1 Ob ge Elihuba ǃaruǀî ge mî:
2 “Sa gā-aigo, ti mîde ǃgâ,
î go sago ǂansa ūhâgo, tita ǁnâu.
3 ǂGaes ra mîdi ǀōba ǃâi
khamib ge namma ǂû-e ra tsâtsâ.
4 A da ǂhanu a xū-e ǁhûi;
tsî sada ǂûda ǃnâ tare-i a ǃgâisa ǂanǁapo.
5 Jobi ge ge mî: ‘Tita ge a ǀhapio
xaweb ge Eloba ti ǂhanuba ge ǀhana te.
6 ǂHanu ta a xawe, ta ge ǂhumi-aose ra ǃgôahe;
ǀhapio ta a xawes ge ti ǀhapisa ǂuru ǁoa.’
7 “Jobi khami ī khoe-e hâ-e,
mîǁgaiǁgaihesa ǁgam-i khami ra ā-e?
8 Tsūdī-aon ǀkha ǀguipa ra hâ-e
tsî ǂkhabadī-aon ǀkha ǀguipa ra ǃgû-e?
9 ǁÎb ra mî xui-ao: ‘Xū-e i kom khoe-e
harebeba tamao, Elob ǃnâ ǃgâiǃgâisensa.’
10 “Xawe, ǃgâ te re, sago ǁnâuǃāxago!
Elob ge dīsā tama hâ
tsî Hoaǀgaixab ge ǂhanuoǃnâsi-e dī tama hâ.
11 ǁÎb ge khoe-e dī-i ra xū-i ǃaroma ǀgui ra mādawa-am
ǁî-i ge tanisens â-i ra ǃaroma i ǀgui-e ra ǃkhōǃoa kai.
12 Amase i ge a īǁoa, Elob nî tsūdī ǃkhaisa
tsî Hoaǀgaixab nî ǂhanu-aisiba dabaǃkhunisa.
13 Tari-e ǁîba ǃhūbaib di ǃereamsa ge mā
tsî tari-e ǁîba hoaraga ǃhūbaiba ge gaoǂam kai?
14 ǁÎb di Gagabab ga ū-oa hâ
tsî ǁîb ǀomsa ǂgae-oa hâ,
15 on ge ǀomsa ūhân hoana ga ǁō hâ
tsîn ge hoa khoena ǁkhawa ga tsara kai hâ.
16 “ǁNâuǃāxa khoego ka, o nēsa ǃgâ re;
tita nî mîse ina ǁnâu re.
17 ǂHanu-aisiba ǁkhan hâ khoe-e ǂgaeǂgui ǁkhā-e?
ǂHanu-ai tsî ǁkhā khoe-e ǀgoraǃgâ ǁkhāts a?
18 Tari-e gao-ao-i ǃoa: ‘ǁAu xūtse,’ ti ra mî
tsî gaoǀgôa-i ǃoa: ‘ǂKhaba khoets,’ ti ra mî?
19 ǁÎb ge gao-aogu ǃnâ ǀkhāǁhûi tama hâ,
tamas ka io ǃkhū hâna ǀgâsan ǂamai ǃkhōǂui tama,
hoan a ǁîb ǃomkha di kurusabe xui-ao.
20 Mûǀapirob ǃnân ra ǁō;
tsuxuǃgâb aib ra ǁōb ǃaoba ǁîna ǁnāǂam tsîn ra ǁō,
ǀgaisan tsîn xū-en dīhe tamase ra ūbēhe.
21 ǁÎb mûrab hoaǁae khoen daogu ai ǃammâi hâ
tsî ǁîn dāǃharodi hoade ra mû.
22 ǂKhabadī-aon nî gauǃnâ,
ǃkhaeb tamas ka io ǃkhaenas ge ǀkhai.
23 ǂHâbasa tama i ge hâ, Elob ǁae-e nî mîmâisa,
khoe-i nî ǀgoraǃgâs ǃaroma ǁîb aiǃâ ǂhais di-e.
24 Ôaǃnâ tamaseb ge ǀgaisana ǂkhūǂkhū
tsî ǁîn di ǃkhaide ǀkhara khoen ǀkha ra ǃkhōǃkhuni.
25 ǁÎn ra dī xūnab a ǂan, amagab ge
ǁîna tsuxub ǃnâ dītoa tsî ra hîkākā.
26 Khoen di mûǁaeb ge ǁîna
ǁîn di ǂkhabasib ǃaroma ra ǁkhara.
27 ǁÎn ge ǁîba saoǃgonsa ge ǀû
tsî ǁîb daogu ǀkha ǁae tama hâ.
28 ǁNā-amagan ge ǀgâsana
Elob kōsen nî huiǂgaise ra ǁgarihe,
tsîb ge ǁgâiǀāb ǃnâ hân di domma ge ǁnâu.
29 “ǁÎb ga ǃnō, o tari-e a ǀgoraǃgâ bi ǁkhā?
ǁÎb ga ais âba gaugauo, o tari-e ǁîba nî mû ǁkhā?
ǁÎb ǀguib ge ǁaedi tsî khoen ǂama gaosîsen ǁkhā.
30 Eloxoresa khoen ǂgaeǂguis ǃnâ hâ tidese,
tamas ka ion khoena ǃnuide ǂnûiba tidese.
31 “Khoe-e Elob ǃoa mî-i ge hâ i:
‘Sa ǃoagu ta ge ge mâǃoaxa,
xawe ta ge ǁkhawa ǁore tide;
32 Ganupe ta mû tamana, ǁkhāǁkhā te re;
dīsā ta ga hâ, o ta ge ǁkhawa dī tide.’
33 Nēsats ra ǀūxū ǃkhais ǃaromab
Eloba nî mādawa-am tsi, tits ra ǂâi?
Sats ge ǁhûi nî tsa, tita tama ta;
ǁnā-amaga, ǂants ana ǃhoaǂui.
34 “ǁNâuǃāxagu ge tita ǃoa nî mî,
tsî gā-aigu hîa ra ǁnâu gu ge nî mî:
35 ‘Jobi ge ǂan-e ūhâ tamase ra ǃhoa,
ǁîb mîdi ge a harebeoǃnâ.’
36 Xaweb ge Joba ǀams kōse nî ǃâitsâhe,
ǁîb eloxoresa-i khamib ra ǃeream xui-ao.
37 ǁÎb ge ǁoreb âb ǀguiba ra ǂguiǂgui;
ǁîb ge ra ǁapunǃom,
tsî mîdi âba Elobǀî ra ǂguiǂgui.”
© Khoekhoegowab Elobmîs © Bible Society in Namibia, 2020.
