Akanni di dīsās
1 Israelǁîn ge tān Jerixosa xu hîkākāhe nîse ī xūn xa xū-i xare-e ū, tin ge ǃKhūb xa mîmāhe mîmāsa ge ǁnâuǀnamoǃnâ. Akan ti ǀon hâ khoeb ge nē mîmāsa ge ǁnâuǀnamoǃnâ, ǁnā-amagab ge ǃKhūba Israelǁîna kaise ge ǁaixaǂam. (Akanni ge Karmib ôa tsî Sabdib ǁnuri ge i, tsîb ge Serab surib, Judab ǃhaos diba xu ge hâ i.)
2 Josuab ge ǀnî khoega Jerixosa xu Ais, Betels aiǂoas ǃnâ Bet-Avens ǀgūse ǁgoes ǃoa ge sî, î gu ǃhūba sī ǃkhēǃnâ. O gu ge ǁnāti sī dī 3 tsî Josuaba hā ge mîba: “Hoaraga aogu Aisa nî ǁnāǂam ǃkhais ge ǂhâbasa tama hâ. ǀGam tamas ka io ǃnonaǀoadisi aogu ǀguiga ǁnāǀî sî. Tā hoaraga toroǂnubisa Ais ǃoagu nî ǃkhamse sî, ǂkhari a ǃāros ge.” 4 ǁNāti gu ge ǁaubexa ǃnonaǀoadisi Israelǁîga Aisa ge ǁnāǂam, xawe gu ge Ais aogu xa ǃkhamdāhe tsî ge ǁhâ. 5 Ais aogu ge ǁîga ǃās di dao-amsa xu ǀuixa ǃkhaib kōse ǃgôaǃgon tsî ǁaubexa ǃnonadisiǃnaniǀa aogu ǁîgu diga ǃhama ǃkhaib ai ge ǃgam. Israelǁîn ge ǂkhabuǂâi tsî kaise ge ǃao.
6 Josuab tsî ǁaes ǂgaeǂgui-aogu tsîgu ge tsûaǂgaob xa saran âga ǀkhau, ǃGaeǀhaos ǂGaes ǃKhūb dis aiǃâ ǃhūb ai aoǁguisen tsî ǃuis kōse ǁnāpa ge ǁgoe, ǃoab âga ǁgaus ǃaroma tsaraba danadi âgu ai tsoro hâse. 7 ǁNās khaoǃgâb ge Josuaba ge mî: “ǃKhū Elotse, tare-i ǃaromats kha ǁnâi Jordanǃāba ge ǃgâu-ū da? Amorǁînats nî māǁnâ dagasa? Hîkākā dats nîsesa? Tare-i ǃaromats go Jordanni nauǃani da nî ǁanse ǁnāxū da tama hâ i? 8 ǃKhūtse, tare-e ta nēsi nî mî, Israelǁîn go khākhoen aiǃâ a ǁhâo? 9 Kanaanǁîn tsî ǃhūb ǃnâ hâ khoen hoan tsîn ge nēs xa nî ǁnâu. ǁÎn ge xāǂgā tsî nî ǃgamǂui da. O tare-ets sa ǀons di ǃgôasib ǃaroma nî dī?”
10 Ob ge ǃKhūba Josuab ǃoa ge mî: “Khâima, tare-i ǃaromats ǁnāti ǃhūb ai ǁgoe? 11 Israelǁîn ge ge ǁore. ǁÎn ge ǃkhōǀgaipen nîse ta ge ǁîn ǀkha dī ǃgaeǀhaosa ge khôa. ǁÎn ge hîkākāhe nîse ī xūn xa ǀnîna ge ū. ǁÎn ge ǁnā xūna ǃnari, ǁîn ǂama ǂhumi tsî ǁîna ǁîn di xūn ǀkha ǀguipa ge mâi. 12 ǁNā ǃkhais ǃaromas ge Israelǁîn khākhoen âna a mâǃoa ǁoasa. ǁÎn ge khākhoen âna xu ra ǁhâ, ǁîn ǂûn go hîkākāhe nî xūse a ī xui-ao. Tita ge ǃaruǀî sado hâǀkhā tide, ū du tidese du ge mîmāhe xūna du ga hîkākā tama io. 13 Khâima, î ǁaesa ǃanuǃanu tsî ǂhomi, tita ǃoan nî hāse. ǁÎna mîba în ǁari ǂhomisen hâse hâ, tita ǃKhūta, Israeli Elota ge nēti ra mî: ‘Israelǁîdo, sadu ge hîkākā du nîse ta ge mîmā du xūna sadu ǃnâ ūhâ. Sadu ge sadu khākhoen ǃoagu mâ ǁkhā tide, ǁnā xūna du aoxū tamas kōse.’ 14 ǁÎna mîba ǁgoagas mâ ǃhaos hoasa ǀguiǀguibese nî hā-ūhe ǃkhaisa. Tita ga ǁîsa ǃkhōǂui ǃhaos di ǃhaoǃnādi ge ǀguiǀguibese aisǀkhāb ǁga nî hā. Tita xa ga ǃkhōǂuihe ǃhaoǃnās ge ǀaokhoen ase ǀguiǀguibese aisǀkhāb ǁga nî hā tsî ǃkhōǂui ta ka ǀaokhoen ge ǀguiǀguibese aisǀkhāb ǃoa nî hā. 15 ǁNāb, hîkākāhe nîse ī xūn ǀkha ga hōheb ge nî ǂhubiǂuihe, ǁîb ǀaokhoen tsî ūb hâ xūn hoan ǀkha, ǁgaisi ǁorebab ge Israeli ǂama hā-ū tsî ti ǃgaeǀhaosab ge khôa ǃkhais ǃaroma.”
16 Sao ra ǃnauǁgoagab ge Josuaba Israelǁîna, ǃhaosa xu ǃhaos ǁga ǀguiǀguibese hā-ū, os ge Judab ǃhaosa ge ǃkhōǂuihe. 17 Judab ǃhaosab ge ǃhaoǃnādi ǃnâ ǀguiǀguibese a hā-ū, os ge Serab ǃhaoǃnāsa ge ǃkhōǂuihe. Serab ǃhaoǃnāsab ge ǀaokhoen ase ǀguiǀguibese a hā-ū, on ge Sabdib ǀaokhoena ge ǃkhōǂuihe. 18 Sabdib ǀaokhoenab ge ǀguiǀguibese a hā-ū, ob ge Akanni, Karmib ôa tsî Sabdib ǁnuriba ge ǃkhōǂuihe. 19 Ob ge Josuaba ǁîb ǃoa ge mî: “Ti ôatse, nēpa amaba ǃKhūb, Israeli di Elob aiǃâ ǃhoa, îts ǁguiǁnâ. Tare-ets ge dīsa nēsi mîba te. Tā xū-i xare-e tita xu gaugau.”
20 Ob ge Akanna ge ǃeream: “Ama-i ge, ǃKhūb, Israeli di Elob ǃoagu ta ge ge ǁore; nēti ta ge ge dī. 21 ǁNāpa da ge hō xūn ǃnâ ta ge îxa Babiloniaǁî saraba ge mû, tsî ǁkhāti ǀgam kiloxramkha ǀhaiǀurib tsî ǃhuniǀurib, ǃkhare kiloxrammi xa ǃnāsase ǃgommi tsîna. Tita ge ǁîna kaise ǂhâba tsî ge ū. ǁÎnats ge ti tentoms ǃnâ khaoǂgāhe hâse nî hō; ǀhaiǀurib ge xūn hoan ǃnaka hâ.”
22 Josuab ge ǀnî khoega ge sî tsî gu ge tents ǁga ǃkhoe tsî ǁnā xūna ǁnāpa sī khaoǂgāhe hâse ge hō, ǀhaiǀurib xūn hoan ǃnaka hâse. 23 ǁÎgu ge ǁîna tentsa xu ǂoaxa-ū tsî Josuab tsî Israelǁîn hoan tawa sī-ū tsî ǃKhūb aiǃâ ge ǁgui. 24 On ge Josuab tsî hoaraga Israelǁîn tsîna Akanni tsî ǀhaiǀurib, ǂamsarab tsî ǃhuniǀurib tsîna ǁîb ôagu tsî ǁîb ôadi, ǁîb goman, dâukin tsî gūn, ǁîb tentoms tsî ūb hâ xūn hoana ǃkhō tsî Akorǃgoaǃnāb ǁga ge ǃgû-ū. 25 Tsîb ge Josuaba ge mî: “Tare-i ǃaromats nēti ī ǃgomsiba sida ǂama go hā-ū? ǃKhūb ge nēsi ǃgomsiba sats ai nî hā-ū.” On ge hoaraga khoena Akanna ge ǀuiǁhomǃan; ǁîn ge ǁkhāti ǁîb ǀaokhoen tsî xūn âb tsîna ǀuiǁhomǃan tsî ge ǂhubiǂui. 26 Tsîn ge kai ǀuiǁkhopos, nētsēs kōse ǂnôasa ǁîb ai ge ǀhaoǀhaoǂnûi. ǁNā-amagas ge ǁnā ǃkhaisa nētsēs kōse Akorǃgoaǃnāb ti ra ǀonǂgaihe.
Ob ge ǃKhūb di ǁaiba ge toa.
© Khoekhoegowab Elobmîs © Bible Society in Namibia, 2020.
