ǁHaiǁhâǀîǃādi
(Numeri 35:9-34)1 Ob ge ǃKhūba Josuab ǃoa ge mî, 2 îb Israelǁîna mîba: “ǁHaiǁhâǀîǃādi ǁîdi xab nî mîba duse ta ge Moseba mîmā hâ ide ǁhûiǂui. 3 Khoe-i ga nau khoe-e ǁgapas ai ǃgam, o i ge ǁnāǀî a ǃkhoeni ǁkhā, î i ǁî-e ra ǀkhao ǂgao khoe-e xu ǁhâ. 4 ǁÎ-i ge nē ǃādi di ǀguis ǁga a ǁhâ ǁkhā, tsî i ge ǃās di dao-ams tawa hâ ǀgoraǃgâǃkhaib tawa sī tsî ǂgaeǂgui-aoga tare-i go ī ǃkhaisa nî mîǃāba. O gu ge ǁîga ǁî-e ǃās ǃnâ ǂgâ kai tsî ǁanǃkhai-e nî mā, ǁnāpa i nî hâse. 5 ǀKhaoǂgao ra-i ga ǁî-e ǁnāpa ǃgôaǃgonsī, on ge ǃās di khoena ǁî-e ǁnā khoe-i ai māǁnâ tide, ǁî-i ge nau khoe-e ǁgapas ai a ǃgam tsî ǁaib ǃnâ ǁnāsa dī tama xui-ao. 6 ǁÎ-i ge ǀhûhâsib aiǃâ i nî ǀgoraǃgâhe tsî i ǁnā ǁaeb di ǀgapiprister-e nî ǁōs kōse ǃās ǃnâ nî hâ. ǁNās khaoǃgâ-i ge ǁî-e oms â-i ǁga, ǁî-i di ǃās hîa i ge ǁhâxū hâ is ǁga a oa ǁkhā.”
7 Jordanni di huriǂoasǀkhāb ain ge Kedes, Galileab ǃnâ, Naftalib ǃnâuxa ǃhūb ǃnâ ǂnôas, Sexems Efraimmi di ǃnâuxa ǃhūb ǃnâ ǂnôas tsî Hebrons, Judab ǃnâuxa ǃhūb ǃnâ ǂnôas tsîde ge ǁhûiǂuihe. 8 Jordanni di aiǂoasǀkhāb ain ge Besers, Jerixos aiǂoas ǃnâ ǁgoe ǃgaroǃhūb ǃnâ Rubenni di ǀkharib ǃnâ ǂnôas, Gadi ǀkharib ǃnâ Ramots, Gileadi ǃnâ ǂnôas tsî Golans, Basanni ǃnâ Manaseb di ǀkharib ǃnâ ǂnôas tsîde ge ǁhûiǂui. 9 Nēdi ge ǁhaiǁhâǀîǃādi hoaraga Israelǁîn tsî ǁîn ǁaegu hâ ǃhaokhoen tsîn ǃaroma ge ǁhûiǂuihede. Khoe-e ga ǁgapas ai ǃgam khoe-i hoa-i ge ǁnāǀî a ǁhaini ǁkhā, ǀkhao-ao-i xa i ǃgamhe tidese; khoe-i xare-i ge ǀhûhâsib aiǃâ i aibe ǀgoraǃgâhe tama hîa ǃgamhe tide.
© Khoekhoegowab Elobmîs © Bible Society in Namibia, 2020.
