1 Ob ge Joba ǃKhūba ge ǃeream:
2 “ǂAn ta ge a hoa xūna dīs ǁkhāsibats ūhâsa
tsî-i dī ǂgaots ra xū-e khoe-i xa ǃkhomǃnâhe ǁoasa.
3 Tari-e gā-aisi-e ūhâ tamaǃâ sa ǀapesa ra ǃkhaeǃkhae-e?
ǁNâuǃā tama ta hâ xūna ta ge ge ǃhoa,
sa buruxadīn tita xa kai tsî ta a ǀūna.
4 Sats ge: ‘ǃGâ, tita nî ǃhoa;
tita nî dîǃnâ tsi tsîts nî ǃeream te’ ti ge mî.
5 Sats xa gere ǃhoahe xūna ta ge
ǂgaera ǀkha ǀgui gere ǁnâu,
xawe ta ge nēsi ti mûra ǀkha go mû tsi.
6 ǁNā-amaga ta ge aitsama ra ǃgôaǁnâsen
tsî ta ge kai ǃhausens ǀkha
tsarab tsî tsaob tsîkha ǃnâ ǂnoa.”
ǀAmǀams
7 ǃKhūb ge nē xūna Jobi ǃoa mîtoa, ob ge ǃKhūba Elifab Temanǁîb ǃoa ge mî: “Sats tsî sa ǀhōsakha ǃoagub ge ti ǁaiba ra khau, Jobi ge dī khami go ge amaba tita xa ǃhoa tama hâ i xui-ao. 8 ǁNā-amaga hû ǁgōgu tsî hû baigu tsîga ū, î ti ǃoaba-aob Jobi tawa sī, î sago ǂûgo ǃaroma khauǁguibasa sī dī. Jobi ge sago nî ǀgoreba tsî ta ge tita ǁîb ǀgoresa ǁnâu-am tsî sago ǁoren ǃoa dī-ū go tide; ti ǃoaba-aob Jobi ge dī khami go ge tita xa amaba ǃhoa tama hâ i xui-ao.”
9 Elifab Temanǁîb, Bildadi Suaǁîb tsî Sofari Namatǁîb hâgu ge ǃgû tsî ǃKhūb ge mîba gu khami sī ge dī; tsîb ge ǃKhūba Jobi di ǀgoresa ge ǁnâu-am.
10 Jobi ge ǁîb ǀhōsaga ǀgorebatoa, ob ge ǃKhūba Joba, ǂoaǃnâb ge xūn hoana, ǀnaib ge ūhâ in xa ǀgam ǃnāra ǃnāsana ge mā-oa. 11 On ge ǁnāpa ǁîb ǃgâsan hoan, ǁîba ge ǀnai ǂan ina ǁîb tawa sī tsî ǁîb oms ǃnâ, ǁîb ǀkha ǂûǀhaosa ge ūhâ i. ǁÎn ge ǃKhūb ge ǁîb ai dī ǂōǂōsib ǃaroma ǁîb ǀkha tsâbaǁhao tsî gere ǁkhaeǂgao bi. Mâ khoe-i hoa-i ge Joba mari-i tsî ǃhuniǀurirâis tsîna ge mā.
12 ǃKhūb ge ǀuni tsēdi Jobi ûib dide ǂguros xa ǃnāsase ge ǀkhae. ǁÎb ge disihakaǀaǀoadisi gūn, ǃnaniǀoadisi ǃnain, ǀgamǀoadisi goman tsî ǀguiǀoadisi dâukin tsîna ge ūhâ i. 13 ǁÎb ge hû ǀgôagu tsî ǃnona ǀgôadi tsîna ge ūhâ i. 14 ǂGuro ǀgôasab ge Jemima ti ge ǀonǂgai; ǀgamǁîsa Kesia tsî ǃnonaǁîsa Keren-Hapux ti. 15 Jobi ôadi ǃgâ-ai ge îsa i tarekhoes ge ǁnā hoaraga ǃhūb ǃnâ ge ǀkhai i. ǁÎdi îb ge ǁîdi tsî ǃgâsagu âdi tsîna ǀhaoǀhao tsî ǁîn hoana ǀumisa ge mā.
16 ǁNās khaoǃgâb ge Joba ǀguikaidisi tsî hakadisi kuriga ge ûi. ǁÎb ge ǁîb ôan tsî ǁnurisan tsîna, hakaǁî ôananôagub kōse ge mû. 17 Jobi ge kaise kaira tsî ǀoasa ûikurigu khaoǃgâ ge ǁō.
© Khoekhoegowab Elobmîs © Bible Society in Namibia, 2020.
