǁgui tsîb ge ǁnās khaoǃgâ ǀkharaǀkharahe tide. 13 Khoe-i ga ǁî-e ǁama-oa ǂgao, o-i ge mîǁguisa ǁkhāsib maris tsî ǀgamdisi persentgu tsîna ǀhaob ai nî matare.

14 Khoe-i ga ǁî-i omsa ǃKhūb di ǃgôasib ǃaroma khai, ob ge pristera ǁnā oms di ǁamaxūǁkhāsiba ǁîs di mâsiba xu tare-es nî ǂgansa nî mî, tsîs ge ǁnāsa khoe-i xa ǀkharaǀkharahe ǁkhā tide. 15 ǁNā khoe-i omsa ge ǃKhūb di ǃgôasib ǃaroma khai-i ga ǁîsa ǁama-oa ǂgao, o-i ge mîǁguisa ǁkhāsib maris tsî ǀgamdisi persentgu tsîna ǀhaob ai nî matare.

16 Khoe-i ga ǁî-i ǃhūǃâ-e ǃKhūb di ǃgôasib ǃaroma khai, ob ge ǁî-i di ǁamaxūǁkhāsiba mâtikō ǃgaodi ǁî-i ai dīhe ǁkhāsa xū nî mîhe, mâ ǀgamdisi kiloxramgu ǃhoro-e disi ǀhaiǀurigu di ǁkhāsib ai. 17 ǁNā khoe-i ga ǃnubuse Mā-oahes Kurib khaoǃgâ ǁî-i ǃhūǃâ-e ǃKhūb di ǃgôasib ǃoa a khai, os ge ǀoasa marisa nî matarehe. 18 Xaweb ga ǂâusa ǁaeb Mā-oahes Kurib ǃkharu hâs khaoǃgâ ǁî-i ǃhūǃâ-e ǃKhūb di ǃgôasib ǃaroma khai, ob ge pristera ǁamaxūǁkhāsiba mâtikō kurigu sao ra Mā-oahes di Kurib aiǃâ ǃgau hâgu ǃoa mî tsî nî ǂgaeǁnâ. 19 ǁNā khoe-i ǃhūǃâsa ra ǁamaxū-i ga ǁkhawa ǁîsa ǁama-oa ǂgao, o-i ge mîǁguisa ǁkhāsib maris tsî ǀgamdisi persentgu tsîna ǀhaob ai nî matare. 20 ǁÎ-i ga ǃhūǃâsa ǃKhūba xu ǁama-oa tamase ǀnî khoe-i ai ǁamaxū, o-i ge ǁî-e ǁama-oas di aiǂhanuba ra ǂoaǃnâ. 21 Sao ra Mā-oahes Kurib ais ge ǁnā ǃhūǃâsa a ǃKhūb di ūhâxū; tsî pristerga nî māhe.

22 Khoe-i ga ǁama i ge ǃhūǃâsa ǃKhūb di ǃgôasib ǃaroma khai, 23 ob ge pristera ǃhūǃâs di ǁamaxūǁkhāsiba mâtikō kurigu, sao ra Mā-oahes Kurib kōse ǃgau hâsa nî mî, tsî i ge ǁama ra khoe-e ǁnā tsēs ǂûs ai ǁî-i mataresa nî mā; maris ge a ǃKhūb di. 24 Mā-oahes Kurib ais ge ǃhūǃâsa ǂguro ǀhonkhoe-i tamas ka io ǁî-i omaris khoen ai nî ǁkhaeǁnâhe.

25 Matare ǀgaugu hoagu ge mîǁguisa ǁgarab ǃoa nî ǃgû.

26 ǂGuroǃnaesab ǀgoa-i dib ge ǀnai a ǃKhūb di, ǁnā-amaga i ge khoe-i xare ǁî-e ǃnorasasib ǁguibas ase khaibasen tide. Tsâu-i, ǁkhaoro-i tamas ka io ǀgôaro-i tsîn ge a ǃKhūb di, 27 xawe ǃanuoǃnâ ǀgoa-i di ǂguroǃnaesa-i ge mîǁguisa ǁkhāsib maris tsî ǀgamdisi persentgu tsîn ǀkha ǀhaob ai nî ǁama-oahe.

28 Khoe-i xare-i ge ǃKhūb di ǃgôasib ǃaroma-i ge māhe xū-e ǁgui-ai-i ǀkhaise ǁamaxū tamas ka io ǁama-oa tsî khai tide, nēsi i ga khoe, ǀgoa tamas ka io ǃhūǃâ xawe. ǁÎ-i ge hoaragase a ǃKhūb di xui-ao. 29 Khoe-i xare-i hîa ǁgui-ai-i ǀkhaise ra khaihe-i tsîn ge a ǁama-oahe ǁoa; ǁî-i ge nîra ǃgamhe.

30 Disiǁîǃâs ǃhūb di ǂûn dis, nēsi i ga ǃhoros tamas ka io haiǂûs kas hoasa i ge a ǃKhūb di. 31 Khoe-i ga ǁnā ǂûn di ǀgui-e ǁama-oa ǂgao, o-i ge mîǁguisa ǁkhāsib maris tsî ǀgamdisi persentgu tsîn ǀkha ǀhaob ai nî ǁama-oahe. 32 Mâ ǃnās hoas di disi ǀgoan di ǀgui-i ge a ǃKhūb di. ǁÎn ga ǃgôahe, o-i ge mâ disiǁî ǀgoa-i hoa-e a ǃKhūb di. 33 ǀGoan di ǀhonkhoeb ge ǂgabasa tsî kausa ǀgoan ǃnâ ǀgorasa ǂnûi tide. ǁÎb ge ǁkhāti ǂgaohe tama ǀgoa-e ǀkhara ǀgoa-i ǀkha ǃkhōǃkhuni tide. ǁNāti ī ǀgoa-i ga ǀnî-i ǀkha ǃkhōǃkhunihe, on ge hoa ǀgamna ra ǃKhūb di kai tsî ǁkhāti ǁama-oahe tide. 34 Nēdi ge mîmādi ǃKhūb ge Moseba Sinaiǃhommi ai, Israelǁîn ǃaroma māde.