1 “Ti ûiba ta ge go tsau;
ǃnorasase ǃgae tsî ta ge ti ǀoms ǃnâ hâ tsûb hoaba nî ǃhoaǂui.
2 Elob ǃoa ta ge nî mî: ‘Tā ǁkhara te re;
tare-i ǃaromats ra ǃkham-ū te ǃkhaisa mîba te re.’
3 Khoe-e ǁgâiǀās xats a ǃgâibahe?
Sa ǃomkha di sîsennats ra ǂhara;
ǂkhaba khoen di ǀapedi xats ra ǀnom hîa?
4 Khoen ra mû-ū mûdets ūhâ,
tamas ka iots khoen ra mû khami ra mû?
5 Sa ûib tsēde, khoen di ǃnubu ûitsēdi khami ī;
tamas ka io gu sa ûikuriga,
khoen ûikurigu khami a ǃnubu?
6 Tare xū-i ǃaromats ti dīsāde ôaǂui
tsî ti ǁoren xa ra ǂanǂui ǂgao?
7 Sats ge ǀhapio ta asa a ǂan,
xawe i ge khoe-i xare sa ǃomkha xu a huiǂui te ǁoa.
8 “Sa ǃomkha ge tita ǂnubi tsî ge kuru;
xawets ge nēsi hoaragase ra hîkākā te.
9 ǂGoab ǀkhats ge ǂnubi tesa ǂâihō re.
ǁKhawats kha tsarab ǁga ra oa kai te?
10 Dai-i khamits kha tita ǂnâ tama hâ,
tsî ǂgēse-i khamits kha unu te tama hâ?
11 Khōb tsî ǁgan-i tsîn ǀkhats ge ana te
tsî ǂkhōgu tsî ǁābagu tsîn ǀkha ge ǂomǀhao te.
12 Ûiba mā te tsîts ge ge ǀnam te,
tsîts ge tita kōǃgâs ǀkha ti gagasa ge ǃûi.
13 Xawe sa ǂgaob ǃnâts ǂganǃgâsa xūna
ǂâis ǃnâ ti ǃoagu ūhâ ǃkhaisa ta ge ge ǂan i.
14 ǁOre ta ga hâ, ots ga mûǃnâ te hâ
tsîts ga ti ǁorena ǀûba te tama hâ.
15 ǀHapixa ta ka, ob ǂōǂōsiba ǃâu te hâ,
ǀhapio ta ka, xawe ta ti danas tsîna a ūkhâi ǁoa;
taob xa xāǂgāhe tsî ta ǂōǂōsib ǃnâ ǀgui ûi hâ.
16 ǀGairo tsî ta ga khâimâ,
ots ra ǁaixa xammi khami sauru te;
ǁkhawats ra sa buruxa dīga ti ǃoagu dī.
17 ǀAsa ǀhûǀguitimî-aonats ti ǃoagu ra hā-ū;
sa ǁaib ra ti ǃoagu khâi;
sa toroǃkhamaogu ǁkhawa ǀasa-ammese ra ǁnāǂam te.
18 “Tare-i ǃaromats ti ǃnaesa ge mā-am?
Mû-i xare-i mû te tamase ta ge ǀnai ga ǁō hâ.
19 ǃNae tama ta hâ khami ǀgui i ge ga ī hâ;
ti îs di ǁhāsa xu ta ge ǁkhōhes ǀguisa ga hî hâ.
20 Ti ûitsēdi ge ǀnai a ǀoro, xuige ǁnāxūǂui te!
A ta ǂkhariroses ka xawe, sâsa ûiba ûi.
21 Tita ge ǃhae ǁaeb ǃnâ nî ǀkhai,
kai ǃkhaeb tsî ǁōb sommi tsîkha ǃhūb ǁga
tsî ǁkhawa oahā tide.
22 ǁNā ǃhūb ǃkhaenas, ǃgam sommi
tsî ǀhomaxasib xa ǀoa hâb;
ǃnâb âb tsîn ǃkhaenab khami ība ǃoa.”
© Khoekhoegowab Elobmîs © Bible Society in Namibia, 2020.
