1 “ǃAruǀî ûis di tura-e ta ūhâ tama,
ti tsēdi go ǃgûtoa;
ǀhobas ǀguis ǃâu te hâ.
2 ǃHō-aon nams ǀguis ǃnâ ta hâ;
ti mûra ra ǁîn ǁgoaǂuide kōǀî.
3 Ti Elotse, mâǁkhaebas ase mâǂgâba te re.
Tari-e kha tita nî mâǂgâba?
4 Sats ge ti ǀhōsagu ti ǁnâuǃāga ge ǂganam,
ǁnā-amagats, ǁîga ti ǂama dansa mā tide.
5 Khoe-i ga ǁî-i ǀhōsana mari-i ǃaroma ǀapexū,
on ge ǁîn ôana ǁnās xa nî tsâǀkhāhe.
6 Elob ge khoen ǃhōxūse ge dī te;
ǁîn ge ra ǂāra-aiǃnâ te.
7 Ti mûra ge ǃoab xa ǁaubexa ra mûǀû ǁga;
ti hoaraga soros ge soms khami ī.
8 ǂHauǃnâ khoen ge ǁnās xa ra ǃhuri
tsî ǀhapio khoen ge eloxoresan ǃoagu ra khâi.
9 ǂHanu-ain ge ǁîn daob ai ra hâǀgara
tsî Elob aiǃâ ǃanu ǃomga ūhân,
ge ǃaruǀî ǀgui ra ǀgai.
10 Sago hoago ga ǃnās hoasa tita tawa oaǀkhī,
xawe ta ge sago ǃnâ, ǁnâuǃāxa ǀguib tsîna hō tide.
11 “Ti tsēdi ge ge ǃkharu; ti ǀapedi ge sîsen tama ge i;
ǃaruǀî ta ǃâubasen-i xare-e ūhâ tama.
12 ǁÎgu ge tsuxuba ra tsēa kai;
ǁîgu ge: ‘Tsuxub di ǁaegub ǃnâb, ǃnâba a ǀgū’ ti ra mî.
13 Tita ga ǁŌhân Hâǃkhaiba ti omse mûǂuibasen,
tsî ǁîb ǃkhaesiba ti kharose dī;
14 tsî ta ga ǀhoba-āb ǃoa: ‘Sats ge ti îtsa,’
tsî ǂunigu ǃoa:
‘Sago ge ti îs tamas ka io a ti ǃgâ’ ti mî;
15 os kha mâsa nî ti ǃâubasen?
Tari-e ti ǃâubasensa nî mû?
16 ǁÎsa ǁŌhân Hâǃkhaib ǃnâ nî saoǁgôa te?
ǁÎm hoama tsarab ǃnâ nî ǁgôa?”
© Khoekhoegowab Elobmîs © Bible Society in Namibia, 2020.
