1 Ob ge Bildadi Suaǁîba ge ǃeream:
2 “Xarets kha ǃhoa tsî nî ǀû?
ǃHoasoasats ga mā te, o ge ge ǃaruǀî a ǃhoa ǁkhā.
3 Tare-i ǃaromats xamarin ǀkha ra ǀgopeǀnō geba?
Tarexats ra gârekhoemû mû ge?
4 ǁÎ-i ǁaib xa ra ǀkhauǃāhe khoe-i khamits ge ī;
sats ǃaromab ǃhūbaiba nî ǃū-aisa tits ra ǂâi,
tamas ka io gu ǃgareǀuiga ǁîgu ǃkhaide xu nî ūbēhe?
5 Amase, ǂkhabadī-ao-i di ǃnâb ge nî ǃkhaeǃkhaehe,
tsî ǁî-i ǀaes di ǁhabub ge nî ǀari.
6 ǁÎ-i tentoms di ǃnâs ge nî ǃkhae
tsî ǁî-i xōǀkhā mâ ǃamǀaes ge nî ǀarihe.
7 ǁÎ-i ǁkhoa dāǃharodi ra nēsi îganǀgēsib ǃnâ dā;
ǁî-i gā-ai ǀapedi xa i aitsama nî ǂhaohe.
8 ǁÎ-i ge ǃnuis ǃnâ dā tsî ǂaira ai nî ǃkhōhe;
ǁî-i ge āb ǃnâ nî ǁnāǂgâ.
9 ǁÎ-i ǃnoas ge ǁnoas xa nî ǃkhōhe;
ǃnuis ǃnâ i ge ǁî-e nî ǃgûǂgâ.
10 ǂHaotsurib ge ǃhūb ǃnâ sâubēsase ǃâu i hâ;
ǃnuis ge ǁî-i daob ǃnâ ǃnuisa.
11 “ǁÎ-i ge hoa ǀkhāga xu ǃaob di ǂōǂōsigu xa ra xāǂgāhe
tsî gu ge soms khami mâ ǃkhai-i hoa-i ai ra saomahe.
12 ǃÂs xa i ge ǁî-e ǀgai-i xare ūhâ tama hâ
tsî ǂōǂōsib ge ǁî-e daob ai ǃâuǁgoe.
13 ǁKhōǁkhōsa ǁō-i ge ǁî-i khōb ǃâna nî ǂûǁnâ;
ǁōb ǂguroǃnaesab ge ǁî-i ǁôakha tsî ǀnūkha nî hāpuǁnâ.
14 ǁÎ-i tentoms ǃnorasasiba xu i ge tsubuǂuihe
tsî ǂōǂōsigu gaob tawa nî ǃkharasīhe.
15 ǁÎ-i tentoms ǃnân ge ǁî-i di tamana nî ǁan;
ǁanǃkhais â-i ge ǂhubi ra sulfura nî tsoro-aihe.
16 ǁÎ-i ǃnomagu ge ǃhūb ǃnaka ǂnâ hâ
tsî ǁnâugu â-e nî ǃkhobo.
17 ǃHūbaib ai i ge ǁî-e tātsē ǁkhawa ǂâihe tide
tsî ǀons â-i ge tātsē ǁkhawa ǁnâuhe tide.
18 ǁÎ-i ge ǃnâba xu ǃkhaenas ǃnâ ǁgariǂgāhe
tsî ǃhūbaiba xu nî ǃhaeǂuihe.
19 ǁÎ-i khoen ǃnâ i ge ôananôagu-i tamas ka io suri-e hâ tide,
tsî i ûiǃgau hâ khoe-i xare-e ǁî-i ge ǁan hâ ipa ǁan tide.
20 Huriǂoas khoen ge ǁî-i tsūǃōb ai nî ǃhuri
tsî aiǂoas din ge ǃaob xa nî xāǂgāhe.
21 ǁNāti i ge ǂkhaba khoe-i di oms ǀkha nî ī;
ǁnāti i ge Elob ǀkha ǁae tama khoe-i hâǃkhais ǀkha nî ī.”
© Khoekhoegowab Elobmîs © Bible Society in Namibia, 2020.
