1 Jobi ge ǁkhawa ge ǂgaenamǃgâgutsoatsoa:
2 “Amase, Elob ûi hâo, ǁîb ti ǂhanuba ge ǀhana teba
tsî Hoaǀgaixab, ǁîb ti ǀomsa ge kaise tsûtsûba;
3 ǀoms tita ǃnâ hâs kōse
tsî Elob di ǀommi ti ǂguira ǃnâ hâs kōse,
4 kha ge ti amǁgaukha ǂhumi tide
tsî ti namma gāxaǃnâsi-i xare-e ǃhoa tide.
5 Tātsēs tsîna ta ge sago a ǂhanusa ǃkhōǃgâ tide;
ǁō ta nî tsēs kōse ta ǀhapio ta asa nî mî.
6 Ti ǂhanu-aisib tawa ta nî mâ tsî mî-unu tide;
ti ǂgaoǂans ge ûi ta hâs kōse ǂhani te tide.
7 “A i ti khākhoe-e ǂkhabadī-ao-i khami ī
tsî ti mâǃoa-ao-e ǂhanuoǃnâ-i khami ī.
8 Mâ ǃâubasen-e i eloxoresa-e ūhâ,
Elob ga ǁî-i ûiba ǃnubuǃnubu
tsî ǁî-i ûiba ūo?
9 ǂŌǂōsib ga ǁî-e hāǂam tsēs ai,
Eloba ǁî-i ǂgaidomma ǁnâub nî xare?
10 Hoaǀgaixab ǃnâ xare ǃgâiaǂgao i kha nî?
Hoaǁae i xare Eloba nî ǂgaiǀî?
11 “Elob di ǀgaib xa ta ge nî ǁkhāǁkhā go;
Elob Hoaǀgaixab di ǀapede ta ge sago xu sâu tide.
12 Hoago kom aitsama ǀnai ge ǀhûǀguio;
tare-i ǃaroma go nē harebeoǃnâ mîna ra ǃhoa?”
[Sofari]
13 “Nēs ge ǂkhabadī-aon Elob aiǃâ nî ǁkharahe ǀgausa
tsî ǁgâiǀā-aon Hoaǀgaixaba xu ra ǃkhōǃoa ǀumisa.
14 ǁÎn di ôan ga ǂguiǂguisen, xaweb ge gôaba ǁîna ǃâu hâ;
ǁîn di ôananôagub ǂâu hâ ǂûna ūhâ tide.
15 ǁNān hîa ga ûiǃgaun, ge ǂhīǁōb xa nî ǃgamhe
ǃoataradi ge ǁîn ǂama ǃoa tide.
16 ǁÎn di ǀhaiǀuri marib ga tsarab khami ǃgôaheǁoasa,
tsî ǁîn sarana ǂgoab kōse ǂgui;
17 xawen ge ǂhanu-aina ǁnā sarana nî ana
tsî ǀhapio khoen ge ǀhaiǀuriba nî ǀgoragu.
18 ǂKhabadī-ao-i ra om oms ge ǀnûiǃkhams khami ī,
tamas ka io ǃkhē-ao-i om hâ haire-oms khami ī.
19 ǁÎ-i ge ǃkhū hâse ra ǁomǃgû, xawes ge nēsa ǁkhawa ī tide;
ǁî-i ga ǂomsa xu ǂkhai, ob ǃkhūsib â-e ǀnai a ǀkhai.
20 ǃAob ge ǁî-e kai ǁgammi dâus khami ra hāǂam;
sareb ge ǁî-e tsuxub ǃnâ ra ǃgombē.
21 Aiǂoas di ǂoab ge ǁî-e ra ǃgomkhâi, tsî-i ge ra kā;
nē ǂoab ge ǁî-e hâǃkhais â-e xu ra ǃgombē.
22 ǀKhomoǃnâses ǁgaoǂoasa ǁî-i ai ra ǁgôaxa;
ǁkhōǁkhōsasib ǂoas diba i ra ǃkhoeni.
23 ǁGaoǂoas ra ǃgâiaǂgaob ǃomkha ǁam,
tsî eloxoresa-e ǁî-i hâǃkhaisa xu ǃnâibē.”
© Khoekhoegowab Elobmîs © Bible Society in Namibia, 2020.
