1 Ob ge Sofari Namatǁîba ge ǃeream:
2 “Ti ǂâiǂhansens, ǃeream ta nîsa ra ǁgari te;
tita ǃnâ hâ tsâsib ra ǃnoeǃnoe te.
3 Tita ra mîǁgaiǁgai ǃkhâikhomsa ta ge ra ǁnâu,
xaweb ge ti ǁnâuǃāba ǃnā hâ gagaba ra ǃeream kai te.
4 “ǀNai ge īn xats kha ǂan tama hâ,
khoen ge ǃhūbaib ai ǂnubihe ǁaeba xu?
5 ǂKhabadī-ao-i ǃgâiaǂgaob ge ǂkhari ǁaero-i di,
eloxoresa-i ǁkhoaxasib ge ǁaero-i dis ǀguisa ī.
6 ǁÎ-i di ǂnīsasib ga ǀhommi kōse sī
tsî ǁî-i danasa ǃâude tsâǀkhā xawe;
7 ǁî-i ge ǀamosib kōse, ǁî-i ǂû-i xau-i khami nî kā.
ǁÎ-e ge ǂan i khoen ge nî ǂhâ,
mâpa i ge ǁî-e bē ǃkhaisa.
8 ǁÎ-i ge ǁhapo-i khami nî bē tsî hōhe tide;
ai-īsi-i tsuxub ǃnâ ra mûhe-i khami i ge nî kā.
9 ǁÎ-e gere mû mûs ge ǃaruǀî ǁî-e mû tide,
tamas ka io, ǁî-i ǃkhais ge ǃaruǀî ǁî-e ǂan tide.
10 ǁÎ-i ôan ge ǀgâsana nî mādawa-am;
ǁî-i ǂû-i ǃomkha ǀkha i ge ǁî-i ǃkhūsiba nî mā-oa.
11 ǁÎ-i ǂkhōgu ge ǂkham tsî a ǀgaisa,
xawe ǀhobas ǃnâ ǁî-i ǀkha nî tsara kai.
12 “ǂKhabab ga ǁî-i ams ǃnâ ǂkhonse ǁkhoa
tsî-i ga ǁnā ǁkhoaba, ǁî-i nammi ǃnaka sâu;
13 o i ge ǂaraǂui tamase,
amǃnâs â-i ǃnâ ūǀgara hâ.
14 Xawe ǁî-i ǃnāb ǃnâ hâ ǂû-i ge nî ǃkhurisen
tsî ǀaob ǃgā-i khami ra ǃgāxa.
15 ǃKhūsib hîa i ge haraǂgāba i ge ǁkhawa ra ǀkhûiǂui;
Elob ge ǁî-i di ǁkhomsa xu ra ūǂui kai.
16 ǁÎ-i ge ǃgāxa ǀao-i ǃgāba nî ǀkhubuǂgā;
ǃgāxa ǀao-i xa nâhe hâ khami i ge nî ǁō.
17 Dâu ra ǁgamǃāga i ge mû tide;
ǃāgu danib tsî ǃaopeb tsîn xa ra dâuga.
18 ǁÎ-i ǀhupuba xu i ge ǃora ǂûna i ge ǂû tamase nî mā-oa;
ǁî-i ǂharugub di hōǂgāsa i ge ǀama tide.
19 ǁÎ-i ge ǀgâsana dāǃgâ, ǁnāxūǃgâ
tsî aitsama i om tama omde ǁgūǀhana xui-ao.
20 ǁÎ-i xūǃgunuxasib ge ǀam-e ūhâ tama hâ;
ǁî-i ǀguriǂâibasensa xu i ge ǃnora ǁoa.
21 ǂÛs khaoǃgâ i ge xū-e ǃgau tama hâ;
ǁnā-amagab ge ǁî-i ǃgâiǃgâba aiǃgû tide.
22 ǁÎ-i ge ǃkhūsiba i ǃnāǂamsase ūhâ,
xawe sâoǃnâse nî hâ;
ǂōǂōsib ge hoaraga ǁkhāsib ǀkha ǁî-e nî hāǂam.
23 ǁÎ-i ra ǁkhoms â-e ǀoaǀoa,
hîab ge Elob ǁaiba ǁî-i ai ǁnâ
tsî ǁîb ǁaib di ǃnabaga ǁî-i ai nî ǀapi kai.
24 ǁÎ-i ge ǀuri ǁâtanisa xu nî ǃhū;
brons ǂā-i ge ǁî-e nî ǁhâiǃkharuǃnâ.
25 ǁÎ-i soros ǃnâ-u i ge ra ǃkhāǃkharu,
ǁhâigôab ams ra tsabab âb xa ǂkhai
tsî i ǁî-e ǁōb ǃaob xa ra gaoǂamhe.
26 ǁÎ-i ǃkhūsib ra kai ǃkhaenab xa ǃgū-aihe;
ǁhabuhe tama ǀaes ge ǁî-e nî ǂhubiǂui
tsî ǁî-i tentoms ǃnâ ǃgau hân hoana nî hapu.
27 ǀHommi ge ǁî-i dīsādi hoade nî ǂhaiǂhai
tsîb ge ǃhūbaib hoaba ǁî-i ǃoagu nî khâi.
28 Kai ǁgammi dâus ge ǁî-i tentomsa nî dâubē,
ǀgaisa ǃhae ǁgamga Elob ǁaib tsēs ai.
29 “Nēs ge ǂkhabadī-aon Elob xa nî ǁkharahe ǀgausa;
Elob ǃoagu ra khâin ǂhomibahe hâ ǃâb ge nēba.”
© Khoekhoegowab Elobmîs © Bible Society in Namibia, 2020.
