1 Jobi ge ǁkhawa ge ǃeream:
2 “Mâtits kha ǀgaio khoe-e ge hui!
Mâtits kha ǁôab â-i ǃnâ ǀgai-e ūhâ tama-e ge hui!
3 Gā-aisi-e ūhâ tama khoe-e mâtits ǀapemā
tsî harase sa ǂansa ge ǀgoragu-ū?
4 Tari-e ge ǃhoahui tsi
tsî tari-e nē ǀgaus ai ge ǃhoa kai tsi?”
[Bildadi]
5 “ǁŌ hân ra ǀkhū,
ǁnān ǁgamgu ǃnaka
tsî ǁîgu ǃnâ ǁan hân hoana.
6 ǁŌhân Hâǃkhaib ge Elob aiǃâ a ǀōǀkhā
tsî ǀkhaiǀkhāse ǁîb aiǃâ ǁgoe.
7 Elob ge ǃāǂuisaba ǃū-aisa ǃkhais ǂamai ra khoraǂui
tsî xū-i ǀkhaipa, ǃhūbaiba ra ǂgāmâi.
8 Elob ge ǁîb ǃkhae ǃâude ǁgamgu ǀkha ra ǀoaǀoaba,
xaweb ge ǁgammi ǃgomma ǃâude doa kai tama hâ.
9 ǁÎb ge trons âba ra ǃgū-ai,
ǃkhae ǃâudi ǀkhab ge ǁîsa ra ǃgūǂgan.
10 ǁGamgu ra ǀhao ǃkhaisab ge ǃgupuse ra saomâi,
ǃnâb tsî ǃkhaenab tsîkha ra ǀgora ǃkhais ai.
11 ǀHommi di ǂgurihaigu ge ra ǂgubi
tsî ǁîb di ǃkhâikhoms xa ra burugâ kaihe.
12 ǁÎb di ǁkhāsib ǀkhab ge huriba ra ǁgoea-ai kai;
ǁîb gā-aisib ǀkhab ge huriǀguruba ra hîkākā.
13 ǁÎb di ǂoab ǀkhab ge ǀhomma ra ǃgomǃanuǃanu;
ǁîb ǁôab ǀkhab ge ǃkhoeni ra ǀaoba ra ǃgam.
14 Nēn ge ǂkhari ǃâron ǁîb ǀgaib din ǀguina,
tupus ǁkhāsib dis ǀguis ge!
Tari-e ǁîb ǁkhāsib di ǃguruba nî ǁnâuǃā?”
© Khoekhoegowab Elobmîs © Bible Society in Namibia, 2020.
