1 “Nē ǁkhō mâsib ge ti ǂgaoba ǃhuri kai
tsî ra ǂnau kai.
2 ǃGâ re, ǁîb dommi di ǃguruba,
ǃgurub ǁîb amsa xu ra ǂoaxaba.
3 Hoaraga ǀhommi ǃnakabab ge ra ǃguru kai
tsî ǁîb napaba ǃhūbaib di ǁhôadi hoadi kōse.
4 ǁNās khaoǃgâb ge ǁîb domma ra ǃguru;
kai ǁkhāsib ǀkhab ge Eloba ǁîb domma ra ǀō kai
tsî ǁîb dommab ga ǀōǀō, ob ge napaba ra napa.
5 Elob ge buruburuxa ǀgaub ai dommi âb ǀkha ra ǀō kai;
ǁîb ge ǁnâuǃā ǁoa da a kai xūna ra dī.
6 Tsamaros ǃoab ra mî xui-ao ‘ǃHūbaib ai ǁnā,’ ti
tsî ǁhō ra ǀnanub ǃoa ‘ǁKhāsib hoab ǀkha ǀapi,’ ti.
7 Hoaraga khoenab ge ra sîsenǀû kai,
ǁîb ge kurun hoan ǁîb di sîsengan nî ǂanga.
8 ǀGurun ge hâǃkhaiga ǃoa ra ǃkhoeni
tsî ādi ân ǃnâ ra hâ ǀgara.
9 ǁGaoǂoas ge ǁîs hâǃkhaisa xu ra hā
tsîb ge ǃkhaiba sarede xu ra hā.
10 Elob di ǀommi ge ǃkhoaba ra hā
tsî kai ǁgamga ra ǃkhoa kai.
11 ǁÎb ge ǁau ǃâude ǀâb ǀkha ra ǀoaǀoa;
ǃâudi ǃnâ-ub ge napaba ra sîǂui.
12 ǁÎb ǂgaeǂguis ǃnaka di ge ra unusen,
ǁîdi ge Elob ra mîmān hoana
hoaraga ǃhūbaib ǃnâ ra dī.
13 Elob ge ǁgaoǀnanuba ǁkharas ǃaroma,
tamas ka io ǃhūb di ǃgâib ǃaroma,
tamas ka io ǁîb ǀnamma ǁgauǂuis ǃaroma ra sî.
14 “Jobtse, ǁnamro aibe î ǃgâ,
î Elob di buruburuxa sîsenga ǂâiǃgâ.
15 Elob ra ǁîn hoana mîmā ǀgausa ǂants a
tsî ǃâude xu napaba ra ǂnau kai ǀgauba?
16 ǃÂudi ra ǁhao ǀgauba ǂants a
tsî ǁnā buruburuxa sîsengu,
ǁnāb dīǀoaǀoasa ǂansa ūhâb diga?
17 ǃKhawagas ǀgamsa ǂoab xa i ga ǀgam,
on ge sa saran tsîna ǁnā ǀgamma ǁkhae ǁoa.
18 Satsa Elob ǀkha ǃāǂuisaba ge ǃāǂui,
mûsenǃnâxūs hîa tsunitsunihe tsî karokarohe hâs khami?
19 Tare-e ge Eloba nî mîbasa ǁkhāǁkhā ge re;
sige ǁnâuǃāgu a ǃkhae, xui-ao ge ge xū-e mî ǁoa.
20 Tita ra ǃhoa ǂgao ǃkhaisa mîbaheb nî?
Tari-e Elob xa hîkākāhesa nî ǁkhore?
21 “Xawe khoe-i xare-i ge soresa a kō ǁoa,
ǁîs ǃāǂuisab ǃnâ ra ǂkhai xui-ao;
ǂoab ga ǃkharu tsî ǃâude ǃgombēo.
22 ǀApasǀkhāba xub ge ǃhuniǀuriǂkhaiba ra hā;
Elob ǂnamipeb ge ǃaoǃaosa ǂkhaisiba hâ.
23 Hoaǀgaixab tawa da ge a ǀgū ǁoa;
ǁîb ǀgaib ge a kai, xaweb ge ǂhanu tsî a ǂhanu-ai
tsî khoe-e ǁgâiǀā tama hâ.
24 ǁNā-amagan ge khoena ǁîba ra ǃaoǃgâ;
ǁîb ge gā-aidīsen ra khoena ra ǁauǃgôa.”
© Khoekhoegowab Elobmîs © Bible Society in Namibia, 2020.
