1 Ob ge Joba ge ǃeream:
2 “Amase ta ǁnāti i īsa a ǂan;
xawe khoe-e Elob aiǃâ ǂhanu-ai ǁkhā-e?
3 Khoe-e Elob ǃoagu ǁhō-e kuru ǁkhā-e
tsî ǁîb di ǀoadisi dîde xu,
ǀguirosa xare ǃeream ǁkhāts nî?
4 Elob ǂgaob ge a gā-ai tsî ǁîb ǀgaiba ǁkhāsiba ūhâ;
tari-e ǁîba mâǃoa tsî ge dan-e?
5 ǁÎb ge ǃhomga ra ǂgubi kai
tsî ǁaib âb ǃnâ ǁîga ra dabaǃkhuri.
6 ǁÎb ge ǃhūbaiba mâǃkhais âba xu ra ǀgabiǂui
tsî ǂgurihaigu âba ra ǂgubi kai.
7 ǁÎb ge soresa ra mîmā, tsîs ge ǂoaxa tama hâ,
tsîb ge ǀgamirode ra ǂaoǂgan, tsî di ge ǃnâ tama hâ.
8 ǁÎb ǀguib ge ǀhomma ra ǃāǂui
tsî hurib di ǃgabiga ra dāǃgâ.
9 ǁÎb ge Beras, Orions tsî ǂAoǀgamirodi
tsî ǃkhawagas ǀgamirodi tsîna ge kuru.
10 ǁÎb ge kai tsî ôaǃnâheǁoasa
tsî ǃgôahōheǁoasa buruburuxa xūna ra dī.
11 “Tita tawab ga ǃkharu, o ta mû bi tama;
ǃgû-īb ka, o ta hōǃâ bi tama hâ.
12 ǁÎb ga xū-e tsububē, o tari-e kha nî ǁkhae bi?
Tari-e kha ǁîb ǃoa ‘Tare-ets ra dī?’ ti nî mî?
13 Elob ge ǁaib âba ǂgae-oa tama hâ.
ǁÎb ǂaira ǃnakan ge huriǀgurub hui-aona
dāǂkhūǂkhūhe hâse ǁgoe.
14 Mâ ǀgau-i ai ta kha ǁîba ǃeream ǁkhā?
Mâ mîde ta kha ǁîb ǃoagu a ǁhûi ǁkhā?
15 ǀHapio ta a, xawe ta ge ǁîba go ǃeream ǁoa i;
ǁîb, ti ǀGoraǃgâ-aob ai ǀgui ta ge
ǀkhomma ǀkhomabasen ǁkhā.
16 ǁÎb ǃoa ta ga ǂgai tsîb ga ǃeream te hâ,
xawe ta ge ti dommab go ǁnâu ǃkhaisa ga ǂgom tama hâ.
17 ǁÎb ge kaise ǁkhō ǂoas ǀkha ra hîǀhuru te
tsî ǃaroma-i ose ti ǀhapide ra ǂguiǂgui.
18 ǀOmǂui ta nî ǁae-i tsînab ge mā-am te tama hâ,
tsî ti ûiba tsâb ǀkha ra au-au.
19 ǀGaib di ǀnûgus kao, ob ge ǁîba amase a ǀgaisa!
ǂHanu-aisib xa i ga ǃgûo, tari-e ǁîb ǃoagu ǁhō-e a dī ǁkhā?
20 ǀHapio ta a, xawes ge ti ǂhunuma amsa ga ǁkhara te hâ;
ǂnao-o ta a, xawe di ge ti mîde ga ǀgoraǃgâ te hâ.
21 Tita ge a ǂnao-o. Ti ûib ǀkha ta ǁae tama.
Ti ûiba ta ra ǂhara.
22 Hoan a harebeoǃnâ! ǁNā-amaga ta ra mî:
‘ǂNao-on tsî ǀhapixan tsîn hoanab ra hîkākā.’
23 ǂŌǂōsib ga ǃnape tama ǁōba ǃaroma,
ob ra Eloba ǀhapio-i di tsâba âiǂui.
24 ǁÎb ge ǃhūba ǂkhabadī-aon di ǃomgu ǃnâ ra māǁnâ;
ǃhūb ǀgoraǃgâ-aogu di mûdeb ra ǂganam.
Elob ga dī tama i, o tari-e ra dī?
25 “Ti tsēdi ge ǃkhoe-ao-i xa a ǃhae;
ǁîdi ge ǃgâiaǂgao-i tsîna tsâ tamase ra ǁkhanaǃkharu.
26 ǁÎdi ge ǂāǂgaurodi khami ǃhaese ra doeǃkharu,
tsî ǃariǃkhās ǁîs amǀnē-i ai ra ǁhâiǁnâsens khami.
27 Tita ga mî: ‘Tita ge nî ǃgaeǀû,
tita ge ti ǃgaeǀgauba ǀkharaǀkhara tsî nî ǃgâiaǂgao.’
28 Ti tsâgu hoaga ta ge ra ǃao,
ti ǂnao-osisats ūǃoa tama ǃkhaisa ta a ǂan xui-ao.
29 ǀNai ta ǀhapixase hōhe hâo,
tare-i ǃaroma ta kha ǁause nî ǂhansen?
30 Tsamaros ǀkha ta ga ǁāsen
tsî sē-i ǀkha ǁānǃom,
31 xaweb ge Eloba ǁkhawa ǂgoaxa tsaus ǃnâ nî aoǂgā te
tsîn ge ti sarana ti taosib ase nî ī.
32 Elob ga tita khami khoe hâ, o ta ge ga ǃeream bi hâ;
tsî ta ge ǁîb ǀkha ǀgoraǃgâǃnaos aiǃâ ga ǂhai hâ.
33 ǁAegumâ-ao-i hoakhomma
ǀguitikōse nî ǂnoaba i ge a ǀkhai.
34 Tari-e kha ǁîb di ǁkharaba nî ūǁnâ-ai te,
îb ǁîb di ǃhuriǃhurisasiba tā ǃaruǀî ǃao kai te.
35 O ta ge ǃao tamase a ǃhoa ǁkhā,
xawe ta ge nē ta hâǃnâ mâsib ai a ǃhoa ǁoa.
© Khoekhoegowab Elobmîs © Bible Society in Namibia, 2020.
