Johaneb 11 - Khoekhoegowab New Translation 2020 (KKG20)

Lasarub di ǁōb

1 Lasarub ti ǀon hâ khoeb, Betanis ǃnâ ge ǁan hâ ib ge ge ǀaesen hâ i. Betanis ge ǁnā ǃās ǁîs ǃnâ ra Marias tsî ǁîs di ǃgâsas Martas tsîra ge ǁan hâ isa. 2 ( Nēs ge ǁnā Marias, ǃKhūb ǂaira ǀgapiǀgau ǃgâihamoli-i ǀkha ǂkhau tsî ge ǁîs ǀûgu ǀkha ǀomǀkhāsa. ǁÎs ǃgâsab, Lasarub ge ǀaesen ge hâ iba.) 3 Nē khoeǃgâgura ge Jesuba haisiba tsî ge mî: “ǃKhūtse, ǀnamts hâb ge kaise ǀaesen hâ.”

4 Xawe Jesub ge nēsab ge ǁnâu, o ge mî: “Lasarub ǀaeb ge ǁōb ǃnâ ǀuni tide tsîb ge ǂkhaisib Elob dib ǃoa hâ. Elob Ôab ge ǂkhaisiba nēsa xu nî ǃkhōǃoa.” 5 Jesub ge Martas tsî ǁîs ǃgâsas tsî Lasarub tsîna ge ǀnam i, 6 ǁnâub ge Lasarub ǀaesen hâ ǃkhaisa, ob ge noxopa sao ra ǀgam tsēra hâb ge i ǃkhaib tawa ge hâ. 7 ǁNās khaoǃgâb ge ǁîba ǁkhāǁkhāsabegu* âb ǃoa ge mî: “A ge Judeab ǃoa oa.”

8 Xawe gu ge ǁkhāǁkhāsabegu âba ge mî: “ǁKhāǁkhā-aotse, ǀoro tsēdi ǀguidi ǃkharu hâse tamasa Jodeǁîn goro Judeab ǃnâ satsa ǀuiǁhom ǂgaosa. ǁNāǀîts ǁkhawa ra ǃgû ǂgao?”

9 Ob ge Jesuba ge ǃeream: “Tsēs ǃnâ gu kha disiǀgamǀa irga hâ tama hâ? ǁNā-i hîa tsēs di ǃnâb ǃnâ ra ǃgû-i ge ǃnôa tide, ǁî-i nē ǃhūbaib di ǃnâba ra mû amaga. 10 Khoe-i ga tsuxuba ǃgû, o-i ge ra ǃnôa, ǃnâba i ūhâ tama amaga. 11 Sage horesab Lasarub ge ǁom hâ, xawe ta ge nēsi ǃgû tsî ra sī ǂkhaiǂkhai bi.” 12 O gu ge ǁkhāǁkhāsabega ge mî: “ǃKhūtse, ǁommi ga hâo os kom ǁnāsa ǂgausib ti ra ǂâibaseno!” 13 Jesub ge Lasarub go ǁō ti gere ǂâibasen, xawe gu ge ǁîga ǃgâi ǂoms di sâb ti ge ǂâi hâ i.

14 Ob ge ǁîga ǂhauǃnâse ge mîba: “Lasarub ge go ǁō 15 tsî ta ge sago ǃaroma ra gangan, ǁnāpa ta go hâ tama hâ i ǃkhaisa, nēs ra ǀnî ǃēs ǂgom go nî ǃkhais disa mā go amaga. ǀKhī, î ge ǁîb ǁga ǃgû re.”

16 Ob ge Tomab, Didimub tis tsîna gere ǂgaiheba ǁîb di horesa ǁkhāǁkhāsabegu ǃoa ge mî: “A ge sage tsîna ǃgû tsî Jesub ǀkha ǁō.”

Jesub ge a khâi tsî a ûi

17 Betanis ǃnâb ge Jesuba sī, ob ge Lasaruba ǀnai haka tsēde ǀhobas ǃnâ ge ǁgoe i. 18 Betanis ge ǁaubexa ǃnona kilometerga Jerusalems ǀgūse ge ǁgoe i 19 tsî ǂgui Jodeǁîn ge Martas tsî Marias tsîra, ǁîra ǃgâsab di ǁōǂoas ǃaroma nî ǁkhaeǂgao tsî tsâbaǁhaose ge ǀkhī hâ i. 20 Martas ge Jesub ǃgoaxa ǃkhaisa a ǁnâu, os ge ǁîba ge ǃgûǃoa, xawe Marias ge oms ǃnâ ge ǂnôa i. 21 Tsîs ge Martasa Jesub ǃoa ge mî: “ǃKhūtse, sats ga nēpa hâ hâo, ob ge ti ǃgâsaba ga ǁō tama hâ. 22 ǁNāti ī xawe ta nēsis tsîna a ǂan ǃkhais ge Elob xats nî ǂgants ra xū-i hoa-e māhesa.”

23 Ob ge Jesuba ǁîs ǃoa ge mî: “Sa ǃgâsab ge ǁkhawa nî khâi.”

24 Os ge Martasa ge mî: “Ā, ǀuni tsēs aib nî khâi ǃkhaisa ta ge a ǂan.” 25 Ob ge Jesuba ge mî: “Tita ge khâita tsî ûita. ǁNā-i, tita ǃnâ ra ǂgom-i ge ǁō-i ka xawe, ǁkhawa nî ûi. 26 ǁÎn ge tita ǃnân ra ǂgom amaga ǀamo ûiba nî ǃkhōǃoa tsî tātsē kāǁō tide. Nēs ǃnâ ǂgoms ra?”

27 Os ge “Ā ǃKhūtse, ǂgom ta ge ra sats a Xristu,* Elob Ôa ǃhūbaib ai nî hātsa ǃkhaisa” ti ge ǃeream.

Jesub ge Lasarub ǃaroma ra ā

28 Nēnas ge mîtoas khaoǃgâs ge Martasa ge oa. ǁÎs ge ǃgâsas Mariasa tsâbaǁhao-aona xu ǀgui ǀkhāb ǁga ǂgai tsî ge mî: “ǁKhāǁkhā-aob ge go hā tsî ra ǂgai si.” 29 ǁNâus ge, os ge ǁnātimîsi khâi tsî Jesub ǁga ge ǃgû.

30 ǁÎb ge ganupe ǃāros ǃauga, Martas ge ǃoa bi ǃkhaib tawa ge hâ i. 31 Tsî Jodeǁîn ǁîs ǀkha oms ǃnâ ge hâ in tsî ǁîsa gere ǁkhaeǂgaon ge Marias go ǃhaese khâi tsî ǂoa ǃkhaisa mû, on ge ǁîs ra Lasarub ǀhobas ǁga ās nî sīga ǃgû ti ge ǂâi hâ i. On ge ǁîsa ǁnāǀî ge sao. 32 Tsî Marias ge ǀkhī tsî Jesuba mû, os ge ǁîb aiǃâ ǁnāǁgoe tsî ge mî: “ǃKhūtse, ti ǃgâsab ge ga ǁō tama hâ, sats ga nēpa hâ hâo.”

33 Tsî Jesub ge ǁîs tsî ǁîs ǀkha go hā Jodeǁîn tsîn ra ā ǃkhaisa mûo, os ge ǁîb gagasa kaise ge tsâǀkhāhe tsîb ge ǃoatsâsib xa ge khâiǃnâhe. 34 Ob ge “Mâpa du ǁîba ǁgui hâ?” ti ge dî.

On ge “ǃKhūtse, hā î mû re!” ti ge mî. 35 Tsîb ge Jesuba ge ā. 36 On ge Jodeǁîna ge mî: “Kō re, mâtikōseb ge ǁîba ǀnam i ǃkhaisa.” 37 Tsîn ge ǀnîna “Nē khoeb ge ǂgī hâba ge mû kai. Tare-i ǃaromab Lasarub nî ǁōsa go ǁkhae tama hâ i?” ti ge mî.

Lasarub ge ǁōba xu ra ûi-ûihe

38 Tsîb ge Jesuba ǁkhawa ǃoatsâsib xa khâiǃnâhe tsî ǀhobas tawa ge sī. ǀHobas ge ǁhoab ǃnâ ge hâ i tsîs ge ǂgâ-amsa ǀui-i ǀkha ge ǂganamhe hâ i. 39 “ǀUisa garibē” tib ge Jesuba ǁîn ǃoa ge mî.

Xawes ge Martas, ǁō hâb di ǃgâsasa ǁîb ǃoa ge mî: “ǃKhūtse, ǀnaib haka tsēde ǁō hâ, xui-aob ge nēsisa ǁgaora ǁamaba ūhâ.”

40 Ob ge Jesuba ǁîs ǃoa ge mî: “Mîba si tama ta hâ, tita ǃnâs ga ǂgom os nî Elob ǂkhaisiba mû ǃkhaisa?” 41 On ge ǀuisa ge garibē. Tsîb ge Jesuba ǀhommi ǁga kōǃapa tsî ge mî: “Ti Îtse, gangan tsi ta ra ǁnâu-am tets go ǃkhais ǃaroma. 42 Hūgaǀguits ge ra ǃgâ te, xawe ta ge mâǂnamipe hâ ǂnubis khoen ǃaroma ǁîsa ra mî, sats ge sî te ǃkhaisan nî ǂgomse.” 43 Tsîb ge Jesuba nēna mî tsî ǃgari dommi ǀkha “Lasarutse, ǂoaxa!” ti ge ǂgai. 44 Ob ge ǁō hâba ǀhobaǃkhaigu ǀkha ǃomkha tsî ǂaira ǃgaehe tsî ais âba aosenǃkhaib ǀkha ǂgamhe hâse ge ǂoaxa. Ob ge Jesuba ǁîn ǃoa ge mî “Xore bi, îb ǃgû” ti.

Jesub ǃoagu hâ ǀapeǀhaos

(Mateub 26:1-5Markub 14:1-2Lukab 22:1-2)

45 Nē go īn hoanan ge mû, on ge ǂguin Jodeǁîn din, Marias ǀkha ge hâ ina Jesub ǃnâ ge ǂgom. 46 Xawe ǀnîn ân ge Farisegu ǁga ǃgû tsî Jesub ge dīna ǁîga ge sī mîba. 47 O gu ge danapristergu tsî Farisega ǀGapi ǀApemāǃnansa ǂgaiǀhao tsî nēna ge ǃhoaǂam. “Tare-e ge nî dī?” ti gu ge ǁîǃnābe ge dîgu. “Nē khoeb ge amase ǂgui saode ra dī. 48 ǁNāti ge ga ǁnāxū bi, on ge hoana nî ǂgom bi tsîs ge Romeǁî toroǂnubisa hā tsî sage di Tempeli tsî ǁaes tsîna nî hîkākā.”

49 Tsîb ge ǀguib ǁîgu dib, Kajafab hîa ge ǁnā kurib ǃnâ ǀgapiprister iba ǁîgu ǃoa ge mî: “Tare-i ǃaroma go ǁnāti a gâre? 50 Tare-i ǃaromas nî hoaraga Jodeǁî ǁaesa hîkākāhe? Ab nē ǀgui khoeba ǁaesa ǁōba.”

51 Tsîb ge ǁnāsa ǁîba xu mî tama hâ, xawe ǁkhā kurib ǃnâb ge ǀgapiprister i, xui-aob ge Jesub nî ǁaesa ǁōba ti ge kēbo. 52 Tsî ǁaesab nî ǁōbas ǀguisa tama, xaweb nî ǁkhāti Elob ôan, ǀgaruǀgaruhe hâna ǀguin nîse ǀhaoǀhaose.

53 ǁNā ǁaeba xus ge Jesuba ǃgamsa Jodeǁîn ǂamkhoegu xa ge ǀapeǀapetsoatsoahe. 54 Ob ge Jesuba ǃaruǀî ǁkhoase Jodeǁîn ǃnâ ǃgûma tama ge i tsîb ge ǁnāpa xu ǃgaroǃhūb ǀgūse, Efraim ti ǀon hâ ǃās ǃoa ǃgû tsî ǁnāpa ǁkhāǁkhāsabegu âb ǀkha sī ge hâ.

55 Jodeǁîn di Pasxaǁâudīb* ǁaeb ge ǀgūo, on ge ǂguina hoa ǃkhaina xu nē ǁâudīb aiǃâ ra hâ ǃanuǃanusens ǃaroma Jerusalems ǁga ge ǃgû. 56 ǁÎn ge Jesuba gere mû ǂgao, tsîn ge Tempeli ǃnâ ǁîǃnābe gere dîgu: “Mâti du ra ǂâi? Pasxaǁâudīb* ǃaroma xare ǀkhīb nî?” 57 ǁNā ǁaeb ǃnâ gu ge ǁkhāti danapristergu tsî Farisega ǂhaisase mîmā-e ge ǂoa kai, khoe-i ga ǂan mâpab hâ ǃkhaisa, o-i ge nî ǂanǂan, î gu ǃkhō bi ti.