Josua 14 - Khoekhoegowab New Translation 2020 (KKG20)

Jordanni huriǂoasǀkhāb ǃhūb di ǀgoraǂgāhes

1 Kanaanǃhūb, Jordanni huriǂoasǀkhāb ai ǁgoeb ge sao rase Israelǁîn ǃnâ ge ǀgorahe. Prister Eleasari, Nunni ôab Josuab tsî Israeli ǃhaodi ǀaokhoen di ǂgaeǂgui-aogu tsîn ge ǃhūba khoen ǃnâ ge ǀgora. 2 ǃKhūb ge Moseba mîmā hâ i khamis ge nē khoese tsî ǃkhare ǃhaodi di ǀkharigu ǀgoraǂgāsa ǀkhūsa aos ǀkha ge dīhe. 3-4 Moseb ge ǀnai Jordanni aiǂoas ǃnâ ǁgoe ǃhūba nau ǀgam ǃhaora tsî ǃkhare ǃhaosa ge mā hâ i. (Josefi di surib ge ǀnai ǀgam ǃhaora, Manaseb tsî Efraimmi tsîkha dira ǃnâ ge ǀgoraǂgāhe hâ i.) Leviǁîn ge ǀkharib ǃnâ ǃâ-e ge māhe tama hâ i, xawen ge ǃāde ge māhe ǁîdi ǃnân nî ǁanse tsî ǃû-aide, ǁîn di goman tsî gūn ǃaroma. 5 Israelǁîn ge ǃhūba ǃKhūb ge Moseba mîmā hâ i khami ge ǀgoraǂgā.

Kaleb ge Hebronsa ge māhe

6 ǀGuitsēn ge ǀnîn Judab ǃhaos dina Josuab ǁga Gilgals tawa ge hā. Ob ge ǁîn di ǀguib Kaleb, Jefuneb Keniǁîb ôaba ǁîb ǃoa ge mî: “ǂAnts ge a tare-eb ge ǃKhūba Kades-Barneas tawa sats tsî tita tsîkhom xa Moseb, Elob aob ǃoa mîsa. 7 Hakadisi kurixa ta a hîas ge ǃKhūb di ǃgāb Moseb ge Kades-Barneasa xu nē ǃhūba ta nî ǂanǂuiǃnâse sî tesa. Tita ge ama ǂhôa-e ǁîba ge oaǀkhī-ūba. 8 Xawe tita ǀkha ge ǃgû hâ i aogu ge sada khoena ge ǃao kai. Tita ge ǃKhūb ti Eloba ge ǁnâuǀnam. 9 ǁNās ǃaromab ge Moseba ǁnā ǃhūb tita ge ǃgûǃnâǃganuba da tita tsî ti ôan tsîda sida dise nî māhe ǃkhaisa ge mîmâiba te. 10 Xawe nēsi kō re. Hakadisi kurigu ge ǃKhūb ge Moseba ǁnāsa mîba hâ is khaoǃgâ go ǃkharu. ǁNās ge Israelǁîn ǃgaroǃhūb ǃnâ-u gere doe ǁaeb ai ge isa, tsî ǃKhūb ge mîmâib ge khami nēs kōse ûib ǃnâ ge ūhâ te. Tita ge nēsi a ǁkhaisadisikoroǀa kurixa, 11 xawe ta ge noxopa Moseb ge sî te tsēs ai ta ge ǀgaisa i khami a ǀgaisa. ǂÂu hâ ǀgaiba ta ge noxopa ūhâ torodīs tsî mâ xū-i hoa-e dīs ǃaroma. 12 Nēsi ǁnâi ǃnâuxa ǃhūb, ǃKhūb ge ǁnātsē mîmâiba teba mā te. Sige ge ǁnātsē ge mîba tsi kaikara khoen, Anakǁîn ti ra ǀonǂgaihen omǂnamisa kaiǃādi ǃnâ hâsa. ǀNîsib ge ǃKhūba tita ǀkha nî hâ tsî ta ge ǁîna nî ǁgariǂui, ǃKhūb ge mî khami.”

13 Josuab ge Jefuneb ôab Kaleba ǀkhae tsî Hebronsa ǁîb di ǃāse ge mā. 14 Hebrons ge noxopa a Jefuneb Keniǁîb ôab Kaleb di surib di, ǁîb ge ǂgomǂgomsase ǃKhūb, Israeli di Eloba ǁnâuǀnam xui-ao. 15 ǁNās aiǃâs ge Hebronsa Arbab ǃās ti gere ǀonǂgaihe. (Arbab ge Anakǁîn ǃnâ ge kai i aoba.)

Tsîb ge ǂkhîba nēsi ǃhūb ǃnâ ge hâ.