1 “ǂGaiǂui re! Satsa nî ǃeream, khoe-i xare-i ǀkhai.
Huibats nî ôa-ai ǀhomǃgā-e xare hâ i nî?
2 ǁAixasib ge gâre khoe-e ra ǃgam
tsî surib ge ǁnâuǃāoǃnâ khoe-e ra hîkākā.
3 Tita ge gâreb ra ǃnomaǃkhōsa ge mû,
xaweb ge ǁnātimîsi ǀâxareba ǁîb hâǃkhaisa ge ǁgoe-ai.
4 ǁÎb ôan ge ǃnorasa tama hâ
tsî ǀgoraǃgâǃkhaib tawa hui-ao-i ose ra dāǃgâhe.
5 Gâre-i di ǃgaos ge ǃâsa khoen xa ra hapuhe,
ǁkhūn ǁaegub ǃnâ hân tsînan ge re ūǂui;
ǁgâsa khoen ge ǁîn di ǃkhūsiba ra tura.
6 ǂKhabab ge tsaraba xu ǂoaxas ǀguisa hî tama,
tamas ka iob ge ǃgomsiba ǃhūba xu uriǂoaxas ǀguisa hî tama.
7 Mâ khoe-i hoa-i ge ǃgomsib ǃaroma ge ǃnae,
tsî ǁî-i ûib ge ǀaes di naniros hîa ra ǃaekhâis khami ī .
8 “Xawe tita ga hâ, o ta ge Eloba ôa
tsî ǁîba ti ǁhōba ga ǁgui-aiǃâ hâ.
9 ǁÎb ge kai tsî ôaǃnâheǁoasa,
tsî ǃgôahōheǁoasa buruburuxa xūna ra dī.
10 ǁÎb ge ǀnanuba ǃhūbaib ai ǀapi kai
tsî ǁgamga ǃhanagu ai ra dâu kaiba.
11 ǁÎb ge ǃgamǃgamsen hâna ǀgapiǀgapi
tsî ǃoa hâna ǃnorasasib ǃoa ra kuikhâi.
12 Elob ge ǀhôagao khoen di ǀapede ra ǃkhomǃnâ,
ǀapen ge xūn hoanan dīǀoaǀoa tidese.
13 Gā-aidīsen ranab ge ǁîn ǂûn di ǀapedi ǀkha ra ǃkhō,
tsî ǀhôagaon di ǀapeǀhaosab ge ǃhaese ra ǀamǀam.
14 Tsēǃgâǁaeb ge ǁîna ǃkhaenab ase ība,
tsîn ge tsēa ǃkhaenab ǃnâ hâ khami ra tsananama.
15 Elob ge huio khoena ǁîn di ǀā namga xu ra ore,
ǁkhātib ge ǀgâsana ǀgaisan di ǃomga xu ra ǃnoraǃnora.
16 ǁNā-amagan ge ǀgâsana ǃâubasensa ūhâ,
tsîs ge ǂhanuoǃnâsib di amsa ra ǂganamsen.
17 “ǃGâiǃgâxa i ge hâ ǁnā khoe-i Elob xa ra ǂgōǀauhe-e!
ǁNā-amaga tā Hoaǀgaixab di ǂgōǀausa ǃharaxū.
18 ǁÎb ge tsui tsî ǁkhāti ra ǃgae-ai;
ǁîb ge ǂnauǁhūb ka xawe, ǁkhawa ra ǂuruǂuru.
19 ǂGui ǃnādi ǂōǂōsiga xus tsînab ge Eloba nî huiǂui tsi;
ā, ǂkhaba-i xare-i ge tsâǀkhā tsi tide.
20 ǃÂtsūǀkhāb ǃnâb ge ǁîba ǁōba ǁkhaeba tsi,
tsî torob ǃnâb ge gôab di ǀgaiba xu nî ore tsi.
21 ǁÎb ge nams di mîǁgaiǁgaisa xu sâu tsi
tsî ǃaorosasigu hîkākās diga xu nî ore tsi.
22 Hîkākās tsî ǃâtsūǀkhāb tsîrats nî âiǂui,
tsîts ǃhūbaib di ǁaixa ǀguruna ǃao tide.
23 ǃGarob di ǀuin ǀkhats ge ǃgomsi-e ūhâ tide,
tsî ǃaub di ǁaixa ǀgurun ge xū-i xare-e dī tsi tide.
24 Sa hâǃkhais tawats ge xū-i xare-e ǃao tide,
tsî sa ǂgariba xuts ge xū-i xare-e ǁkhui tide.
25 Sa ôananôagub nî ǂguiǂguisen ǃkhaisats ge nî ǂan,
tsî sa suriba ǃaub di ǀgân khami.
26 Kaira hâse ǀguits ge ǀhobas âts ǃnâ nî ǂgâ,
ǃhorob ra ǁîb ǁaeb ai dāǃnâǃkhais tawa sī-ūhe khami.
27 Jobtse, nēsa ge ôaǃnâ tsî ta ge ge mû, ama i asa.
ǁÎsa ǃgâ, î sa ǃgâib ǃaroma ūǃoa.”
© Khoekhoegowab Elobmîs © Bible Society in Namibia, 2020.
