Levitikus 14 - Khoekhoegowab New Translation 2020 (KKG20)

Khōǀaesenna ūhâs khaoǃgâ hâ ǃanuǃanusens

1 ǃKhūb ge Moseba ge mîmā, 2 khoe-i hîa khōǀaesenna ge ūhâ i-i ga ǁî-i ǃanuoǃnâsiba xu a ǃanuǃanuhe, o gu ge sao ra ǁgaraga nî saohe. ǁNāti ī khoe-i ge pristeri ǃoa nî ǀkhī-ūhe 3 tsîb ge pristera ǁî-e hâǃkhaib ǃauga ǂoa-ū tsî ǂōrisase nî kōǀkhā. ǁÎ-i di khōǀaesenni ga ǂuru īsiba ǁgau, 4 ob ge pristera ǁî-i ǃaroma ǀgam ûitsama ǃanu anirora, sederhais di ǃâro-i, ǃkhaeǀapa ǁapa-i tsî hisopǁnâuro-i nî hā-ūhe ǃkhaisa nî mîmā. 5 ǁNās khaoǃgâb ge pristera ǀgui aniros nî ǁgam-e ūhâ ǂgoaxapas ǃnâ ǃgamhe ǃkhaisa nî mîmā. 6 Pristeri ge ûitsama aniros, sederhais di ǃâro-i, ǃkhaeǀapa ǁapa-i tsî hisopǁnâuro-i tsîna ǀguipa ū tsî ǃgamhe go aniros di ǀaob ǃnâ nî ǂgom. 7 ǁÎb ge hû ǃnāde khōǀaesenna xu nî ǃanuǃanuhe khoe-i ai ǀaoba nî ǀgapi tsî i ǁî-e nî ǃanu. ǁNās khaoǃgâb ge pristera ûitsama anirosa nî ǃnoraǃnora. 8 ǃAnuǃanuhe ra khoe-i ge saran â-e ǁā, soros ai hâ ǀûn hoana ǂkhomǁnâ tsî hoaraga sorosa nî ǁā. ǁNās khaoǃgâ i ge ǁî-e ǃanu tsî hâǃkhaib ǃnâ ǂgâ ǁkhā, xawe i ge aibe hû tsēde ǁî-i di tentoms ǃauga nî ǃâu. 9 Hûǁî tsēs ai i ge ǁî-e hoaraga danaǀûn, ǀhō-ams, ǀgâugu tsî soros ai hâ ǀûn hoana nî ǂkhomǁnâ. ǁNās khaoǃgâ i ge ǁî-e saran â-e ǁā tsî horaga sorosa nî ǁā, o i ge hoaragase i go ǃanu ti nî mîhe.

10 ǁKhaisaǁî tsēs ai i ge ǁî-e ǀgam ūo ǁkhaorokha tsî ǀgui kurixa ǁkhaoros, ǃnona kiloxramgu mel-i ǀkhera-oli-i ǀkha habasa-i tsî ǃkhare literi di ǀkhera-oli-i tsîna pristera nî ǀkhī-ūba. 11 Pristeri ge ǁî-i tsî ǁguibahe ra xūn tsîna ū tsî ǃKhūb di Tentommi ǂgâ-ams tawa nî sī-ū. 12 ǁNās khaoǃgâb ge pristera ǀgui ǁkhaorob tsî ǃkhare literi di ǀkhera-oli-i tsîna ū tsî ǀaeǁguibas ase hoana ǃKhūbdi ǃgôasib ǃoa nî ǁguiba. 13 ǁÎb ge ǁkhaoroba ǁoreǁguibas tsî khauǁguibas tsîra ǃaroman ra ǀgoana ǃgaoxadomhe ǃkhais ai nî ǃgaoxadom, ǁoreǁguibas ǂkhîbagus di ǁguibas ǁkhās khami ǀgui pristeri di tsî ǀō-aisase a ǃanu xui-ao. 14 Pristeri ge ǁkhaorob di ǀaoba ū tsî ǃanuǃanuhe ra khoe-i di amǀkhāb ǂgaeǂaob, amǀkhāb ǃoms di kai ǀkhunus tsî amǀkhāb ǂais di kai ǀkhunus ai nî ǂkhau. 15 ǁNās khaoǃgâb ge pristera ǁîb ǂûb di ǁareǀkhāb ǃomǃnās ǃnâ ǀkhera-oliro-e ǁhō, 16 tsî ǁîb di amǀkhāb ǃoms di ǀkhunuba ǁî-i ǃnâ ǀhari tsî hû ǃnāde ǃKhūb di ǃgôasib ǃoa nî ǀgapi. 17 Pristeri ge ǁnā oli-e xu ǀnî oli-e ū tsî ǀnî ǀao-i ǁkhaorob di-i tsîna ū tsî ǃanuǃanuhe ra khoe-i di amǀkhāb ǂgaeǂaob, amǀkhāb ǃoms di kai ǀkhunus tsî amǀkhāb ǂais di kai ǀkhunus ai nî ǂkhau. 18 ǁÎb di ǃommi ǃnâ ra ǃgau oli-eb ge pristera ǃanuǃanuhe ra khoe-i di danas ai nî ǂkhau, tsî nēs ǀkha ǁnā khoe-e ǃKhūb ǀkha ǂkhîbagusa nî dība.

19 ǁNās khaoǃgâb ge pristera ǁoreǁguibasa ǁguiba tsî nēs ǀkha ǃanuǃanuhe ra khoe-e ǃKhūb ǀkha ǂkhîbagusa ra dība. ǁNāpa xu-i ge ǁguiba-ao-e khauǁguibas ǃaroma ǀgamǁî ǁkhaoroba nî ǃgaoxadom 20 tsîb ge pristera ǁnā ǁkhaoroba ǃhoro-i ǀkha altars ai nî ǂhubi, tsî nēs ǀkha ǃanuǃanuhe ra khoe-e ǃKhūb ǀkha ǂkhîbagusa ra dība, tsî i ge ǁî-i a ǃanu ti ra mîhe.

21 Khoe-i ga ǀgâsa tsî ǁkhāsi-e ūhâ tama i, o-i ge ǁî-i di ǃanuǃanuhes ǃaroma ǀgui ǁkhaoroba ǁî ǂkhîbagus ǁguibas ase, ǀgui kiloxrammi mel-i ǀkhera-oli-i ǀkha habasa-i ǃhoroǁguibas ǃaroma tsî ǃkhare literi di ǀkhera-oli-i tsîna pristera nî ǀkhī-ūba. 22 ǃAruǀî-i ge ǁnā khoe-e ǀgam ǂnabura tamas ka io ǂnaira, ǀguisa ǁoreǁguibas ǃaroma tsî nausa khauǁguibas ǃaroma nî ǀkhī-ū. 23 ǁKhaisaǁî tsēs ǁî-i ǃanuǃanuhes dis ai i ge ǁguibahe ra xūn hoana ǃKhūb di Tentommi ǂgâ-ams tawa pristera nî sī-ūba. 24 ǁNās khaoǃgâb ge pristera ǀgui ǁkhaorob tsî ǃkhare literi di ǀkhera-oli-i tsîna ū tsî ǂkhîbagus ǁguibas ase hoana ǃKhūbdi ǃgôasib ǃoa nî ǁguiba. 25 Pristeri ge ǁkhaoroba ǃgaoxadom kai tsî ǀaob âba ū tsî ǃanuǃanuhe ra khoe-i di amǀkhāb ǂgaeǂaob, amǀkhāb ǃoms di kai ǀkhunus tsî amǀkhāb ǂais di ǀkhunus ai nî ǂkhau. 26 ǁNās khaoǃgâb ge pristera ǁîb ǂûb di ǁareǀkhāb ǃomǃnās ǃnâ ǀkhera-oliro-e ǁhō, 27 tsî ǁîb di amǀkhāb ǃoms di ǀkhunuba ǁî-i ǃnâ ǀhari tsî hû ǃnāde ǃKhūb di ǃgôasib ǃoa nî ǀgapi. 28 Pristeri ge ǁnā oli-e xu ǀnî oli-e ū tsî ǀnî ǀao-i ǁkhaorob di-i tsîna ū tsî ǃanuǃanuhe ra khoe-i di amǀkhāb ǂgaeǂaob, amǀkhāb ǃoms di kai ǀkhunus tsî amǀkhāb ǂais di kai ǀkhunus ai nî ǂkhau. 29 ǁÎb di ǃommi ǃnâ ra ǃgau oli-eb ge pristera ǃanuǃanuhe ra khoe-i di danas ai ǂkhau, tsî nēs ǀkha ǁnā khoe-e ǃKhūb ǀkha ǂkhîbagusa ra dība. 30 ǃAruǀî-i ge ǁnā khoe-e ǀgam ǂnabura tamas ka io ǂnaira, 31 ǀguisa ǁoreǁguibas ǃaroma tsî nausa khauǁguibas ǃaroma ǃhoro-i ǀkha nî ǁguiba. Nēs ǀkhab ge pristera ǁnā khoe-i ǃanuǃanuhe go-e ǃKhūb ǀkha ǂkhîbagusa ra dība. 32 Nēgu ge ǁgaragu hîa khōǀaesenna ge ūhâ i khoe-i tsî ǁnās xa ǃanuoǃnâ kaihe tsî ǃanuǃanusens ǁguibade mās di ǁkhāsiba ge ūhâ tama hâ i khoe-i xa hâga.

Khōǀaesenna omdi ǃnâ ǃanuǃanuhes

33 ǃKhūb ge Moseb tsî Aron hâkha ǃoa ge mî 34-35 Kanaanǃhūb, ūhâxūse ta nî mā dub ǃnâ du ga ǂgâ, tsî ta ga omdi di ǀguis ǃnâ khōǀaesenna ǃaroma kai, o-i ge oms ǀhonkhoe-e pristera sī nî mîba. 36 Pristeri ge hoaraga xūn oms ǃnâ nî ūǂuihe ǃkhaisa nî mîmā, ǁîb nî oms tawa sīs aiǃâ. ǁNā tamas ka i, on ge oms ǃnâ hâ xūn hoana nî ǃanuoǃnâ. ǁNās khaoǃgâ ǀguib ge pristera oms ǁga ǃgû 37 tsî sī kōǃnâ ǁkhā. ǃAm tamas ka io ǀapa īsiba ūhâ ǂnaodi ga ǂnubiǂgoagu ai hâ, 38 ob ge ǁîba omsa xū ǂoa tsî hû tsēdes omsa ǂgâǃnâhe tidesa nî mîmā. 39 Hûǁî tsēs aib ge pristera omsa sī ǁkhawa nî kōǃnâ, tsîb ga khōǀaesenna khoraǂuisen, 40 ob ge pristera ǁnā ǀuidi hîab khōǀaesenna hâ aide ūǂui kai tsî ǁîde hâǃkhaib ǃauga hâ ǃanuoǃnâ ǃkhai-i tawa sī nî aoxū kai. 41 ǁNās khaoǃgâb ge ǂganagab hoab ge ǂkhauǂui-ūsa i ǂgoaba ǁkharoǁnâ kai tsî ǁî-e hâǃkhaib ǃauga hâ ǃanuoǃnâ ǃkhai-i tawa sī nî aoxū kai. 42 ǁNāpa xu di ge ǀkhara ǀuide, ǀuidi ge ūǂuihe ǃkhaidi tawa ǂgāhe tsî ǀasa ǂgoab ǀkha oms di ǂganagaba nî ǂkhauǂuihe.

43 ǁKhawab ga khōǀaesenna ǀuide khôaǂuihe, ǂgoaba ǁkharoǁnâhe tsîb oms di ǂganagab hoaba ǂkhauǂganhe hâs khaoǃgâ hâ, 44 ob ge pristera omsa ǁkhawa sī nî kōǃnâ, tsîb ga khōǀaesenna khoraǂuisen, os ge omsa a ǃanuoǃnâ. 45 Os ge ǁnāti ī omsa khôaǁnâhe tsî ǁîs ǀuin, hain tsî oms ge ǂkhau-ūsa i ǂgoab tsîn hoana hâǃkhaib ǃauga hâ ǃanuoǃnâ ǃkhai-i tawa sī nî aoxūhe. 46 Khoe-i hîa ga ǂganammâisa ǃanuoǃnâ oms ǃnâ sī a ǂgâ-i ge hoaraga tsēsa nî ǃanuoǃnâ. 47 Khoe-i hîa ǁnāti ī oms ǃnâ ga sī ǁgoe tamas ka io ǂû-i ge ǁî-i sarana nî ǁā.

48 Xaweb ga pristera ǂkhauǂuiǃnâsa oms tawa sī, tsîb ga mû khōǀaesenni khoraǂuisen tamasa, ob ge ǁîba ǁnā oms a ǃanu ti nî mî, khōǀaesenni ǃaruǀî a ǀkhai xui-ao. 49 Pristeri ge omsa ǃanuǃanus ǃaroma ǀgam anirora, sederhais di ǃâro-i, ǃkhaeǀapa ǁapa-i tsî hisopǁnâuro-i tsîna nî ū. 50 ǁNās khaoǃgâb ge ǁîba ǀgui anirosa ǁgam-e ūhâ ǂgoaxapas ǂamai nî ǃgam. 51 Pristeri ge sederhais di ǃâro-i, hisopǁnâuro-i, ǃkhaeǀapa ǁapa-i, tsî ûitsama aniros tsîna ǀguipa ū tsî ǃgamhe go aniros di ǀaob tsî ǃanu ǁgam-i tsîn ǃnâ nî ǂgom. ǁÎb ge hû ǃnāde ǁî-i ǀkha omsa nî ǀgapi. 52 Nēb ge ǀgaub pristeri omsa nî ǃanuǃanuba: Aniros ǀaob, ǃanu ǁgam-i, ûitsama aniros, sederhais di ǃâro-i, hisopǁnâuro-i tsî ǃkhaeǀapa ǁapa-i tsîn ǀkha. 53 ǁNās khaoǃgâb ge ǁîba ûitsama anirosa hâǃkhaib ǃauga ǂoa-ū tsî nî ǃnoraǃnora. Nēs ǀkhab ge omsa ǃKhūb ǀkha ǂkhîbagusa ra dība, tsîs ge ǁîsa nî ǃanu. 54 Nēgu ge ǁgaragu hîa sao ra khōǀaesenain xa hâga: 55-56 ǀHapin, tsuidi, tamas ka io ǂunub tsî khōǀaesenni saran tsî omdi tsîn ǃnâ ra hân xa. 57 Nē ǁgaragu ge mâǁae-i xū-e a ǃanuoǃnâ tamas ka io a ǃanu ǃkhaisa ra ǃgāǃgā.