Jonab ge ǃKhūba ra ǁnâuǀnam
1 ǃKhūb ge ǁkhawa Jonab ǃoa ge mî: 2 “ǂHomisen, î kai ǃās Nineves ǃoa ǃgû tsî tita ra mā tsi ǂhôasa ǁîs khoena sī mîba.” 3 Ob ge Jonaba ǃKhūba ǁnâuǀnam tsî Nineves ǁga ge ǃgû. Nineves ge ǁnātikōse ge kai i, tsîs ge ǁîs ǃnâ-u ǃgûǃkharusa ǃnona tsēde gere ū. 4 Jonab ge ǃās ǃnâ ǂgâ tsî ǀgui tsēsab ge ǁîs ǃnâ ǃgûs khaoǃgâ ge ǂanǂan: “Hakadisi tsēdi khaoǃgâs ge Ninevesa nî hîkākāhe.”
5 Nineves khoen ge Elob di mîsa ge ǂgom. ǁNā-amagan ge ǂûtama* hâsa ge ǂanǂan tsîn ge hoaraga khoena, kai-e xu hoan xa ǂkhari-i kōse, ǃoab sarana ge ana.
6 Nineves di gao-aob ge nēsab ge ǁnâuo, trons âba xu khâi, anaǂamsarab âba ǁhû, ǃoab saraba ana tsî tsaob ǃnâ ge ǂnû. 7 Tsîb ge ǂanǂansa Nineves ǃnâ ge sîǂui: “Nēs ge gao-aob tsî ǁîb di ǂamkhoega xu ra hā ǂanǂansa. Hoaraga khoen, goman tsî ǀgoan tsîn hoan ge xū-i xare-e ǂû tamas ka io ā tide. 8 Khoen tsî ǂgarixūn tsîn hoan ge ǃoab sarana nî ana. Mâ khoe-i hoa-i ge ǀgaisase Eloba ǂgaiǀî tsî ǁî-i di tsū tanisens tsî ǂkhaba dīga xu nî ǃhobasen. 9 ǀNîsib ge Eloba ǁîb ǂâisa nî ǀkharaǀkhara; ǀnîsib ge ǁaib âba nî toa tsî da ge ǁō tide.”
10 Elob ge tare-en ge dī ǃkhaisa ge mû, tsî mâtin ge ǁîn di tsū dīga xu ǃhobasensa. Ob ge ǁîb di ǂâisa ge ǀkharaǀkhara tsî ǁîna mîb ge hâ i khami ǁkhara tama ge i.
© Khoekhoegowab Elobmîs © Bible Society in Namibia, 2020.
