Efraimmi tsî Manaseb tsîkha ge māhe ǀkharib
1 ǃKhawagasǀkhāb di ǃhūǀgoras Josefi di ôananôagub ge māhe ǃhūb dis ge Jerixos ǀaudi di aiǂoasǀkhāb ai, Jordanni ǀgūseba xu tsoatsoa tsî ǃgaroǃhūb kōse gere ǃkharu. ǁÎs ge Jerixosa xu ǃnâuxa ǃhūba-u ǃkharu tsî Betels kōse gere sī. 2 Betelsa xus ge Lus kōse sī tsî Atarot Adars, Arkǁîn ge ǁanǃnâ hâ is kōse gere ǃkharu. 3 Huriǂoasǀkhāb ǁgas ge Jafletǁîn di ǀkharib ǃnâ ǃNakab-Bet-Horons kōse gere sī. ǁNāpa xus ge Gesers kōse ǃkharu tsî Mediteraneahurib tawa sī gere ǀam.
4 Josefi di ôananôagub, Efraimmi tsî Manaseb tsîkha di ǃhaora ge ǁnā ǃhūba ǁîn dise ge māhe.
Efraimmi ǃhaos ge māhe ǀkharib
5 Nēb ge Efraimmi ǃhaos di ǀaokhoen ge māhe ǀkhariba. ǁÎn di ǃhūǀgoras ge Atarot-Adarsa xu aiǂoasǀkhāb ǁga ǀGapikab-Bet-Horons kōse gere sī, 6 tsî ǁnāpa xu Mediteraneahurib kōse gere ǃkharu. ǃAruǀîs ge ǃhūǀgorasa Mikmetats, ǀapas ǃnâ ǁgoesa xu Tanat-Silos kōse sī tsî aiǂoas ǃnâ Janoas kōse gere ǃkharu. 7 Janoasa xus ge Atarots tsî Naaras tsîra kōse ǁgôa tsî Jerixos tawa sī tsî Jordanni tawa sī gere ǀam. 8 ǃHūǀgoras ge Tapuasa xu Kanaǃārob kōse sī tsî Mediteraneahurib tawa gere ǀam. Efraimmi ǃhaos di ǀaokhoen ge ǁnā ǃhūba ǁîn dise ge māhe. 9 Efraimǁîn ge ǀnî ǃādi tsî ǃārodi Manaseb di ǀkharib ǃnâ ǂnôadi tsîna ge māhe. 10 Xawen ge ǁîna Gesers ǃnâ ge ǁan hâ i Kanaanǁîna ǁgariǂui tama ge i, tsîn ge nētsēs kōse ǁîn ǁaegu ǁan hâ, xawen ge ǁgarisîsenna gere sîsen kaihe.
© Khoekhoegowab Elobmîs © Bible Society in Namibia, 2020.
