Israelǁîn ge ǂâiǂâisensaos ase ǀuide ra ǂnûikhâi
1 Hoaraga ǁaes ge Jordanna a ǃgâutoa, ob ge ǃKhūba Josuab ǃoa ge mî: 2 “Disiǀgamǀa khoega ǁhûiǂui, ǀguiba mâ ǃhaos hoasa xu, 3 î ǁîga mîmā, î gu Jordanni ǁaeguba xu, pristergu ge mâ i ǃkhaisa xu disiǀgamǀa ǀuide ūkhâi. A gu ǁnā ǀuide ūsao tsî nēǃoe du hâǃkhaiba nî ǂnaumâi ǃkhais tawa sī ǂnûi.”
4 Ob ge Josuaba disiǀgamǀa khoegu ǁhûiǂuib gega ǂgai 5 tsî ge mî: “ǃGaeǀhaos ǂGaes ǃKhūb, sadu Elob dis aiǃâ Jordanni ǁaegub kōse ǃgûǂgâ, îb mâb hoab âgo ǀgui ǀuisa ǃhōs ai ūkhâi, ǀguisa mâ ǃhaos Israels dis hoas ǃaroma. 6 Nē ǀuidi ge khoena ǃKhūb di dīgu xa nî ǂâiǂâiǃnâ. ǀGôan âdu ga ǃgoaxaǁaeb ǃnâ tare-e di nē ǀuide sadu ǃaroma ra ǂâibasen ǃkhaisa a dî, 7 o du ge ǁîna ǃGaeǀhaos ǂGaes ǃKhūb dis ge Jordanna ǃgâu, ob ge ǃāb di ǁgamma a dâuǀû ǃkhaisa nî mîba. Nē ǀuidi ge Israelǁaesa hoaǁae tare-i ge nēpa ī ǃkhaisa nî ǂâiǂâiǃnâ.”
8 Khoegu ge Josuab ge mî khami ge dī. ǃKhūb ge Josuaba mîmā khami gu ge disiǀgamǀa ǀuide Jordanni ǁaegub ǃnâ ūkhâi, ǀguisa mâ ǃhaos Israels dis hoas ǃaroma, ǁîde hâǃkhaib kōse tani tsî ǁnāpa sī ge ǂnûi. 9 Josuab tsîn ge disiǀgamǀa ǀuide Jordanni ǁaegub ǃnâ, ǃGaeǀhaos ǂGaesa ge tani hâ i pristergu ge mâ i ǃkhais ai ge ǂnûikhâi. ǁNā ǀuidi ge nētsēs kōse ǁnāpa hâ. 10 Pristergu ge Jordanni ǁaegub ǃnâ ge mâǀgara, hoaraga xūn ǃKhūb ge Josuaba mîmān, khoenab dīn nîga nî mîban hoan ge dītoahes kōse. Nēs ge Moseb ge mîmā hâ i ǃkhaisa.
ǁAes ge ǃnoesase ǃāba ge ǃgâu. 11 Hoan ge ǃkharu, o gu ge ǃGaeǀhaos ǂGaes ǃKhūb dis ǀkha hâ pristerga ǁaesa ge aimâba. 12 O gu ge Rubenni tsî Gadi tsîkha ǃhaora tsî ǃkhare ǃhaos Manaseb dis di aogu, ǃkhammi ǃoa ǂhomisen hâga ǁaes ais ai ge ǃgâu, Moseb ge mîmā hâ i khami. 13 ǁAubexa hakadisiǀoadisi aogu, ǃkhammi ǃoa ǂhomisen hâgu ge Jerixos ǂgāga ǃoa ge ǃgâu tsî ǃKhūb ge ǁîgu ǀkha ge hâ i. 14 ǃKhūb ge ǁnātsē a dī ǃkhais ge Josuaba Israelǁîn mûǁae kai ǃgôasiba ge mā. ǁÎn ge Josuaba ǁîb di ûitsēdi hoade kai ǃgôasiba ge ūba hâ i, Moseban ge kai ǃgôasiba ūba hâ is ǁkhās khami.
15 ǃKhūb ge Josuaba ge mîba, 16 îb ǃGaeǀhaos ǂGaesa tani hâ pristerga mîmā, î gu Jordanna xu ǂoaxa; 17 ob ge Josuaba ǁnāti ge dī. 18 Pristergu, ǃGaeǀhaos ǂGaesa tani hâgu ǃāba xu ra ǂoaxa, hîab ge ǃāba ǁkhawa ge dâutsoatsoa, ǀnomamkha âbab ge dâuǂams kōse.
19 Disiǁî tsēs, ǂguro ǁkhâb dis ain ge khoena Jordanna ǃgâu tsî Jerixos aiǂoas ǃnâ, Gilgals tawa hâǃkhaiba ge dībasen. 20 ǁNāpab ge Josuaba disiǀgamǀa ǀuidi Jordanna xu ge ūhede ge ǂnûikhâi. 21 Tsîb ge Israelǁîn ǃoa ge mî: “ǃGoaxaǁaeb ǃnân ga sadu ôana dî du, tare-e di nē ǀuide ra ǂâibasensa, 22 o du ge ǁîna Israelǁîn ge ǂnâsa ǃhūb ai Jordanna a ǃgâu ǃkhaisa nî mîba. 23 ǁÎna mîba ǃKhūb sadu Elob ge Jordanni ǁgam-e sadu ǃaroma a ǂnâ kaisa, sadu nî ǃkharus kōse, ǀApahuribab ge sada ǃaroma a ǂnâ kais ǁkhās khami. 24 ǁNā ǃkhais ǃaroman ge hoaraga khoen ǃhūbaib dina nî ǂan mâtikō kai ǀgaibab ǃKhūba ūhâsa tsî du ge sado ǃKhūb sadu Eloba ǃgôasiba nî mā.”
© Khoekhoegowab Elobmîs © Bible Society in Namibia, 2020.
