Manaseb di ǀkharib
1 ǀNî ǃâb Jordanni huriǂoas ǃnâ ǁgoe ǃhūb diban ge Josefi di ǂguro ǀgôab Manaseb ǃhaos di ǀaokhoena ge māhe. Gileadi îb Makiri ge Manaseb di ǂguro ǀgôa tsî ǁkhāti toro-ao ge i, ǁnā-amagab ge Gileadi tsî Basanni tsîkha, Jordanni aiǂoas ǃnâ ǁgoekha ge māhe. 2 Jordanni huriǂoas ǃnâ ǁgoe ǃhūb ge nau ǀaokhoen Manaseb dina ge māhe: Abieseri, Heleki, Asrieli, Sexemmi, Heferi, tsî Semidab tsîga. Nēgu ge aoreǀgôagu Josefi ôab Manaseb di ge igu tsî ǁîgu ǀaokhoen di dana ge iga. 3 Manaseb ôab Makiri di ôab Gileadi di ôab Heferi di ôab Selofehadi ge aoreǀgôa-e ge ūhâ tama hâ i tsî tareǀgôadi ǀguide ge ūhâ i. ǁÎdi ge Maxlas, Noas, Hoglas, Milkas tsî Tirsas tsîde. 4 ǁÎdi ge prister Eleasari tsî Nunni ôab Josuab tsî ǂgaeǂgui-aogu tsîgu tawa sī tsî ge mî: “ǃKhūb ge Moseba ge mîmā, îb sise tsî sise aore ǀaokhoegu tsîda ǃhūb di ǃâ-e sida dise mā.” O di ge ǃKhūb ge mîmā hâ i khami ǁîdi ǀaokhoegu ǀkha ǃhūba ge māhe. 5 ǁNās ǃaromab ge Manaseba disi ǃâde noxopa Gileadi tsî Basanni tsîkha xōǀkhā Jordanni di aiǂoas ǃnâ ge ǀarobahe, 6 ǁîb di tarekhoedi di ôananôagub tsî aorekhoegu di ôananôagub tsîn hoan ge ǃhūba a māhe xui-ao. Gileadi ǃhūb ge ǃgau ge khoen Manaseb ǃhaos dina ge māhe.
7 Manaseb di ǀkharib ge Asera xu Mikmetats, Sexems aiǂoas ǃnâ ǁgoes kōse gere sī. ǁÎb di ǀkharib ge ǃkhawagas kōse gere sī tsî Entapuas di khoen tsîna ge ǃkhōǂgā hâ i. 8 Tapuas ǂnamipe ǁgoe ǃhūb ge ge Manaseb di i, xawe Tapuas hîa ǃhūǀgoras tawa ǁgoes ge ge Efraimmi di surib di i. 9 ǃHūǀgoras ǁnā ǀkharib dis ge Kanaǃārob kōse gere sī. ǃĀrob ǃkhawagas ǃnâ ǁgoe ǃādi ge Manaseb ǀkharib ǃnâ di ge ǁgoe i xawe ge Efraimmi di i. Manaseb di ǃhūǀgoras ge ǀapasǀkhāb ǃārob dib xōǀkhāba-u ǃkharu tsî Mediteraneahurib tawa sī gere ǀam. 10 Efraimmi di ǃhūb ge ǃkhawagas ǃnâ ge ǁgoe i tsî Manaseb diba ǀapas ǃnâ, tsî Mediteraneahurib ge ge ǁîkha di huriǂoasǀkhāb di ǃhūǀgora i. Aseri ge ǃkhawagas ǃnâ ge ǁgoe i tsî Isaskara aiǂoas ǃnâ. 11 Isaskari tsî Aseri tsîkha di ǀkharikha ǃnâb ge Manaseba Betsans tsî Ibleams tsîra tsî ǁîra ǂnamipe ǁgoe ǃārodi, Dors, Endors, Tanaks, Megidos tsî ǁîdi ǂnamipe ǁgoe ǃārodi tsîde ge ūhâ i. 12 Xawen ge Manaseb khoena ǁnā ǃādi ǃnâ ǁan hâ khoena ge ǁgariǂui ǁoa i tsîn ge Kanaanǁîna ǁnāpa ge ǁanhâhâ. 13 Israelǁîn ge ǀgain ge xawe Kanaanǁîna ǃhūba xu ǂoa kai tama ge i tsî ǁîna ǁgarisîsenna gere dī kai.
Josefi di surib ge ǃnāsa ǃhūba ra ǂgan
14 Josefi di surib ge Josuab ǃoa ge mî: “Tare-i ǃaromats ǀgui ǃâb ǃhūb dib ǀguiba sida dise ra mā da? Sida ge kaise a ǂgui, ǃKhūb ge ǀkhae da xui-ao.”
15 Ob ge Josuaba ge ǃeream: “Kaise du ga ǂgui tsîb ga ǃnâuxa ǃhūb Efraimmi diba a ǂkhariba duo ǀgom, haixa ǃkhaib ǃnâ ǂgâ, î Perisǁîn tsî Refaimǁîn di ǃhūb ǃnâ ǃkhai-e sī ǃanuǃanubasen.”
16 On ge ǁîna ge mî: “ǃHomxa ǃhūb ge sida ǃaroma ǂâu hâ kōse kai tama hâ, tsî Kanaanǁîn ǂgāgu ai ǁan hân, Betsans tsî ǁîs ǂnamipe hâ ǃādi tsî Jesreelǃgoaǃnāb ǃnâ ǁan hân tsîn ge ǀuritorokunide ūhâ.” 17 Ob ge Josuaba Efraimmi tsî Manaseb tsîkha ǃhaora ǃoa ge mî: “Sadu ge ǂgui tsî ǁkhāti a ǀgaisa tsî du ge ǀguis xa ǃnāsa ǃâde nî hō. 18 ǃHomxa ǃhūb ge nî sadu di. ǀGom haixa ǃkhaib a xawe du ge ǁîba ǃanuǃanu tsî nî ūbasen, ǀgui ǀkhāba xu nauǀkhāb kōse. Kanaanǁîn ge ǀuritorokuniden ūhâ tsîn a ǀgaisa, xawe sadu xa nî ǁgariǂuihe.”
© Khoekhoegowab Elobmîs © Bible Society in Namibia, 2020.
