Aronni ôakha ǁoreb ge ǁōba ra ǃaroma
1 Aronni ôakha Nadab tsî Abihub tsîkha ge mâb hoaba ǁîb di ǀaepanna ū, khau ra ǂnomde ǂgāǃnâ, ǃgâihamxūna ǁîdi ai tsoro tsî ǃKhūba ge ǁguiba. Xawes ge nē ǀaesa ge ǃanuoǃnâ i, ǃKhūb di mîmās ǃoagu i ge hâ i xui-ao. 2 ǁNātimîsib ge ǃKhūba ǁîkha ǀaes ǀkha ge ǂhubiǂui tsî kha ge ǃKhūb di mûǁae ge ǁō. 3 ǁNās khaoǃgâb ge Moseba Aronni ǃoa ge mî: “Nēs ge ǃKhūb ge ǀnai mî hâ-i ǃkhaisa, ‘Tita ra ǃoaban hoan ge nî ǂan, tita a ǃanu ǃkhaisa; tita ge ti ǂkhaisiba ti khoen ai nî ǂhaiǂhai.’ ” Xawe Aronni ge xū-i xare-e ǃhoa tama ge i.
4 ǁNās khaoǃgâb ge Moseba Aronni ǁnaosab Usieli di ôakha, Misaeli tsî Elsafanni tsîkha ǂgai tsî ǁîkha ǃoa ge mî: “Hā î kho sakho ǁnurikha di sorode ǃAnun di ǃAnu ǃkhaib aiǃâba xu ūbē tsî hâǃkhaiba ǃoa ǃgū-ū.” 5 Tsî kha ge Moseb ge mîmā khami ǀgūse ǀkhī tsî sorora ai hâ saran ai ǃkhō tsî sorora hâǃkhaiba xu ge taniǂui.
6 Moseb ge ǃaruǀî Aronni tsî ǁîb ôakha Eleasari tsî Itamari tsîgu ǃoa ge mî: “Tā sago danade kam tama is tsî saran âgo ǀkhausa dītsâ, nēs nî sago tsîn ra ǃoa ǃkhaisa ǁgauǂui xuige. ǃOa go ka, o go nî ǁō, tsîb hoaraga ǁaib ǃKhūb diba hoaraga ǀhûhâsib ai nî hâ xuige. Xawe sago di Israelǁî ǃgâsan hoan ge ǃKhūb ge ǀaes ǀkha a ǃgam khoekha ǃaroma a ǃoa ǁkhā. 7 Tā ǁkhāti ǃKhūb di Tentommi ǂgâ-amsa xu ǃgû. Nēsa go ka dī, o go ge nî ǁō, ǃKhūb ǀnau-ū-oli-i sago ai hâ xui-ao.” ǁÎgu ge Moseb ge mîmā khami ge dī.
ǁGaragu pristergu ǃaroma
8 ǃKhūb ge Aronna ge mîmā: 9 “Sats tsî sa ôagu tsîgo ge ǂauxûi-i tamas ka io ǀgaisa āxū-e ā hâse ǃKhūb di Tentommi ǃnâ ǃoaba tide. Nēsa go ka dī, o go ge nî ǁō. Nēb ge sago surib ǃaromas tsîna nî hâhâ ǁgaraba. 10 ǀGoras ge nî dīhe ǁkhā, Elob di xūn tsî ǁîb di taman tsîn ǁaegu, tsî ǃanu xūn tsî ǃanuoǃnâ xūn tsîn ǁaegu. 11 Tita ge Moseb ǃnâ-u sadu hoado mîmā ǁgaragu hoaga Israelǁaesa ǁkhāǁkhā.”
12 Moseb ge ǃaruǀî Aronni tsî ǁîb di ûiǃgau hâ ǀgôakha Eleasari tsî Itamari tsîgu ǃoa ge mî: “ǃKhūb ge ǀaeǁguibasa ǁguibahes khaoǃgâ ge ǃgau ǃhoroǁguibasa ū, î khūkhū-e ūhâ tama pere-e am tsî altars tawa sī ǂû, nēs a ǃanu ǁguiba xuige. 13 Nē ǁguibas ge ǃanu ǃkhais tawa ǀgui nî ǂûhe, nēs a sago di ǃâ, ǀaeǁguibas ǃKhūb ge ǁguibahesa xus hâ xui-ao. Nēs ge ǃKhūb ge mîmā te ǀgausa. 14 Xawe ǁkhaib tsî amǀkhāb tîs ǀō-aisa mās tsî ǁguibas ase ǃKhūba ra ǁguibahera go ge sago tsî sago ǀaokhoen tsîna ǃanuse ra ǃgapaǀîhe ǃkhai-i hoa-i ai nî ǂû. Nē ǁguibadi ge sago tsî sago ǀaokhoen di Israelǁaes ra ǀhûhâsib ǂkhîbagus ǁguibas ase ǁguibade xu hâ. 15 Israelǁaes ge ǀaeǁguibas ǃaroman ga kaub ǃâna ǃKhūb di ǃgôasib ǃaroma a hā-ū ǁaeb ǂûb ai ǁkhaib tsî amǀkhāb tîs tsîra nî ǀkhī-ū. Nē ǁguibadi ge ǃKhūb ge mîmā khami hoaǁae sago tsî sago ǀaokhoen tsîn di.”
16 ǃAruǀîb ge Moseba ǁoreǁguibas ǃaroma nî ǁguibahe pirib xa dîǃgâ, ob ge ǂhubiǂuiheb ge ǃkhaisa ge mîbahe. Tsîb ge kaise Eleasari tsî Itamari tsîkha ǀkha ǁaixa tsî ǁîkha ge dî: 17 “Tare-i ǃaroma kho nē ǁoreǁguibasa ǃanu ǃkhai-i tawa go ǂû tama hâ i? Nēs ge kaise ǀō-aisa ǁguibas ǃKhūb ge mā khosa, khoen di ǁoren ǁîs ǀkha nî ūbēhe, tsîn ǂkhîbagusa ǃKhūb tawa nî hōse. 18 ǃAnun di ǃAnu ǃkhaib tawab pirib di ǀaoba ǂgâxa-ūhe tama xui-ao go ge ǁoreǁguibasa ǁnāpa ga ǂû hâ, tita ge mîmā hâ i khami.”
19 Ob ge Aronna ge ǃeream: “Nētsē ta ga ǁoreǁguibasa ǂû hâ, xawe ǃKhūba ūǃoab ga hâ? Khoen go nētsē ǁîn di ǁoreǁguibas tsî khauǁguibara ǃKhūba hā-ūba, xawes tsînab ge nē tsūǀkhāba go hāǂam te.” 20 Moseb ge Aronni mîdeb ge ǁnâu, o ge ǂkhîǂâixa.
© Khoekhoegowab Elobmîs © Bible Society in Namibia, 2020.
