1 Ob ge Sofari Namatǁîba ge ǃeream:
2 “O di kha nē ǂgui mîdi âtsa ǃereamhe tide?
Ob kha nē kai ǃhoa-aoba xare nî ǂhanu-ai kaihe?
3 Sa harebeoǃnâ ǃhoaxūna kha xare khoena nî ǃnō kai?
Sa ǃhōǃhoan ǃaroman kha khoena taotao tsi tide?
4 Nētits ra mîs ǀkha: ‘Ti ûib ge a ǂnao-o,
tsî ta ge sa aiǃâ a ǃanu.’
5 Ae, Elob ga ǃhoa hâ,
tsî sa ǃoagu ǁîb di amǁgaukha khowa hâo,
6 ob ge ǁîba gā-aisib di ǂganǃgâsiga ga ǂhaiǂhai hâ;
gā-aisib ǂgui ǀkhāga xu a ǁnâuǃāhe ǁkhā xui-ao.
Sats nî ǂans ge, Elob ge sa ǂgui ǁorena xu,
ǀnîn ǀguina ǀûba ǃkhaisa.
7 “Elob ǂganǃgâsiba xare ǂanǂui ǁkhāts a?
Hoaǀgaixab di kaisiba xare ǂanǂui ǁkhāts a?
8 Gā-aisib âb ge ǀhomma ra īǂam,
tsîts a sīǃnâ ǁoa.
Gā-aisib âb ge ǁŌhân Hâǃkhaib xa a ǃgam,
tsîts a sīǃnâ ǁoa.
9 Elob kaisib ge ǃhūbaib harasiba ra īǂam,
tsî hurib di ǂhabasib xa a kai.
10 Elob ga ǃkharugaruse khoe-e ǃkhōsis ǃnâ ū
tsî ǀgoraǃgâǃkhaib tawa sī-ū,
o tari-e ǁîba a mâǃoa ǁkhā?
11 Elob ge ǀhôagao khoena a ǂan;
ǁîb ge ǁîn ǁoren hoana ra mû.
12 Xawe gâre khoe-i ge ǃgarodâukis di ôa-i
ga khoese ǃnae, o ǀgui ǁnâuǃāba ra hō.
13 “Xawets ga sa ǂgaoba Eloba mā
tsî ǀgores ǃnâ sa ǃomkha ǁîb ǃoa ūkhâi;
14 sa ǃomkha di ǁorenats ga dībē
tsî ǁoren ǃaruǀî nî ǀuriǀuri tsisa mā-am tama i,
15 ots ge tao-i ose sa danasa ūkhâi
tsî ǃao-i ose ǃgom-i hoa-i ǃnâ ǂgâ ǁkhā.
16 Sa ǃgomsigu hoaga ǀuru
tsîts ge dâuǃkharu ge ǁgam-i ase ǁîgu xa nî ǂâi.
17 Sa ûib ge tsēǃgâǁaeb di ǃnâb ǂamai nî ǃgāsa;
ǃkhaesib hîa hâb ge ǁgoasores khami nî ǃgāsa.
18 ǂGomǃgâbats nî ūhâ, ǃâubasens hâ xui-ao;
ǁkhaubahe tsîts ǃnorasase nî sâ.
19 ǁGoets ga sī, xawets xū-i xare-e ǃao tide;
tsî ǂgui khoen ge sa huiba nî ôa.
20 Xawe eloxoresan mûdi ge ǃaruǀî mû tide
tsî ǁîn nî ǃkhoeni ǀgau-i xare-i ge nî ǀkhai.
Hūs di ǃâubasens ǁîn dis ge, ǁōb di hāsa.”
© Khoekhoegowab Elobmîs © Bible Society in Namibia, 2020.
